ەكى كۇنگە سوزىلعان مەرەكەلىك شارالاردىڭ شىمىلدىعى «التاي – تۇركى الەمىنىڭ التىن بەسىگى» اتتى عىلىمي-تاجىريبەلىك كونفەرەنتسيامەن ءتۇرىلدى. داستۇرگە اينالعان ماڭىزدى باسقوسۋعا ۇلىبريتانيا, رەسەي, موڭعوليا, ءازىربايجان, تۇركيا سىندى مەملەكەتتەردىڭ وكىلدەرى قاتىستى.
«التاي – سان الۋان ەتنوس وكىلدەرىنە ورتاق رۋحاني بايلىق, قاستەرلى تاريحي مۇرا. التاي - تۇسىنىستىك پەن كەلىسىمدە ءومىر ءسۇرىپ وتىرعان كوپتەگەن ۇلت پەن ۇلتتىڭ اتا-قونىسى. ءبىزدىڭ وبلىسىمىزدا 2010 جىلدان بەرى التايدى زەرتتەۋ, زەردەلەۋ باعىتىندا اۋقىمدى جۇمىستار جۇرگىزىلىپ كەلەدى. بۇگىنگى شارا بارىسىندا سول ۋاقىتتان بەرگى اتقارىلعان شارۋالاردىڭ ناتيجەلەرى ۇسىنىلاتىن بولادى», - دەدى وبلىس اكىمى دانيال احمەتوۆ القالى باسقوسۋدىڭ اشىلۋ سالتاناتىندا سويلەگەن سوزىندە. ال كونفەرەنتسيا قوناقتارىن انا تىلىمىزدە قۇتتىقتاعان ۇلىبريتانيانىڭ ەلىمىزدەگى توتەنشە جانە وكىلەتتى ەلشىسى كەرولين براۋن ءسوزىن جاعىمدى جاڭالىقپەن باستاپ, جاقىندا لوندوندا ساق مادەنيەتىنەن سىر شەرتەتىن تاريحي جادىگەرلەر كورمەسى وتەتىنىن جەتكىزدى.
تۇماندى البيون تورىندە تۇڭعىش رەت ۇيىمداستىرىلعالى وتىرعان شارا بارىسىندا شىعىس قازاقستانداعى بەرەل قورعاندارى مەن شىلىكتى جازىعىنان, وزگە دە قورىمداردان تابىلعان قۇندى دۇنيەلەر كورەرمەن نازارىنا ۇسىنىلماق. سونىمەن قاتار جيىندا بەلگىلى ارحەولوگتار زەينوللا ساماشەۆ پەن ابدەش تولەۋباەۆ بەرەل مەن زايسان اۋدانىنىڭ اينابۇلاق, قاراتال اۋىلدارى ماڭىندا وزدەرى جۇرگىزگەن قازبا جۇمىستارىنىڭ ناتيجەلەرى جايىندا باياندادى. ىمىرت ۇيىرىلە كەندى شاھار تۇرعىندارى دراما تەاتردى بەتكە الدى. ايماق باسشىسىنىڭ باستاماسىمەن وسىمەن ءۇشىنشى مارتە وتكىزىلگەن «اق ەرتىس» حالىقارالىق كلاسسيكالىق مۋزىكا فەستيۆالى بيىل دا جوعارى دەڭگەيدە ءوتتى دەۋگە بولادى. بۇل كۇنى قازاقستاننىڭ حالىق ءارتىسى ايمان مۇساقوجاەۆا, «استانا وپەرا» تەاترىنىڭ ءانشىسى سۇندەت بايعوجين باستاعان وتاندىق انشىلەرمەن قاتار سامسۋن (تۇركيا) قالاسىنداعى وپەرا جانە بالەت تەاترىنىڭ ديريجەرى ميحايل كيرحگوفف, ستامبۋل مەملەكەتتىك سيمفونيالىق وركەسترىنىڭ باس كلارنەتيستى ايشەگيۋل كيرمانوگلۋ, باشقۇرتستاننىڭ ەڭبەك سىڭىرگەن ءارتىسى ءالفيا كارىموۆا, حالىقارالىق بايقاۋلاردىڭ لاۋرەاتى نارە ارگامانيان (ارمەنيا) سىندى شەت ەلدىڭ زور داۋىستى ونەرپازدارى كورەرمەننىڭ كوڭىلىن ءبىر سەرپىلتىپ تاستادى. ەكى ساعاتقا جۋىق ۋاقىتقا سوزىلعان كونتسەرتتە ۆەردي, موتسارت, چايكوۆسكي, پۋچچيني, شتراۋس سىندى ايگىلى كومپوزيتورلاردىڭ تۋىندىلارى ورىندالدى. «مۇنداي فەستيۆالدەر كورەرمەن ءۇشىن عانا ەمەس, انشىلەر ءۇشىن دە وتە پايدالى. ءبىز ءبىر-بىرىمىزبەن ارالاسىپ, شەبەرلىگىمىزدى شىڭدايمىز, رۋحاني جاعىنان ءوسىپ, تولىسامىز. سوندىقتان دا مەن وسىنداي حالىقارالىق دەڭگەيدەگى فەستيۆالدى ۇيىمداستىرۋشىلارعا ۇلكەن العىسىمدى ايتامىن», - دەدى ايشەگيۋل كيرمانوگلۋ.
ەكىنشى كۇنگى مەرەكەلىك شارالار رەسپۋبليكا الاڭىندا جىل سايىن ءداستۇرلى تۇردە وتەتىن بال فەستيۆالىنەن باستالدى. ءوڭىردىڭ 115 ومارتاشىسى 56 توننا بال ونىمدەرىن جۇرت نازارىنا ۇسىندى بۇل كۇنى. سونىمەن قاتار قالا كۇنى مەرەكەسىنە وراي شاھار تۇرعىندارى اراسىندا ۆەلو جارىس ءوتتى. وسكەمەن قالالىق اكىمدىگى مەن «قازتسينك» كومپانياسى بىرلەسە ۇيىمداستىرعان سايىستىڭ ءبىر ەرەكشەلىگى, قاتىسۋشىلاردىڭ جاسىنا شەكتەۋ قويىلعان جوق. ولار ءۇش توپقا (14 جاستان اسقان وقۋشىلار, ستۋدەنتتەر جانە ەرەسەكتەر) ءبولىنىپ جارىستىڭ كورىگىن قىزدىردى. شايتان اربا مىنگەن شاھار تۇرعىندارى قالانىڭ نەگىزگى كوشەلەرىمەن ءۇش اينالىم جاساپ, وزدەرىنىڭ شەبەرلىكتەرىن بايقاپ كوردى. قالا كۇنىنە ارنالعان مەرەكەلىك شارالار رەسپۋبليكا الاڭىندا «گاككۋ داۋىسى-2017» فەستيۆالىمەن تۇيىندەلدى.
ازامات قاسىم,
«ەگەمەن قازاقستان»
وسكەمەن
