اۋىل شارۋاشىلىعى ءبىرىنشى ۆيتسە-ءمينيسترى قايرات ايتۋعانوۆ قازىرگى ۋاقىتتا بارلىق وڭىرلەردە استىق جيناۋ جۇمىستارى جۇرگىزىلىپ جاتقانىن باياندادى. 12 قىركۇيەكتەگى جاعداي بويىنشا 11,6 ملن گا استىق جينالدى, ورتاشا 12,6 تس/گا تۇسىمدىلىكپەن 14,7 ملن توننا استىق باستىرىلدى. استىق جيناۋ قارقىندارى وتكەن جىلدىڭ دەڭگەيىنەن 2,5 ملن گا نەمەسە 16% ارتىق.
جالپى قازاقستان بويىنشا ءداندى داقىلدار القاپتارىنىڭ 76,7% جينالدى. نەگىزگى ەگىن ەگەتىن وڭىرلەردە: اقمولا وبلىسىندا — 3,5 ملن توننا, سولتۇستىك قازاقستان وبلىسىندا — 3,3 ملن توننا, قوستاناي وبلىسىندا — 3,8 ملن توننا استىق جينالدى.
وڭتۇستىك قازاقستان, جامبىل جانە باتىس قازاقستان وبلىستارىندا ماساقتى ءداندى داقىلداردى جيناۋ اياقتالدى, 1,4 ملن توننا جينالدى, بۇل وتكەن جىلدىڭ دەڭگەيىنەن 3,5% ارتىق.
ارپا جيناۋ اياقتالىپ قالدى – بۇگىنگى تاڭدا 1,8 ملن گا نەمەسە القاپتاردىڭ 86%, 2,7 ملن توننا جينالدى. مايلى داقىلدار بويىنشا استىق جيناۋ القاپتارىنىڭ شامامەن 24% جينالدى, بۇل وتكەن جىلدىڭ دەڭگەيىنەن 10% ارتىق, 1,2 ملن توننا باستىرىلدى. الماتى, جامبىل جانە وڭتۇستىك قازاقستان وبلىستارىندا كوكونىس-باقشا داقىلدارىن جيناۋ جالعاسۋدا, 76% جينالدى, 3,1 ملن توننا كوكونىس-باقشا داقىلدارى جينالدى, بۇل وتكەن جىلدىڭ سايكەس دەڭگەيىنەن 13% ارتىق.
استىق جيناۋ جۇمىستارىن ۇيىمداستىرىلعان تۇردە جۇرگىزۋ ءۇشىن وڭىرلەر ارزانداتىلعان ديزەل وتىنىنىڭ قاجەتتى كولەمىمەن قامتاماسىز ەتىلگەن. بارلىق قابىلداۋ پۋنكتتەرى جاڭا ءتۇسىم استىعىن قابىلداۋعا دايىن.
سونداي-اق, اعىمداعى جىلى استىق قويمالارىنىڭ رەيتينگىن انىقتاۋ جانە تاعايىنداۋ ادىستەمەسى ەنگىزىلدى. بيىلدان باستاپ ازىق-ت ۇلىك كورپوراتسياسى سەنىمسىز رەيتينگكە يە استىق قابىلداۋ كاسىپورىندارىمەن جۇمىس جاساۋدى دوعارادى.
بۇدان وزگە, استىق ساپاسىن ارتتىرۋ ءۇشىن اعىمداعى جىلى تۇقىم شارۋاشىلىعىن قولداۋ جانە مينەرالدى تىڭايتقىشتاردى قولدانۋ بويىنشا قاجەتتى شارالار قابىلداندى. سونىڭ ارقاسىندا 3-ءشى سىنىپتى استىق ۇلەسى 76% قۇرايدى, ال وتكەن جىلى بۇل كورسەتكىش 44% قۇرادى, 25 جانە ودان جوعارى جەلىمشەمەن — 47%, وتكەن جىلى بۇل ءمان 9% قۇرادى.
وسىلايشا, بۋنكەرلىك سالماقتاعى جالپى ەگىن جيناۋ 19,5 ملن توننانى قۇرايدى. ال نەگىزگى ەگىن ەگەتىن ءۇش ءوڭىر بويىنشا شامامەن 15 ملن توننا جيناۋ جوسپارلانعان. كۇتىلەتىن ساپانى ەسكەرە وتىرىپ, اتالعان كولەمدەر استىقتىڭ ەكسپورتتىق الەۋەتىن 8 ملن تونناعا دەيىن جەتكىزۋگە مۇمكىندىك بەرەدى.
سونداي-اق, وڭىرلەردەگى استىق جيناۋ ناۋقانىنىڭ اعىمداعى جاعدايى تۋرالى اقمولا وبلىسىنىڭ اكىمى مالىك مىرزالين, سولتۇستىك قازاقستان وبلىسىنىڭ اكىمى قۇمار اقساقالوۆ, قوستاناي وبلىسى اكىمىنىڭ ءبىرىنشى ورىنباسارى گاۋەز نۇرمۇحامبەتوۆ باياندادى.
