اتالعان جەكپە-جەك باستالماس بۇرىن, «سارىارقا» سپورت كەشەنىنىڭ ىشىنە لىق تولعان جانكۇيەر قاۋىم كاسىپقوي بوكستا باق سىناپ جۇرگەن ءبىر توپ قازاقستاندىق شەبەرلەردىڭ ونەرىن تاماشالادى. اتاپ ايتقاندا, مەيىرىم نۇرسۇلتانوۆ (4-0, 3 كو) قارسىلاسى يسماەل بۋەنونى (15-7, 10 كو) ءبىرىنشى راۋندتا نوكاۋتپەن جەڭدى. قازاقستاننىڭ تۋماسى, قازىرگى ۋاقىتتا اقش-تا پوليتسيا قىزمەتكەرى بولىپ جۇمىس ىستەيتىن ديماش نيازوۆ (12-0-3, 5 كو) ەدۋاردو پەرەيرا دوس رەيستەن (22-5, 18 كو) ۇپاي سانى بويىنشا باسىم ءتۇستى. الي احمەدوۆ (9-0, 7 كو) پەن دجاستين توماس (18-3, 7 كو) اراسىنداعى جەكپە-جەك تارتىسقا تولى بولدى. دەگەنمەن, قازاقستاندىق بوكسشى قارسىلاسىن سەگىزىنشى راۋندتا تەحنيكالىق نوكاۋتپەن تىزە بۇكتىردى.
سونداي-اق ايدوس ەربوسىن ۇلى (7-0, 6 كو) حوناتان حەرونيمو بارباديلونى (17-5-1, 14 كو), نۇرسۇلتان جاڭاباەۆ (3-0, 2 كو) الەكس ساندرو دۋارتەنى (13-2-1, 10 كو) ءبىرىنشى راۋندتىڭ وزىندە ەستەن تاندىرىپ, نوكاۋتپەن جەڭىسكە جەتتى. ال اۋىر سالماقتاعى رۋسلان مىرساتاەۆ (4-0, 4 كو) بولسا, اندرەس ماتياس ءافرانليدى (5-1, 5 كو) جەكپە-جەكتىڭ ءتورتىنشى راۋندىندا تەحنيكالىق نوكاۋتقا ءتۇسىردى. بۇدان كەيىن شارشى الاڭعا كوتەرىلگەن جانىبەك ءالىمحان ۇلى (2-0, 1 كو) جيلبەرتو پەرەيرا دوس سانتوستى (14-5, 10 كو) جانە جانقوش تۇراروۆ (22-0, 15 كو) برۋنو لەوناردو رومايدى (21-5, 18 كو) «ويناپ» ءجۇرىپ جەڭدى. بۇل جەكپە-جەكتەردە نوكاۋت بولماسا دا, تورەشىلەر القاسى ءبىزدىڭ بوكسشىلارعا جەڭىستى ءبىراۋىزدان بەردى.
ال بوكس كەشىنىڭ باستى جەكپە-جەگى جوعارىدا ايتقانىمىزداي, قانات يسلام مەن كانادالىق برەندون كۋك اراسىندا ءوربىدى. بۇعان دەيىن وتكىزگەن 18 جەكپە-جەگىنىڭ ءبىر دە بىرىندە جەڭىلىپ كورمەگەن كانادالىق بوكسشى وسال ەمەس. ون ەكى راۋندتىق فورماتتا وتكەن جەكپە-جەكتە جۇلدە رەتىندە ءبىرىنشى ورتا سالماقتاعى WBA Inter-Continental تۇجىرىمىنىڭ WBO NABO بەلدىگى تىگىلگەن بولاتىن.
برەندون كۋك ءبىرىنشى رەت ءۇشىنشى راۋندتا, ودان كەيىن بەسىنشى جانە سەگىزىنشى رانۋدتاردا نوكداۋنعا ءتۇستى. ەكى رەت گونگ سوعىلماعاندا, «بۇزىق بالانىڭ» شارۋاسى مەزگىلىنەن بۇرىن ءبىتۋى دە مۇمكىن ەدى.
جەكپە-جەكتىڭ توعىزىنشى بولىگىنە كەلگەندە قانات يسلامنىڭ ەكىنشى تىنىسى اشىلعانداي, شابۋىلدى ۇدەتە ءتۇستى. ونىڭ اۋىر سوققىلارى قارسىلاسىنىڭ ەسىن جيدىرماي, ابدەن تيتىقتاتتى. كەزەكتى ءبىر سوققى تيگەندە گۇرس ەتىپ قۇلاۋى دا ابدەن مۇمكىن ەدى. وسىنىڭ ءبارىن بايقاپ جۇرگەن تورەشىنىڭ دە شىدامى تاۋسىلعان بولۋ كەرەك, توعىزىنشى راۋند اياقتالماي جاتىپ جەكپە-جەكتى توقتاتتى. تەحنيكالىق نوكاۋت!
سونىمەن, 32 جاستاعى قانات يسلام ءوزىنىڭ 25-ءشى جەكپە-جەگىندە جەڭىسكە جەتىپ, ءبىرىنشى ورتا سالماقتاعى WBA Inter-Continental تۇجىرىمىنىڭ WBO NABO چەمپيوندىق بەلدىگىن يەمدەندى. قازاق جانكۇيەرلەرى ەندى قانات يسلامنىڭ وزىنە لايىقتى قارسىلاس بولاتىن, الەمدىك كاسىپقوي بوكستا اتى شىققان ءالدى بوكسشىلارمەن جۇدىرىق تۇيىستىرگەنىن قالايدى.
قايرات ءابىلدا,
«ەگەمەن قازاقستان»
