وسى ورايدا, اتالعان اۋقىمدى شارا جونىندە الەم ەلدەرىنىڭ اقپارات قۇرالدارى شۇعىل حابارلار تاراتا باستادى. سولاردىڭ بىرقاتارىنا شولۋ جاساپ كورگەن ەدىك.
«ريا نوۆوستي» اگەنتتىگى قازاقستان پرەزيدەنتى نۇرسۇلتان نازارباەۆتىڭ G20 بالاماسى رەتىندە يسلام مەملەكەتتەرىنىڭ ۇيىمىن قۇرۋ جونىندە ۇسىنىس بىلدىرگەنىن مالىمدەدى.
«پرەزيدەنت عىلىم مەن تەحنولوگيانى دامىتۋ ماڭىزدى باعىتتاردىڭ ءبىرى سانالاتىنىن ايتتى. ونىڭ پىكىرىنشە, باتىس ەلدەرى مەن يسلام الەمىن جاقىنداستىراتىن فورۋمدار مەن كەزدەسۋلەردى ءجيى وتكىزىپ تۇرۋ كەرەك», – دەپ اقپارات تاراتتى «ريا نوۆوستي».
يران ەلىنىڭ يرنا اقپارات اگەنتتىگىنىڭ دەرەگىنە سۇيەنسەك, استانادا وتكەن جيىندا يران پرەزيدەنتى حاسان رۋحاني مەن تۇركيا پرەزيدەنتى رەجەپ تايپ ەردوعان ەكى ەل اراسىنداعى دوستىق قارىم-قاتىناسقا توقتالىپ, ىنتىماقتاستىقتى دامىتۋ جونىندەگى جوسپارلارىمەن بولىسكەن.
«يران مەن تۇركيا ەكونوميكاسى ءبىر-بىرىنە تىعىز بايلانىستى. يرانعا قويىلعان سانكتسيالار الىنىپ تاستالعان سوڭ, ءوزارا ىنتىماقتاستىق ودان ءارى دامي تۇسەدى», – دەدى ەردوعان. سونىمەن قاتار, ول ەكى ەلدىڭ ورتالىق بانكتەرى قارىم-قاتىناسقا كەدەرگى كەلتىرەتىن ماسەلەلەردى جەدەل شەشۋگە شاقىردى», – دەپ حابارلايدى يرنا.
يراندىق اگەنتتىك ت.ەردوعاننىڭ سيرياداعى جانجال اسكەري قيمىلمەن ەمەس, ديپلوماتيالىق جولمەن شەشىلەتىنى جونىندە مالىمدەگەنىن جەتكىزدى. ال Azernews سايتىنىڭ اقپاراتىنا سۇيەنسەك, يران پرەزيدەنتى ح.رۋحاني تۇركيامەن اراداعى ءوزارا ساۋدا اينالىمىن 30 ميلليون دوللارعا دەيىن جەتكىزۋدى جوسپارلاپ وتىرعانىن ايتقان.
«ەكى ەل باسشىلارى ودان ءارى روحيندجا مۇسىلماندارى جاعدايىنا توقتالىپ, رۋحاني ونداعى قاتىگەزدىكتى توقتاتۋعا شاقىردى. سونداي-اق, يران پرەزيدەنتى شيەلەنىس جاعدايىنداعى ايماققا گۋمانيتارلىق كومەك كورسەتۋگە ءازىر ەكەنىن جەتكىزدى. ء وز كەزەگىندە تۇركيا پرەزيدەنتى دە ميانما وكىمەتىنىڭ ارەكەتىن سىنادى» – دەپ جاڭالىق تاراتادى Azernews.
ميانماداعى ماسەلەگە بايلانىستى باسقا ەلدەردىڭ باسشىلارى دا ءوز پىكىرلەرىن ءبىلدىردى. بانگلادەشتىڭ تۇڭعىش ينتەرنەت گازەتى bdnews24.com سايتى يسلام ىنتىماقتاستىعى ۇيىمىنىڭ عىلىم جانە تەحنولوگيالار جونىندەگى ءبىرىنشى سامميتىندە تالقىلانىپ جاتقان ماسەلەلەرگە توقتالعان. اۋەلى ميانماداعى جانجالدان ءبىرىنشى بولىپ بانگلادەشتىڭ جاپا شەگىپ وتىرعانىن ءسوز ەتكەن ابدۋل حاميد يسلام الەمىندە ءبىلىم مەن عىلىمدى دامىتۋعا ۇندەۋ تاستادى.
«پرەزيدەنت ءحاميدتىڭ ايتۋىنشا, يىۇ ءسامميتىنىڭ باستى ماقساتتارىنىڭ ءبىرى – عىلىم, تەحنولوگيا جانە يننوۆاتسيانى پايدالانا وتىرىپ ءومىر ءسۇرۋ ساپاسىن جاقسارتىپ, قوعامدى ترانسفورماتسيالاۋ.
بانگلادەشتىڭ فارماتسەۆتيكا, بالاما مەديتسينا جانە اۋىل شارۋاشىلىعىنداعى جەتىستىكتەرىن تارقاتا كەلە, پرەزيدەنت دەربەس جەرسەرىگىن ۇشىرۋعا ءازىر ەكەنىن جەتكىزدى», – دەيدى bdnews24.com سايتى.
سايتتىڭ اقپاراتى بويىنشا, بانگلادەش باسشىسى يسلام الەمى تەحنولوگيا مەن عىلىمنىڭ جەتىستىكتەرىن پايدالانا وتىرىپ, دامۋ باعىتىنان جاڭىلماۋ كەرەك ەكەنىن مالىمدەگەن. سونداي-اق, يسلام ەلدەرى ءتۇرلى سالادا الدا جۇرگەنىن جانە بىرلەسە ارەكەت ەتكەندە بيىكتەردى باعىندىراتىنىن جەتكىزىپتى.
پاكىستان راديوسى ەل باسشىسى مامنۋن حۋسەيننىڭ جاڭا داۋىردە عىلىم مەن تەحنولوگيانى دامىتۋعا بىرلەسە كۇش سالۋعا ۇندەۋ تاستاعانىن حابارلادى.
«استانادا وتكەن يىۇ سامميتىندە عىلىم مەن تەحنولوگيا سالاسىندا جەدەل وزگەرىستەر بولىپ جاتقانىن ءسوز ەتتى. ول يسلام الەمىن اۋىلشارۋاشىلىق ونىمدەرىن جاقسارتۋعا جانە اتالعان سالادا قولدانىلاتىن تەحنولوگيالاردى دامىتۋعا شاقىردى. ونىڭ پىكىرىنشە, ىرگەتاسى بەرىك ءبىلىم مەن دەنساۋلىعى مىقتى ءارى تاجىريبەلى ادامي رەسۋرس ارقىلى اتالعان سالالاردى باعىندىرۋ مۇمكىن ەكەنىن ءسوز ەتتى» – دەيدى پاكىستان راديوسى.
سونىمەن قاتار, مامنۋن حۋسەين يسلام ەلدەرىنىڭ بىرلىگى ۇرپاق ءۇشىن كوكجيەگى كەڭ بولاشاق ازىرلەيتىنىن جەتكىزدى. وسى ورايدا, پاكىستان راديوسى قازاقستان پرەزيدەنتىنىڭ وسى باعىتتا اتقارىپ جاتقان جۇمىستارعا ريزاشىلىعىن ءبىلدىردى. ال ۇندىستاندىق maeeshat.in جۋرنالى استاناداعى ءسامميتتىڭ دەڭگەيىن جوعارى باعالاپ, «يسلام تۇسىنىستىك پەن شەشىم ءدىنى ەكەنىن كورسەتەدى» دەپ ەسەپتەيدى.
اباي اسانكەلدى ۇلى,
«ەگەمەن قازاقستان»
