«ۇلبيكە»

پرەزيدەنتتىك مادەنيەت ورتالىعىنىڭ ۇلتتىق داستۇرلەر تەاترى جاڭا ماۋسىمدى وسى قويىلىممەن اشتى پرەزيدەنتتىك مادەنيەت ورتا­لىعىنىڭ ۇلتتىق داستۇرلەر تەات­رى جاڭا ماۋسىم شىمىل­دى­عىن «ۇلبيكە» مۋزىكالىق قويى­لىمىمەن اشتى. كورنەكتى مەملەكەت جانە قو­عام قايراتكەرى, پروفەسسور مىر­زاتاي جولداسبەكوۆ پەن بەلگىلى اقىن نەسىپبەك ايت ۇلىنىڭ اتال­مىش تۋىندىسىن ساحناعا قويعان رەجيسسەر ساۋلەبەك اسىلحان ۇلى, ال كومپوزيتورى التىنبەك قو­راز­باەۆ ەكەنىن ءبىز بۇرىن دا ايتقان بولاتىنبىز. بۇل كۇندە كورەرمەننىڭ ىستىق ىقىلاسىنا بولەنىپ كەلە جاتقان بۇل قويى­لىم XIX عاسىردا ءومىر سۇرگەن قا­زاقتىڭ اياۋلى اقىن قىزى ۇلبيكە جانكەلدىقىزىنىڭ قاي­عى­لى تاعدىرىن سۋرەتتەيدى. اتى ايتىپ تۇرعانداي, مۋزىكالى دراما بولعاندىقتان, مۇندا كوبىنە انگە كەزەك بەرىلۋىنىڭ ءوزى وتە ءساتتى شەشىم بولعاندىعىن تاعى دا ءبىر ايتا كەتسەك, ارتىق بولماس. قويىلىمداعى ۇلبيكەنىڭ قو­ساعى تويتاننىڭ وسپادارسىز قى­لىقتارى وكىنىشكە وراي, زا­مان­داستارىمىزدىڭ بويىنان قا­زىر دە قىلاڭ بەرىپ قالاتىن­دىعىن رەجيسسەر شەبەر كورسەتە بىلگەن. ءيا, ساحناداعى ۇلتتىق كيىم ءۇل­گىلەرى مەن اۋەلەتە شىر­قالعان حالىق اندەرى ۇلتتىق داستۇرلەر تەاترىنىڭ اتىنا زا­تى ساي ەكەنىن ايعاقتاي تۇسەتىن­دەي دەسەك, بۇل قويىلىمدا حا­لىق ءانى «اق­بايان» اۋەنىمەن ىر­عا­لا باسىپ ساح­ناعا اققۋداي قال­قىعان ارۋ­لار­دىڭ شىعۋى رەجيسسەرلىك ءسات­تى ىزدەنىستىڭ ءبىرى بول­عانى انىق. ەندىگى تۇستا اكتەرلىك شەبەرلىك جايىندا وي قوزعايتىن بول­ساق, اقىن قىزدىڭ بەينەسى كەنەن ازىرباەۆ اتىنداعى كونكۋرستىڭ لاۋرەاتى جازگۇل داڭىلباەۆا­نىڭ ورىنداۋىندا ءبىرشاما ءساتتى شىقتى دەۋگە بولادى. ال ونىڭ كۇيەۋى تويتاندى قازاقستاننىڭ ەڭبەك سىڭىرگەن قايراتكەرى اقىش وماروۆتىڭ, «اكەم ءبىر كۇيەۋ بولعان جەر, انام ءبىر كەلىن بول­عان جەر...» دەپ تەبىرەنگەن كۇدەرى قوجانى جانقالدىبەك تولەن­با­ەۆتىڭ بەينەلەۋى دە قويىلىم اسەرىن ارتتىرا تۇسكەنى انىق. بۇل قويىلىمنىڭ ۇناعانى سونشالىق, شىمىلدىق جابىل­عان­نان كەيىن دە جۇرت ۇيىنە قاي­تۋعا اسىقپادى. سول كوڭىل كۇيدى جازباي تانىعان پرەزيدەنتتىك مادەنيەت ورتالىعىنىڭ ديرەك­تو­رى مىرزاتاي جولداسبەكوۆ جۇرت الدىنا شىعىپ, ورتالىقتىڭ قو­يىلىمدارى مەن كەشتەرىنە ۇدا­يى كەلىپ تۇراتىن زەردەلى كورەر­مەنگە العىس ايتتى. ودان ءارى ول دراما اۆتورىنىڭ ءبىرى رەتىندە ۇلبيكە اقىننىڭ قايعىلى تاع­دىرىنا ءبىرشاما توقتالىپ ءوتتى. ياعني, نەبارى 24 جاسىندا كەزەكتى ءبىر ايتىستان ورالعان اقىن قىز­دى كۇيەۋى تويتان سوققىنىڭ اس­تى­نا الىپ, ونىڭ ارتى الگىن­دەي قايعىمەن اياقتالعانىن كورەرمەن ەسىنە تاعى ءبىر سالىپ ءوتتى. سو­نىمەن قاتار ول ءماشھۇر ءجۇسىپ كوپەەۆتىڭ دەرەكتەرىن نەگىزگە الا وتىرىپ, قۇن سۇراۋ داستۇرىنە ءساي­كەس, ايەل زاتىنا وتەماقى بۇ­عان دەيىن بولماعان باعادا ۇل­بيكەگە تولەنگەنىن تىلگە تيەك ەتتى. اتقارىلعان اۋقىمدى جۇمىس­تار لەگىن حالىققا جەتكىزۋ ءۇشىن جۇمىس جاسايتىن باق وكىلدە­رىنىڭ تيگىزەر كومەگىنىڭ كولدەي ەكەنىن دە ورتالىق باسشىسى نازاردان تىس قالدىرمادى. ورتالىق ديرەكتورىنىڭ اي­تۋىنشا, «ۇلبيكە» مۋزىكالىق دراماسىمەن اشىلعان ۇلتتىق داستۇرلەر تەاترى الداعى ۋاقىت­تا كورەرمەنىن وزگە دە تىڭ تۋ­ىندىلارمەن قاۋىشتىرۋدى كوز­دەپ وتىرعان كورىنەدى. ءابدىراحمان قىدىربەك, سۋرەتتەردى تۇسىرگەن سالتانات قوجانوۆا.