مادەنيەت جانە سپورت ءمينيسترى ارىستانبەك مۇحامەدي ۇلى 2016 جىلدىڭ قورىتىندىسى بويىنشا ءتورت ملن استام ادامدى نەمەسە حالىقتىڭ 27,4% دەنە شىنىقتىرۋمەن جانە سپورتپەن اينالىسۋمەن قامتۋ قامتاماسىز ەتىلگەنىن باياندادى. ءۇش جىل ىشىندە بۇل كورسەتكىش 2,3% وسكەن. بۇل تۇستا جۇيەلى اينالىساتىن بالالار مەن جاسوسپىرىمدەر ۇلەسى 15,3% قۇرايدى. بۇگىندە جوو-لاردىڭ ستۋدەنتتەرىنىڭ 20%, كوللەدجدەردە - 30% سپورتقا تارتىلعان.
سپورتپەن شۇعىلداناتىن مۇگەدەكتەر ءۇشىن جاعدايلار جاسالۋدا. 2009 جىلدان بەرى سپورتپەن شۇعىلدانۋشىلاردى قامتۋ 4%-دان 10,2% دەيىن ارتقان.
ۇلتتىق سپورت تۇرلەرىمەن اينالىساتىندار ۇلەسى 2013 جىلعى 5,9%-دان 2016 جىلى 7,7% دەيىن ارتتى. ۇلتتىق سپورت تۇرلەرى بويىنشا بۇگىندە ەلىمىزدە 7 ارنايى سپورت كلۋبىمەن استانادا ۇلتتىق جانە ات سپورتى تۇرلەرى ورتالىعى جۇمىس ىستەيدى.
«قازاقستان بارىسى» جوباسى ءبىزدىڭ ۇلتتىق سپورتتىق برەندىمىزگە اينالىپ ۇلگەردى, «ەۋرازيا بارىسى» جانە «الەم بارىسى» تۋرنيرلەرىن ۇيىمداستىرۋ ارقىلى ول حالىقارالىق دەڭگەيگە شىقتى. وسىنىڭ ارقاسىندا اۋىلدارداعى بالالار مەن جاستار قازاق كۇرەسى سەكتسيالارىنا بەلسەنە قاتىسۋدا. ماتەريالدىق ەمەس مادەني مۇرانى قورعاۋ بويىنشا يۋنەسكو-نىڭ ۇكىمەتارالىق كوميتەتىنىڭ XI سەسسياسىنىڭ قورىتىندىسى بويىنشا قازاق كۇرەسى يۋنەسكو-نىڭ ادامزاتتىڭ ماتەريالدىق ەمەس مادەني مۇراسىنىڭ رەپرەزەنتاتيۆتى تىزىمىنە ەنگىزىلدى»,— دەپ اتاپ ءوتتى ا. مۇحامەدي ۇلى.
بۇقارالىق سپورتتىڭ ماڭىزدى قۇراۋىشى پرەزيدەنتتىك تەستىلەر بولىپ تابىلادى. جىل سايىن ولارعا ءتورت ميلليوننان استام ادام قاتىسادى.
ەلىمىزدە 11,1 مىڭ سپورت قۇرىلىمدارى بار, 2015 جىلمەن سالىستىرعاندا ولاردىڭ سانى 4% ارتقان. 2017 جىلدىڭ باسىنان بەرى ايماقتاردا جەرگىلىكتى بيۋدجەت پەن دەمەۋشىلەر قاراجاتىنىڭ ەسەبىنەن 11 دەنە شىنىقتىرۋ-ساۋىقتىرۋ كەشەنىنىڭ قۇرىلىسى اياقتالدى. تاعى ءتورت وبلىستا دەنە شىنىقتىرۋ-ساۋىقتىرۋ كەشەنىنىڭ قۇرىلىسىن اياقتاۋ جوسپارلانىپ وتىر.
قر پرەمەر-ءمينيسترى ەلىمىزدىڭ كەيبىر مەكتەپتەرىندە سپورتتىق قۇرال-جابدىقتارمەن قامتاماسىز ەتۋ ماسەلەسى بار ەكەنىن اتاپ ءوتتى, وسىعان بايلانىستى ايماقتاردىڭ اكىمدەرىنە بۇل ماسەلەنى باقىلاۋعا الۋ تاپسىرىلدى. سونىمەن قاتار بىرقاتار مەكتەپتەردىڭ سپورت زالدارى جوق, باقىتجان ساعىنتاەۆتىڭ ايتۋىنشا, بۇل ماسەلەگە دە بارىنشا نازار اۋدارىپ, بالالاردى سپورتقا تارتۋدا كەشەندى ءتاسىلدى ەنگىزۋ كەرەك.
