ء«بىز كحدر قاۋىپسىزدىك كەڭەسىنىڭ شەشىمدەرىن تۇبەگەيلى بۇزا وتىرىپ, ەلىمىزگە جانە ونىڭ باسشىلىعىنا ەلەۋلى سالدارعا اكەلەتىنىن وكىنىشپەن اتاپ وتەمىز», - دەپ مالىمدەدى قازاقستاننىڭ بۇۇ جانىنداعى تۇراقتى وكىلى قايرات وماروۆ. ول پحەنياننىڭ جاھاندىق ۇندەۋدى ەستىپ, ەستىلىك پەن ديالوگ جولىن تاڭدايتىنىنا ءۇمىت ءبىلدىردى.
«جەتىلدىرىلگەن بالليستيكالىق زىمىرانداردى ۇشىرۋ سەرياسىنان كەيىن كحدر عالامشاردى ءوزىنىڭ سۇمدىق يادرولىق سىناقتارىمەن سولقىلداتتى. سولتۇستىك كورەيانىڭ جاۋاپسىز ساياساتى يادرولىق قارۋدى تاراتپاۋ جونىندەگى جاھاندىق ۇدەرىسكە كەسىرىن تيگىزىپ, عالامشاردىڭ يادرولىق قارۋسىز بولاشاعىن قامتاماسىز ەتۋ بويىنشا ۇجىمدىق ۇلەستەرگە نۇقستان كەلتىرەدى»,- دەپ اتاپ ءوتىلدى مالىمدەمەدە. قازاقستان يادرولىق سىناقتاردىڭ سالدارىنان شىنداپ زارداپ شەككەن ەل رەتىندە وسىنداي ورەسكەل ارەكەتتەرگە قارسىلىعىن ءبىلدىرىپ, ءححى عاسىردا يادرولىق سىناقتار ءۇشىن ورىن بولماۋى ءتيىس ەكەنىندىگىنە ءوزىنىڭ بەرىك سەنىمىن بىلدىرەدى. ءوزىنىڭ تۇبەگەيلى ۇستانىمىنا سۇيەنە وتىرىپ, الەم سولتۇستىك كورەيانىڭ يادرولىق باعدارلاماسىن قابىلدامايتىنىن پحەنيانعا ەسىنە تۇسىرەدى دەگەن ۇمىتتە, قازاقستان جاڭا قارارعا قولداۋ كورسەتتى.
2375 (2017) قارار سولتۇستىك كورەيالىق توقىما بۇيىمدارىن ساتىپ الۋعا, وعان گاز كوندەنساتىن ساتۋعا تولىق تىيىم سالادى, سونداي-اق سولتۇستىك كورەيانىڭ پورتتارىنا كىرەتىن جانە پورتتاردان شىعاتىن جۇك كەمەلەرىن تەكسەرۋدى كوزدەيدى. بۇدان باسقا, سانكتسيالار تۋرالى قۇجات كحدر-عا مۇناي ونىمدەرىن جەتكىزۋگە شەكتەۋ قويدى – وسى جىلدىڭ اياعىنا دەيىن 500 مىڭ باررەلدەن جانە 2018 جىلدىڭ قاڭتارىنان باستاپ جىلىنا 2 ملن. باررەلدەن اسپاۋى ءتيىس. بۇرىنعى سانكتسيالارمەن بىرگە قابىلدانعان شارالار ءدال قازىر سولتۇستىك كورەيانىڭ ەكسپورتىن 90%-كە دەيىن تومەندەتۋگە باعىتتالعان جانە ءوزىنىڭ يادرولىق باعدارلاماسىن دامىتۋدى جالعاستىرۋ ءۇشىن ەلدىڭ قارجى مۇمكىندىكتەرىن شىنداپ شەكتەيدى.
قاۋىپسىزدىك كەڭەسىنىڭ مۇشەلەرى سانكتسيالاردى كۇشەيتۋمەن قاتار, كورەي تۇبەگىندەگى بەيبىتشىلىك پەن تۇراقتىلىقتى ساقتاۋدىڭ ماڭىزدىلىعىن راستاپ, جاعدايدى بەيبىت جانە جان-جاقتى رەتتەۋدىڭ ساياسي جانە ديپلوماتيالىق ادىستەرىنە بەيىلدىلىگىن ءبىلدىردى.
يادرولىق قارۋدان ازات الەمگە قول جەتكىزۋ – بيىلعى قاڭتار ايىندا قازاقستان پرەزيدەنتى نۇرسۇلتان نازارباەۆتىڭ بۇۇ قاۋىپسىزدىك كەڭەسىنە ساياسي ۇندەۋىندە جاريالانعان ءبىرىنشى باسىمدىق بولىپ تابىلادى. «سونىمەن قاتار, بۇل تۇرعىدا وسى ماسەلە بويىنشا كوپجاقتى كەلىسسوزدەر ۇدەرىسىن دەرەۋ قالپىنا كەلتىرۋىن قولداپ, كورەي تۇبەگىندەگى يادرولىق قارۋ ماسەلەسىن جەدەل جانە سىندارلى شەشۋدى قازاقستان رەسپۋبليكاسى ماڭىزدى مىندەت دەپ سانايدى. ەڭ دۇرىسى – قازاقستان بۇۇ-عا مۇشە-مەملەكەتتەردىڭ بارلىعىن, اسىرەسە قاۋىپسىزدىك كەڭەسىنىڭ تۇراقتى مۇشەلەرىن, 2045 جىلى بۇۇ-نىڭ 100-جىلدىعىنا دەيىن الەمدى يادرولىق قارۋدان ارىلتۋعا شاقىرادى»,- دەپ مەملەكەت باسشىسىنىڭ قاڭتارداعى ۇندەۋىندە اتاپ وتىلگەن ەدى.
