سارسەن امانجولوۆ اتىنداعى شىعىس قازاقستان مەملەكەتتىك ۋنيۆەرسيتەتىنىڭ عالىمدارى جۋىقتا سەنساتسيا دەۋگە تۇرارلىق جاڭالىقتارىن جۇرتشىلىققا جاريا ەتتى. ولاردىڭ سوزىنە سەنسەك, ميلليونداعان جىل بۇرىن ءۇلبى وزەنى بولماعان, بۇل القاپتى التاي تەڭىزى الىپ جاتقان كورىنەدى.
«مۇندا تەڭىزدىڭ بولعانىنا ناق وسى تارحان رازرەزى دالەل. ول شامامەن وسىدان 300-400 ميلليون جىل بۇرىنعى جوعارعى دەۆون جانە تومەنگى كاربون داۋىرلەرىنىڭ شوگىندى قاتپارلارىنان تۇرادى. «تارحان گەولوگيالىق رازرەزى» ايرىقشا عىلىمي قۇندىلىققا يە. بۇل جەر تاسقا اينالعان بايىرعى اعزالاردى زەرتتەۋگە, ولاردىڭ جاسىن انىقتاۋعا مۇمكىندىك بەرەدى. ەڭ باستىسى, ولكە تاريحىنىڭ جاڭا پاراقتارى اشىلادى. رازرەزدىڭ ءتۇرلى قاتپارلارىندا كونە تەڭىز اعزالارىنىڭ تاسقا اينالعان قالدىقتارى ساقتالعان, ولار بىرنەشە ءجۇز ميلليون جىل بۇرىن جاسالعان وزىندىك تاس «سۋرەتتەر» ىسپەتتى. رازرەز ەكى گەولوگيالىق كەزەڭنىڭ – دەۆون مەن كاربوننىڭ شەكاراسىن كورسەتەدى. ءبىر وكىنىشتىسى, وسىناۋ تاڭعاجايىپ مەكەندەگى قانشاما عاسىر ساقتالعان جادىگەرلەر تونالىپ, جويىلىپ بارادى. سوندىقتان بۇل جەردى تەز ارادا مەملەكەت قامقورلىعىنا الۋ قاجەت», دەيدى وسى ۋنيۆەرسيتتەتىڭ پرورەكتورى, بيولوگيا عىلىمىنىڭ دوكتورى انار مىرزاعاليەۆا.
ازامات قاسىم,
«ەگەمەن قازاقستان»
شىعىس قازاقستان وبلىسى
