– بۇل دەگەنىمىز اۋداندا ءتۇسىندىرۋ جۇمىستارى باسەڭ ءجۇرىپ جاتقانىن كورسەتەدى, – دەدى وبلىس اكىمى ەرلان قوشانوۆ. – ادامدارعا مەملەكەتتىك قولداۋدى قالاي الۋعا بولاتىنىن, قانداي مەحانيزمدەر بار ەكەنىن دۇرىستاپ ءتۇسىندىرۋ قاجەت. اۋداندى دامىتۋ كەرەك. مەن بۇگىن جەرگىلىكتى حالىقتىڭ جاعدايى جاقسى ەكەنىنە كوزىم جەتتى. الايدا ونىمەن توقتاپ قالۋ دۇرىس ەمەس, ءارى قاراي دامۋ قاجەت. سىزدەردىڭ مۇمكىندىكتەرىڭىز دە, جەرلەرىڭىز دە مول. سوندىقتان جۇمىس ىستەڭىزدەر. ءبىز بولساق ءوز تاراپىمىزدان كومەك كورسەتۋگە دايىنبىز.
ايماق باسشىسى ءوزىنىڭ ورىنباسارلارىنا اقتوعاي اۋدانىنىڭ دامۋ باعدارلاماسىنىڭ جۇزەگە اسىرىلۋىن ءجىتى نازارعا الۋدى تاپسىردى.
سونىمەن قاتار, ە.قوشانوۆ جۇمىس ساپارى بارىسىندا اقتوعاي اۋدانىنداعى ەكوتۋريزمنىڭ دامۋىمەن تانىستى. ايماق باسشىسى بيىلعى جىلى 50-گە جۋىق شەتەل ازاماتتارىن قارسى العان «سۇلۋ تاس» قوناقۇيىندە بولدى.
شابانباي بي اۋىلىنىڭ تۇرعىنى اسقار مۇراتوۆ وسىدان ءۇش جىل بۇرىن 10 ادامعا شاقتالعان ۇلتتىق ناقىشتاعى قوناقۇي اشقان. تۋريستىك جوبا «جۇمىسپەن قامتۋدىڭ جول كارتاسى-2020» باعدارلاماسى بويىنشا قولداۋ العان.
– قازىر شەتەلدىك تۋريستەر كەرەمەت قوناقۇيلەردە توقتاعىلارى كەلمەيدى. ولار ءبىزدىڭ تۇرمىسىمىزعا قىزىعۋشىلىق تانىتادى, ءبىزدىڭ تابيعاتىمىزعا تاڭ قالادى. شەتەلدىكتەرگە قازاقتىڭ تاعامدارى وتە ۇنايدى. ءبىز ولاردى حالقىمىزدىڭ بولمىسىمەن, مادەنيەتىمەن جانە داستۇرلەرىمەن تانىستىرۋعا تىرىسامىز, – دەيدى قوناقۇي قوجايىنى.
نيەت بىلدىرگەندەر كيىز ۇيگە دە جاتا الادى. قوناقتارعا ارنالعان اس ءمازىرى تولىقتاي ەكولوگيالىق تازا ۇلتتىق تاعامداردان قۇرالعان.
اۋىل كاسىپكەرى بيىلعى جىلى «Nomadic Travel Kazakhstan» تۋريستىك كومپانياسىمەن كەلىسىمشارتقا وتىرعان.
– بۇل «تۋعان جەر» مەملەكەتتىك باعدارلاماسىنىڭ جۇزەگە اسىرىلىپ جاتقانىنىڭ ءبىر مىسالى, – دەپ اتاپ ءوتتى ەرلان قوشانوۆ. – وسىنداي كاسىپكەرلىكتى دامىتىپ, وعان قاجەتتى كومەك كورسەتۋ كەرەك.
شابانباي بي اۋىلىنان 3 شاقىرىم قاشىقتىقتا تاۋ باۋرايىندا «اراي» دەمالىس لاگەرى ورنالاسقان. قازىرگى تاڭدا ول قايتا قالىپقا كەلتىرۋدى قاجەت ەتەدى. وبلىس اكىمى ءوزىنىڭ ورىنباسارلارى مەن باسقارما باسشىلارىنا بۇل ماسەلەنى قاراستىرۋدى تاپسىردى.
جەرگىلىكتى اقساقالدار بولسا ايماق باسشىسىنان جولداردى جوندەپ, شابانباي جانە قىزىلاراي اۋىلدارىنا قاتىنايتىن كولىكتى رەتتەۋلەرىن ءوتىندى. بيىلعى جىلى اقتوعاي اۋدانىندا جالپى ۇزىندىعى 396 شاقىرىمدى قۇرايتىن وبلىستىق ماڭىزى بار جولدار جوندەلەدى. بۇل باعىتقا 77,9 ملن تەڭگە بولىنگەن.
ال قىزىلاراي اۋىلىنا اۆتوبۋس جۇرگىزۋ ماسەلەسىن ەرلان قوشانوۆ جولاۋشى تاسىمالداۋشى مەكەمەلەردىڭ باسشىلارىمەن شەشۋدى تاپسىردى.
ميراس اسان,
«ەگەمەن قازاقستان»
قاراعاندى وبلىسى,
اقتوعاي اۋدانى
