مۇنداي كەلىسىمگە تۇرىك بيزنەس–قۇرىلىمدارىنىڭ جەتەكشىلەرى باستاعان دەلەگاتسيانىڭ استانا قالاسىنا جاساعان جۇمىس ساپارى كەزىندە قول جەتكىزىلىپ وتىر.
قازاقستانعا جاساعان ساپارى كەزىندە ەلوردامىز - استانادا «وڭتۇستىك» يندۋستريالدى ايماقتاردىڭ باسقارۋشى كومپانياسى مەن تۇركيالىق بيزنەسمەندەر اراسىندا قۇنى 12 ملن اقش دوللارى بولاتىن ينۆەستيتسيالىق ەكى قۇجاتقا قول قويىلدى.
كۇنگەيدەگى قازاق-تۇرىك يندۋستريالدى ايماعىندا وسى جىلى ىسكە اسىرىلاتىن جوبانىڭ ءبىرى - قورعاسىن كونتسەنتراتىن وندىرەتىن تۇركيالىق Merkez Asia Madencilik كومپانياسىنىڭ زاۋىتى (قۇنى 2 ملن اقش دوللارى) بولسا, ەكىنشىسى - قۇنى 10 ملن. اقش دوللارى بولاتىن Petronet Otomosyon كومپانياسىنىڭ جانار-جاعارماي تاراتۋ كولونكالارىن شىعاراتىن زاۋىتى.
بۇگىندە اۋماعى 50 گەكتاردى الىپ جاتقان «قازاق-تۇرىك» يندۋستريالدى ايماعىندا جالپى قۇنى 37,5 ملن اقش دوللارىن قۇرايتىن 8 جوبا جۇزەگە اسىرىلۋدا. اتالعان جوبالار ىسكە قوسىلعاندا جاڭا 900 جۇمىس ورنى قۇرىلادى دەپ جوسپارلانۋدا.
ايتا كەتەيىك, جىل سوڭىنا دەيىن اتالعان يندۋستيالدى ايماقتا «Gold Aluminum» جشس-ءنىڭ پۆح پروفيلدەرى مەن پۆح جانە اليۋمينيدەن جاسالعان ءمولدىر كونسترۋكتسيالاردى وندىرەتىن شاعىن تسەحى ىسكە قوسىلادى.
ەسكە سالساق, 9 قىركۇيەك كۇنى قازاقستان رەسپۋبليكاسىنىڭ پرەمەر-ءمينيسترى باقىتجان ساعىنتاەۆتىڭ تۇركيانىڭ بيزنەس قۇرىلىمدارىنىڭ وكىلدەرىمەن كەزدەسۋى وتكەن بولاتىن.
