وقۋ-جاتتىعۋ بارىسىندا شىمكەنت قالاسىندا جالپى قالالىق سەيسمو جاتتىعۋ, پراكتيكالىق تۇردە شاتىرلى قالاشىقتى جايۋ ءىس-شاراسى وتكىزىلدى, دەپ حابارلايدى وقو اكىمدىگىنىڭ ءباسپاسوز قىزمەتى.
بۇگىن وبلىستا باستالعان وقۋ-جاتتىعۋدىڭ اياسىندا وبلىس اكىمدىگىندە وڭتۇستىك قازاقستان وبلىسىنىڭ اكىمى جانسەيىت تۇيمەباەۆتىڭ توراعالىعىمەن ارنايى جيىن ءوتتى. ماجىلىسكە قازاقستان رەسپۋبليكاسىنىڭ ورتالىق اتقارۋشى ورگاندارىنىڭ, ۇلتتىق ۇلان باس قولباسشىلىعىنىڭ وكىلدەرى مەن جەدەل توپ مۇشەلەرى قاتىستى.
جيىندا ءتيىستى سالا جەتەكشىلەرىنە شتابتىق ماشىقتانۋدى جۇرگىزۋ كەزىندە اتقارىلاتىن جۇمىستار بويىنشا مىندەتتەر بەلگىلەنىپ بەرىلدى. توتەنشە جاعداي ورىن العاندا زارداپ شەككەن جانە باسپاناسىز قالعان حالىقتى قابىلداۋ ءۇشىن جاسالعان شاتىرلى قالاشىقتىڭ دايىندىعىمەن بۇگىن وبلىس اكىمى ج.تۇيمەباەۆ ارنايى بارىپ تانىستى.
قالاشىقتىڭ جۇمىسىمەن تانىسۋ بارىسىندا اكىم شىمكەنت قالاسى 7 باللدىق كۇشى بار جەر سىلكىنىسى بولۋى مۇمكىن جوعارى سەيسميكالىق بەلسەندى ايماقتا ورنالاسقانىن ايتىپ, شاتىرلى قالاشىق تۇرعىنداردىڭ قاۋىپسىزدىگى ءۇشىن اسا قاجەت ەكەنىن جەتكىزدى.
شاتىرلى قالاشىقتىڭ قۇرىلىمىنا قالا اكىمشىلىگى, قابىلداۋ پۋنكتى, تىركەۋ ورنى, اقپارات پەن بايلانىس پۋنكتى جانە پوشتا-تەلەگراف كىرەدى. بۇل قالاشىقتىڭ اكىمدىگى جەرگىلىكتى اتقارۋشى ورگانداردىڭ لاۋازىمدى تۇلعالارىنان قۇرالاتىن بولادى. شاتىرلى قالاشىقتا تۇرعىندار سۋىق مەزگىلدە تۇرعىن ورىنمەن, تاعاممەن, سۋمەن, جىلى كيىممەن قامتاماسىز ەتىلەدى. سونىمەن قوسا, مەديتسينالىق, قوعامدىق ءتارتىپتى قورعاۋ, ورتكە قارسى كولىك قۇرالدارىمەن قامتاماسىز ەتىلەدى. جالپى, شاتىرلى قالاشىقتا 100 مىڭنان استام ادامدى ۋاقىتشا ورنالاستىرۋعا بولادى.
