كۋرسانتتار پوليتسيا پۋنكتىنە قاراي جۇگىرە جونەلدى, بارا بولعان وقيعانى حابارلادى دا, كوپىرگە قاراي كەرى ۇمتىلدى. وزەننىڭ قىز سەكىرگەن جاعى تەرەڭ بولاتىن, كەزەكشىلىكتە جۇرگەن جول-پاترۋلدىك پوليتسياسىنىڭ قىزمەتكەرى, پوليتسيا كىشى سەرجانتى ءادىلجان جومارتوۆ «جەدەل جاردەم» شاقىرۋعا كىرىستى. وقيعا بولعان جەرگە ادامدار دا جينالىپ قالىپتى, قۇتقارۋ ءۇشىن سۋعا تۇسكەن ەكى ەر كىسى قىزدى الىپ شىعا المادى. ال ەسىنەن تانىپ قالعان قىز سۋعا ءبىر باتىپ, ءبىر شىعىپ بارادى. ەركەبۇلان كۋرسانت كيىمىن شەشتى دە, كوپىردەن قىز باتىپ كەتكەن تۇسقا سەكىرىپ كەتتى. تورعاي وزەنى جاعاسىندا وسكەن جىگىت سۋدا جاقسى جۇزەتىن. ول سۇڭگىپ بارىپ, باتىپ كەتكەن قىزدى شاشىنان تارتىپ, ءبىر قولىمەن, جالداپ جاعاعا قاراي جۇزە باستادى. جاعاداعىلار جانىن شۇبەرەككە ءتۇيىپ تۇردى. سۋدىڭ سۋىعالى قاشان, ونىڭ ۇستىنە سول كۇنى اۋا رايى دا سالقىن بولدى. ەركەبۇلان ەسىنەن تانىپ قالعان قىزدى جاعاعا جاقىنداتقاندا ءادىلجان جومارتوۆ كيىمىمەن سۋعا ءتۇسىپ, ونىڭ الدىنان شىقتى. بۇل كەزدە ەركەبۇلان دا شارشاپ قالعان ەدى, قىزدى جاعاعا سۇيرەگەن سوڭ, ول دا سۋدىڭ تايىز جەرىنە كەلىپ, اياعىن تىرەپ, كۇش الدى.
جۇرت قىزدى ءولىپ قالدى دەپ ويلادى. ەركەبۇلان مەن ونىڭ كۋرستاسى نۇربول, كىشى سەرجانت ءادىلجان مەن ونىڭ ارىپتەسى سايات يمانباەۆ قىزعا العاشقى كومەك كورسەتە باستادى. پوليتسيا قىزمەتكەرلەرى جۇرەككە ماسساج جاساعاندا, كۋرسانتتار دا ساۋاتتىلىق تانىتىپ, قىزدىڭ تىزەسىن ىشكە تىرەپ, اياقتارىن سوزعىلاپ, قوزعالتتى. وسى كەزدە اۋزىنان سۋ لىق ەتە قالدى دا, دەمالا باستادى. سول ساتتە جەتكەن «جەدەل جاردەم» قىزدى قالالىق اۋرۋحاناعا الىپ كەتتى. ءسويتىپ سۋعا سەكىرۋ ارقىلى وزىنە قول جۇمساعان 21 جاستاعى قىز كۋرسانت ەركەبۇلان تولەبەكوۆتىڭ ەرلىككە پارا-پار ءىسى ارقاسىندا اجال تىرناعىنان امان قالدى. ول قازىر اۋرۋحانادا ەمدەلىپ جاتىر.
– ءبىز نۇربول ەكەۋمىزدىڭ تەز جۇگىرگەنىمىز سونداي, كوپىرگە ساناۋلى سەكۋندتاردا جەتتىك. سۋ مۇزداي ەكەن, بىراق مەندە اعىپ كەتەمىز-اۋ دەگەن وي بولعان جوق. ويلانىپ جاتۋعا ۋاقىت مۇرسات بەرمەيدى عوي مۇندايدا, ويتكەنى سۋعا تۇنشىققان ادام بەس مينۋتتان اسقاندا تىنىسىن توقتاتادى. سوندىقتان قۇتقارىپ ۇلگەرۋ كەرەك دەپ شەشتىم. قىزدى امان الىپ شىققاننان كەيىن اجالمەن ارپالىسقاندا نە ءومىر, نە ءولىم ەكەنىن 1-2 مينۋت عانا شەشەتىندىگىن ويلاعاندا, ارينە ادام رەتىندە دەنەڭ تىتىركەنەتىنى راس, – دەيدى ەركەبۇلان.
ەندى مينۋت ەمەس, بىرەر سەكۋند كەشىككەندە وزىنە قول جۇمساعان قىز اجال تىرناعىندا كەتەر ەدى, ال بۇل جولى جاس جىگىتتىڭ باتىل ارەكەتى ارقاسىندا امان قالدى.
وبلىستىق ىشكى ىستەر باسقارماسى تاراپىنان جول-پاترۋلدىك پوليتسياسى قىزمەتكەرلەرى مەن اكادەميا كۋرسانتى ەركەبۇلان تولەبەكوۆ جانە وعان كومەكتەسكەن دوسى نۇربول سامكە ماراپاتقا ۇسىنىلدى.
ءنازيرا جارىمبەت,
«ەگەمەن قازاقستان»
قوستاناي
