سالتاناتتى ماراپاتتاۋ ءراسىمى 30-شى ماسكەۋ حالىقارالىق كىتاپ كورمە-جارمەڭكەسىنىڭ اياسىندا وتكىزىلدى.
كىتاپتىڭ اۆتورلارى – پرەزيدەنت نۇرسۇلتان نازارباەۆتىڭ جانىندا ۇزاق جىلداردان بەرى جەمىستى قىزمەت ەتىپ كەلە جاتقان ۇزەڭگىلەستەر كومانداسى. بۇل جونىندە «ەگەمەن قازاقستان» گازەتىندە 2016 جىلدىڭ 29 قاراشاسىنداعى نومىرىندە جازىلعان بولاتىن. قازاقستاننىڭ رەسەي فەدەراتسياسىنداعى سول كەزدەگى ەلشىسى, بۇگىندە پرەزيدەنت اكىمشىلىگى باسشىسىنىڭ ءبىرىنشى ورىنباسارى مارات ءتاجيننىڭ باستاماسىمەن جازىلعان قاسىم-جومارت توقاەۆتىڭ, نۇرتاي ابىقاەۆتىڭ, ادىلبەك جاقسىبەكوۆتىڭ, قايرات ءماميدىڭ, نۇرلان نىعماتۋليننىڭ, يمانعالي تاسماعانبەتوۆتىڭ جانە مارات ءتاجيننىڭ دەرەكتى وچەركتەرىنىڭ جيناعى قازىرگى زامانعى قازاقستاننىڭ شيرەك عاسىرلىق دامۋىنا ءتۇبىرلى شولۋ جاساپ, اۆتورلار وزدەرى تىكەلەي قاتىسقان بارلىق وقيعالاردى, پروتسەستەر مەن فاكتىلەردى سۋرەتتەيدى.
كىتاپتا قازاقستاننىڭ سىرتقى الەممەن ءوزارا قارىم-قاتىناس ورناتۋداعى تارتىمدى تۇستارى باياندالىپ, ەلدىڭ ساياسي دامۋىنىڭ نەگىزگى كەزەڭدەرى, جاڭا ەلوردا استانانىڭ بوي تۇزەۋى, دەموكراتيالىق ساياسي جانە قۇقىقتىق جۇيەنىڭ قالىپتاسۋى جارقىن ءارى جان-جاقتى بەينەلەنەدى. «بىرىنشىمەن بىرگە» كىتابى مەملەكەت باسشىسىنىڭ «بولمىستى وزگەرتۋدەگى قابىلەتىن, قورشاعان الەمدى جارقىن بولاشاقتىڭ كوزقاراسىنا ساي ۇيلەستىرىپ, ماقساتتى ايقىنداپ جانە وعان قول جەتكىزۋدە ەلىمىزدىڭ بارشا ازاماتتارىن ءسوز جۇزىندە ەمەس, ءىس جۇزىندە توپتاستىرۋداعى» بىرەگەي كوشباسشىلىق قاسيەتتەرىن اشادى.
كىتاپتى شىعارعان «حۋدوجەستۆەننايا ليتەراتۋرا» باسپاسىنىڭ ديرەكتورى گەورگي پرياحين قازاقستان پرەزيدەنتىمەن ۇزاق جولدى بىرگە ءجۇرىپ كەلە جاتقان ادامداردىڭ اڭگىمەلەۋى باسىلىمنىڭ باستى جەتىستىگى ەكەنىن ايتتى. «ولار قازاقستاننىڭ قازىرگى زامانعى قۋاتتى دەرجاۆاعا اينالۋ جولىنداعى ەل باسشىسىنىڭ بىرەگەي بەينەسى مەن اتقارىلعان جۇمىستاردىڭ سيپاتىن ەگجەي-تەگجەيلى اشىپ كورسەتەدى. كىتاپتا ەل باسشىسىنىڭ بەينەسى سومدالادى, كوشباسشى مەن ونىڭ ۇزەڭگىلەستەرى عانا ەمەس, بارشا حالىقتىڭ ءجۇرىپ وتكەن جولى كوز الدىڭىزعا كەلەدى», دەدى گ.پرياحين. ونىڭ پىكىرىنشە, نۇرسۇلتان نازارباەۆتىڭ كوشباسشىلىعىنىڭ ارقاسىندا قازاقستان تاۋەلسىزدىكتەن مەيلىنشە مول پايدا كورە ءبىلدى.
رەسەي فەدەراتسياسى پرەزيدەنتى اكىمشىلىگىنىڭ بۇرىنعى باسشىسى, قازىرگى ۋاقىتتا الەۋمەتتىك-ەكونوميكالىق جانە ينتەللەكتۋالدىق باعدارلامالار قورىنىڭ پرەزيدەنتى سەرگەي فيلاتوۆ نۇرسۇلتان نازارباەۆتى حح-ءححى عاسىر توعىسىنداعى باستى ساياسي تۇلعالاردىڭ ءبىرى رەتىندە سانايتىنىن ايتتى. «قازاقستان پرەزيدەنتى پوستكەڭەستىك كەڭىستىكتەگى تۇراقتىلىقتى ساقتاۋعا وتە كوپ ەڭبەك ءسىڭىردى, ال ەڭ باستىسى, ول بارلىق كۇش-جىگەرى مەن قۋاتىن ءوزىنىڭ ەلى مەن حالقىنا ارنايتىنى ماعان ەرەكشە ۇنايدى», دەدى ول.
رەسەي فەدەراتسياسى فەدەراتسيا كەڭەسىنىڭ حالىقارالىق ىستەر جونىندەگى كوميتەتىنىڭ توراعاسى كونستانتين كوساچەۆتىڭ ايتۋىنشا, كىتاپ فورماتى قازاقستان پرەزيدەنتىنىڭ قىزمەتىنە ەڭ جاقىن ارالىقتان كوز تاستاپ, ونىڭ تۇلعالىق اۋقىمىن, اتقارعان ىستەرىنىڭ اۋىر جۇگىن, تەرەڭ جاۋاپكەرشىلىگىن تانۋعا بولادى. «نۇرسۇلتان نازارباەۆ – ەۋرازيالىق تۇجىرىمدامانىڭ جالپى جۇرتشىلىق مويىنداعان تۋىندىگەرى», دەپ ەسكە سالدى سەناتور. «ول بۇل تۇجىرىمدى ەڭ العاشقى بولىپ جاسادى جانە ونى دايەكتى تۇردە ساتىلاپ ىسكە اسىرۋدا. ەۋرازيالىق يدەياسى بۇكىل الەمگە تارالدى, بۇل ىستە, ءسوزسىز, قازاقستان پرەزيدەنتىنىڭ سىڭىرگەن ەڭبەگى وراسان زور», دەدى ك.كوساچەۆ.
ماسكەۋ حالىقارالىق كىتاپ كورمەسى ۇيىمداستىرۋ كوميتەتىنىڭ توراعاسى, باسپا جانە بۇقارالىق كوممۋنيكاتسيا فەدەرالدىق اگەنتتىگى جەتەكشىسىنىڭ ورىنباسارى ۆلاديمير گريگورەۆ قازاقستان پرەزيدەنتى بارىمىزگە تاراپ كەتكەن ەلدە دە تىعىز بايلانىستاردى ساقتاۋعا بولاتىنىن سەزىندىرگەنىن ايتتى. «قازاقستاننىڭ جاڭا تاريحىنىڭ بارلىق بۇرىلىستارىندا: ايالداڭدار, اينالاعا كوز سالىڭدار, بولاشاقتى ويلاڭدار, وتكەندى زەردەلەڭدەر, وزدەرىڭنىڭ تاريحتارىڭ مەن مادەنيەتتەرىڭدى باعالاڭدار دەگەن وي-سانا ءۇنى ەستىلىپ تۇرادى», دەدى ول.
ەسكە سالا كەتەتىن جاعداي, ماسكەۋدە بىلتىر, ءبىر جىلعا جەتەر-جەتپەس ۋاقىتتا تۇساۋى كەسىلگەن بۇل كىتاپقا رەسەي جۇرتشىلىعى تاراپىنان ەرەكشە ءىلتيپات تانىتىلدى. ءىس-شاراعا كورنەكتى مەملەكەت جانە قوعام قايراتكەرلەرى, ديپلوماتتار, عالىمدار, ساراپتاما جانە قوعامدىق ۇيىمداردىڭ وكىلدەرى, بەلگىلى پۋبليتسيستەر قاتىستى.
«ەگەمەن-اقپارات»
