«پاۆلودار-الماتى» باعىتىندا جۇرەتىن 31/32 پويىزىنىڭ ورنىنا جاڭا زاماناۋي «تۇلپار-تالگو» جشس-ءنىڭ ۆاگوندارى جولعا شىعادى. بۇل تۋرالى وبلىس اكىمدىگىندە وتكەن جيىن بارىسىندا «جولاۋشىلار تاسىمالى» اق-نىڭ ۆيتسە-پرەزيدەنتى ايبات كانگاليەۆ حابارلادى.
ونىڭ ايتۋىنشا, جاڭا ۆاگوندار بەينەباقىلاۋ, Wi-Fi, GPS قۇرالدارىمەن, تەلەەكراندارمەن جانە بيودارەتحانالارمەن جابدىقتالادى.
– 26 ۆاگوننان تۇراتىن بۇل پويىزداردىڭ جىلدامدىعى ساعاتىنا 200 كيلومەت, - دەيدى ايبات كانگاليەۆ. - بۇل جول ۋاقىتىن 3,5 ساعاتقا, ناقتىراق ايتساق, 28 ساعات 32 مينۋتتان 25 ساعات 6 مينۋتقا دەيىن قىسقارتادى. تەمىر جولمەن ساپارعا شىققاندارعا «ەكسپرەسس» ۇيىمىنىڭ 254 قىزمەتكەرى قىزمەت كورسەتەدى. جۋىق ارادا پاۆلودار ستانتسياسىندا فيليالى اشىلادى. ايتا كەتەيىك, پويىزدىڭ جولداعى بارلىق 19 ستانتسياسى, بيلەت قۇنى وزگەرىسسىز قالادى, قايتا وتىرىپ باراتىن ورىندار باعاسى ارزاندايدى. جولاۋشىلار سانى 400-دەن 480-گە دەيىن جەتەدى. تەمپەراتۋراسى -50 گرادۋستان +45 گرادۋسقا دەيىن جۇمىس ىستەي بەرەدى. ۆاگونداردىڭ جارامدىلىعى - 40 جىل. ەلىمىزدىڭ جولاۋشىلارىنىڭ كوڭىلىنەن شىعادى دەگەن سەنىمدەمىن.
بۇدان بولەك, «تۇلپار-تالگو» ۆاگوندارىندا مەيرامحانا, بار, جۇك ۆاگونى, مۇمكىندىگى شەكتەۋلى جاندارعا ارنالعان ۆاگون مەن ارنايى كوتەرۋ قۇرالدارى بار. ءوز كەزەگىندە پاۆلودار وبلىسى اكىمىنىڭ ورىنباسارى دۇيسەنباي تۇرعانوۆ قىزمەت ساپاسىنا ريزا ەكەندىگىن ايتىپ, 2018 جىلدىڭ قاڭتار ايىندا «پاۆلودار - الماتى» باعىتىنداعى جاڭا پويىزدىڭ جولعا شىعۋىن سالتاناتتى تۇردە اتاپ ءوتۋ كەرەكتىگىن ايتتى.
