- ەۋروپا ليگاسىندا كوماندا الدىنا قانداي ماقسات قويىپ وتىر؟ بۇل توپتا كىمدى فاۆوريت دەپ ەسەپتەيسىز؟
- توپتا كىمنىڭ مىقتى ەكەنىن ناقتى ايتۋ قيىنداۋ. ال ماقساتىمىز – ءبىر ورىندا تۇرىپ قالماي, دامي ءتۇسۋ. قازىرگى ۋاقىتتا تەك ەرتەڭگى ماتچ جايلى ويلانىپ وتىرمىز. ءتۋرنيردى جەڭىسپەن باستاۋ ءۇشىن بارىمىزدى سالامىز. سەبەبى, جانكۇيەرلەرىمىز بىزدەن تەك جەڭىستى كۇتەدى.
- قول استىڭىزداعى ويىنشىلاردىڭ ءبارى ەرتەڭگى ماتچقا دايىن با؟
- برۋنو سوريانو مەن ادريانو مارينادان باسقاسىنىڭ ءبارى دايىن. ال الاڭعا شىعاتىن ويىنشىلار جايلى ەرتەڭ ويلاناتىن بولامىز.
- باق بەتتەرىندە ءسىزدى «ۆالەنسيا» كومانداسىنىڭ باس باپكەرى بولعىسى كەلەدى دەگەن اقپارات تاراپ جاتىر. سەبەبى, فۋتبولشىلىق عۇمىرىڭىزدا ءدال وسى «جارقاناتتاردىڭ» ساپىندا كوبىرەك ونەر كورسەتكەن ەدىڭىز. وسى رەتتە كوپشىلىك «ۆيلياررەالدى» سول ماقساتقا جەتۋ جولىنداعى باسپالداق رەتىندە قاراستىرىپ وتىر دەگەن وي قالادى.
- شىنى كەرەك, «ۆالەنسياعا» قاتىستى اقپارات تاراپ جاتقانىن ماقتان تۇتامىن. بىراق «ۆيلياررەالدا» قىزمەت ەتىپ جۇرگەنىمە قۋانامىن. ەشقايدا كەتۋ ويىمدا جوق, وسى جەردە قالامىن. جوسپارىمنىڭ ءبارى «ۆيلياررەالمەن» بايلانىستى.
- ەگەر ماتچ تەڭ اياقتالسا نەمەسە «استانا» جەڭىسكە جەتسە, بۇل سىزدەرگە قانشالىقتى اۋىر سوعادى؟
- ءبىز «استانانىڭ» بىرنەشە ويىنىن كوردىك. ولاردى جاقسى بىلەمىز, قالاي وينايتىن بايقادىق. ءبىز جەڭىلىس تۋرالى مۇلدەم ويلامايمىز. ەرتەڭ جىگىتتەر بار كۇشتەرىن سالىپ, جوسپاردى تولىعىمەن ورىندايدى دەپ ۇمىتتەنەمىن. قالايدا جەڭىسكە جەتۋىمىز كەرەك.
- كومانداڭىزدان جىلدام گولدى كۇتۋگە بولا ما؟
- ارينە, ءبىز ماتچتى العاشقى جارتى ساعاتتا عانا ەمەس تولىعىمەن جوعارى دەڭگەيدە وتكىزۋىمىز كەرەك. سوڭعى ەكى ويىندى وتە ناشار وتكىزگەندىكتەن «استاناعا» قارسى بار كۇش-جىگەرىمىزدى سالامىز. بىزگە تەك قانا جەڭىس كەرەك.
- جەرەبە تارتىلعاننان كەيىن توبىمىزداعى بارلىق كوماندالاردىڭ وكىلدەرى ءسىزدى فاۆوريت ەسەبىندە قاراستىرىپ وتىر. بۇل سىزدەرگە ارتىق قىسىم بولىپ ەسەپتەلمەي مە؟
- راس, ءبارى ءبىزدى جەڭەدى دەپ ويلايدى. بىراق قارسىلاستارىمىز وڭاي ەمەس, دەڭگەيلەرى جوعارى. فاۆوريت ەكەنىمىزگە ءمان بەرمەيمىز. ءوز جۇمىسىمىزدى تولىعىمەن اتقارىپ, جانكۇيەرلەرىمىزدىڭ ءۇمىتىن اقتاۋىمىز كەرەك.
- سوڭعى ويىنداردىڭ ناتيجەسىنەن كەيىن ءسىزدى قاتتى سىناعاندار بولدى. وسىنداي ءتۇرلى تەرىس پىكىرلەر ءسىزدى جىگەرلەندىرە تۇسپەي مە؟
- ول راس, سوڭعى ەكى ويىنىمىز ءبىز كۇتكەندەي بولمادى. جەڭىلىسكە تەك قانا باپكەردى كىنالى ەتۋ قالىپتى جاعداي. ءبىز ەۋروپا ليگاسىندا دا, يسپانيا چەمپيوناتىندا دا جەڭىسكە جەتكىمىز كەلەدى. ال ەڭ باستىسى – جوعارى دەڭگەيدە ونەر كورسەتۋ.
ايتا كەتەيىك, «ۆيلياررەال» - «استانا» اراسىنداعى ماتچ 14 قىركۇيەك كۇنى ۆيلياررەال قالاسىندا 23:00-دە (استانا ۋاقىتى بويىنشا) باستالادى.
ايان ءابدۋالي,
«ەگەمەن قازاقستان»
