چەمپيونات ەرلەر جانە قىزدار اراسىندا كلاسسيكا, راپيد جانە بليتس ساناتتارى بويىنشا جەكە-جەكە وتكىزىلدى. سونىمەن قاتار, تۋرنيردە تۇڭعىش رەت كوماندالار جۇپتىق باسەكەدە كۇش سىناستى.
كلاسسيكالىق سانات بويىنشا وتكەن ويىندا جەرلەسىمىز حاكىمجان ەلەۋسىنوۆ الدىنا جان سالمادى. ول جەتى تۋردا مۇمكىن بولعان جەتى ۇپايدىڭ ءبارىن الىپ, وسىمەن ءۇشىنشى رەت الەم چەمپيونى اتاندى. وسى جەڭىسىنەن كەيىن چەمپيونعا «قازاقستان رەسپۋبليكاسىنىڭ ەڭبەك سىڭىرگەن سپورت شەبەرى» اتاعى بەرىلدى.
حاكىمجان ەلەۋسىنوۆ 2012 جىلدان باستاپ قىزىلوردا وبلىسىنىڭ توعىزقۇمالاقتان اعا جاتتىقتىرۋشىسى قىزمەتىن اتقارىپ كەلەدى. بۇدان بۇرىن ول 2012 جىلى چەحيادا, 2015 جىلى الماتىدا وتكەن الەم بىرىنشىلىكتەرىندە توپ جارعان بولاتىن. بۇل سىندا تاعى ءبىر قازاقستاندىق سايلان ماتىلوۆ كۇمىس مەدال يەگەرى اتانسا, قىرعىزستاندىق توعىزقۇمالاقشى بەلەك مامبەتاليەۆ قولا جۇلدەنى قاناعات ەتتى.
قىزدار اراسىنداعى تارتىستا الەمنىڭ بىرنەشە دۇركىن چەمپيونى اسەل داليەۆانىڭ جۇلدىزى جوعارى بولدى. تۋرنير بارىسىندا تاماشا ناتيجەگە قول جەتكىزگەن ول وسىمەن بەسىنشى رەت الەم چەمپيونى دەگەن اتاقتى يەمدەندى. قىرعىزستاندىق جاڭىل ساعىنبەكوۆا ەكىنشى ورىنعا تۇراقتاسا, جەرلەسىمىز اقەركە كەنجەبەكوۆا قولا مەدال يەگەرى اتاندى.
ەرلەر اراسىنداعى بليتس ويىنىندا قىرعىزستاننان كەلگەن توعىزقۇمالاقشىلار ەشكىمگە دەس بەرگەن جوق. بۇل ەلدىڭ كۋبان يبروگيموۆ جانە اناربەك دجاماكەەۆ سىندى ويىنشىلارى, تيىسىنشە ءبىرىنشى جانە ەكىنشى ورىنداردى جەڭىپ الدى. ال قىزدار اراسىنداعى سىندا قازاقستاندىق توعىزقۇمالاقشىلار قىمبات نوسەروۆا مەن ديانا كەنينا ۇزدىك شىعىپ, التىن جانە كۇمىس جۇلدەلەردى ءوزارا ءبولىستى.
راپيد جارىسىندا نۇربەك قابيەۆ قازاقستان قورجىنىنا التىن جۇلدە سالسا, حاكىمجان ەلەۋسىنوۆ قولا مەدالدى مىسە تۇتتى. قىزدار اراسىندا ونەر كورسەتكەن لينا كارىموۆا دا ەل نامىسىن لايىقتى قورعاپ, چەمپيون اتاندى. اسەل داليەۆا بولسا, بۇل سىندى كۇمىس مەدالمەن اياقتادى.
كوماندالىق جۇپتاسىپ ونەر كورسەتۋدە قۇرامىندا سەرىك اقتاەۆ پەن اسەل داليەۆا ويناعان قازاقستاننىڭ ءبىرىنشى كومانداسىنا تەڭ كەلەر قارسىلاس تابىلمادى. ەلىمىزدىڭ ەكىنشى كومانداسى ءۇشىن ويناعان جانات قايمولدين مەن روزا رايىمبەكوۆا جۇبى كۇمىس جۇلدەگە قول سوزسا, موڭعوليا ەلىنىڭ توعىزقۇمالاقشىلارى جاسۇلان رىسبەك پەن قۇرالاي قۇلبەك قولا جۇلدەنى قانجىعاعا بايلادى.
تاعى ءبىر ايتا كەتەتىن جايت, الەم چەمپيوناتى بارىسىندا دۇنيەجۇزىلىك توعىزقۇمالاق فەدەراتسياسىنىڭ كەزەكتى وتىرىسى ءوتىپ, وندا قازاقتىڭ ۇلتتىق زياتكەرلىك ويىنىنىڭ بولاشاقتاعى دامۋ ستراتەگياسى تالقىلاندى. سونىمەن قاتار, بىرقاتار كادرلىق شەشىمدەر قابىلداندى. سونىڭ ناتيجەسىندە, اليحان بايمەنوۆ دۇنيەجۇزىلىك توعىزقۇمالاق فەدەراتسياسىنىڭ پرەزيدەنتى بولىپ قايتا سايلاندى. جان رەشيتسكي (شۆەيتساريا), راۋف وزگەن (تۇركيا), اسىلحان ساكەي (موڭعوليا), داستان قاپاەۆ (قازاقستان) بۇدان بىلاي ۆيتسە-پرەزيدەنتتىك قىزمەتتى اتقاراتىن بولسا, ماقسات شوتاەۆ ۇيىمنىڭ باس حاتشىسى بولىپ بەكىدى.
توعىزقۇمالاقتىڭ كەلەسى دۇنيەجۇزىلىك دوداسى 2019 جىلى تۇركيادا وتەدى. ال ەۋروپا چەمپيوناتى 2018 جىلى فرانتسيادا ۇيىمداستىرىلسا, سول جىلى موڭعوليادا ازيا بىرىنشىلىگى جالاۋ كوتەرمەكشى.
جالپى, بۇل جولعى الەم چەمپيوناتى دۇنيە ءجۇزى بويىنشا توعىزقۇمالاق ويىنىنا دەگەن قىزىعۋشىلىقتىڭ ارتا تۇسكەنىن بايقاتتى. تۋرنيرگە قاتىسۋشىلاردىڭ سانى جىلداعىدان كوپ بولعانى ءوز الدىنا, بۇل ءدۇبىرلى باسەكەگە بيىل تۇڭعىش رەت اۋستريا, كامەرۋن, پولشا جانە ۋكراينا ەلدەرىنەن دە توعىزقۇمالاقشىلار كەلىپ, ونەر كورسەتتى. ياعني, قازاقتىڭ زياتكەرلىك ويىنى جىل وتكەن سايىن اياسىن كەڭىتىپ, ءوزىنىڭ دارەجەسى بويىنشا الەمدىك دەڭگەيگە كوتەرىلىپ كەلەدى.
قايرات ءابىلدا,
«ەگەمەن قازاقستان»
