«گالا ەتۋالەي» – بۇل بالەت ونەرىن باعالايتىندار ءۇشىن تاپتىرمايتىن تارتۋ. الەمنىڭ ەڭ تاڭداۋلى دا كۇردەلى قويىلىمدارى, داڭقى الىسقا تاراعان بيشىلەر, سۇيىكتى پارتيالار – مۇنداي مۇمكىندىكتى تالعامپاز كورەرمەن جىبەرە قويماس.
قىسقاسى, الماتىدا اتى اڭىزعا اينالعان ماريا تەاترىنىڭ پريما-بالەريناسى ديانا ۆيشنەۆا مەن شتۋتگارت بالەتىنىڭ پرەمەرى فريدەمان فوگەل, ۇلكەن تەاتر پريما-بالەريناسى ەۆگەنيا وبرازتسوۆا, ماريا تەاترىنىڭ جەتەكشى ءسوليسى الەكساندر سەرگەەۆ, ميۋنحەن مەملەكەتتىك بالەتىنىڭ كوشباسشىلارى وسيەل گۋنەو مەن كسەنيا رىجكوۆا, اتى الەمگە ايگىلى قازاقستاندىق بالەرينا ءاليا تانىقپاەۆا, ەسسەن-بالەت ساڭلاعى ايدوس زاقان, ۆەنگريا ۇلتتىق بالەتىنىڭ جۇلدىزى گەرگەلي لەبلان سىندى ساڭلاقتار ونەر كورسەتەدى.
وسى ارادا ا.ۆ.سەلەزنەۆ اتىنداعى الماتى حورەوگرافيالىق ۋچيليششەسىنىڭ تۇلەكتەرى ماريا ەيحۆالد, ءاليا تانىقپاەۆا مەن ايدوس زاقان ۇزاق ۋاقىتتان بەرى العاش رەت تۋعان جەرلەرىندە ونەرلەرىن پاش ەتكەلى وتىرعانىن ايتا كەتۋ ءلازىم.
«الماتى ارقاشان مەن ءۇشىن ىستىق. مەن بۇل قالادا ءوستىم, ءبىلىم الدىم... تۋعان قالامنىڭ تۇرعىندارى ءۇشىن بار ىقىلاسىمدى سالىپ ونەر كورسەتەمىن», دەيدى ءاليا تانىقپاەۆا.
ال ايدوس زاقان ونەردەگى جولىن اباي اتىنداعى قارا شاڭىراقتىڭ قابىرعاسىندا باستاعانى ايان. ونىڭ دارىنىن دوستارى مەن ۇستازدارى جوعارى باعالايدى. «سوندىقتان الەمدىك جۇلدىزدارمەن بىرگە تۋعان ساحنامدا ونەر كورسەتۋ مەن ءۇشىن تەك زور قۋانىش ەمەس, سونداي-اق ۇلكەن جاۋاپكەرشىلىك», دەيدى ايدوس.
ورايى كەلگەندە «گالا ەتۋالەي» كەشتەرىن ۇيىمداستىرۋشى ArtClassic كومپانياسىنىڭ ديرەكتورى ەرلان انداعۇلوۆ ءوز جەرلەستەرىمىزدىڭ ونەرى وتاندىق مادەنيەت ءۇشىن ۇلكەن ماقتانىش سەزىمىن تۋدىراتىنىنا سەنىمدى ەكەنىن ايتىپ وتىر.
سول سياقتى ماريا تەاترىنىڭ پريماسى ديانا ۆيشنەۆا قازاقستاندىق بالەت مەكتەبىنىڭ دەڭگەيىن جوعارى باعالاي كەلە: «مەن بالەت ارتىستەرى اراسىندا قازاقتان شىققان حاس تالانتتاردى بىلەمىن. پەتەربۋرگتەگى ءتۇرلى گالا-كونتسەرتتەر مەن كونكۋرستاردا جىل سايىن قازاق بالەت مەكتەبىنىڭ دارىندى وقۋشىلارى ونەر كورسەتىپ, ناتيجەسىندە ەڭ ۇزدىك بي توپتارىنىڭ بولشەگىنە اينالادى. ۆاگانوۆا اكادەمياسىندا قازاقستاننان كەلگەن بالالار دا از ەمەس. ءوزىمنىڭ تۋعان ماريا تەاترىما «استانا بالەت» ارتىستەرى بىرنەشە مارتە ءىرى گاسترولدەرىمەن كەلدى. سوندىقتان مەن الماتى جۇرتىمەن تانىسۋدى تاعاتسىز كۇتىپ ءجۇرمىن», دەيدى.
سونىمەن «گالا ەتۋالەي» بالەت كەشتەرىنىڭ باعدارلاماسىنا كلاسسيكالىق جانە زاماناۋي حورەوگرافيانىڭ ەڭ جارقىن بەينەلەرى كىرەدى. بۇلار – ديانا ۆيشنەۆا مەن فريدەمان فوگەلدىڭ ورىنداۋىنداعى «ونەگين» بالەتىنەن پا-دە-دە (دجون كرەنكونىڭ حورەوگرافياسى) جانە «باس اينالۋ» (ماۋرو بيگونزەتتيدىڭ حورەوگرافياسى); ەۆگەنيا وبرازتسوۆا مەن الەكساندر سەرگەەۆتىڭ ورىنداۋىنداعى «ساتانيللا» بالەتىنەن «ۆەنەتسيا كارناۆالى» پا-دە-دەسى (ماريۋس پەتيپتىڭ حورەوگرافياسى); ءاليا تانىقپاەۆا مەن گەرگەلي لەبلاننىڭ ورىنداۋىنداعى «ەلەگيا» دۋەتى (ەلەنا بوگدانوۆيچتىڭ حورەوگرافياسى); ماريا ەيحۆالد پەن ايدوس زاقاننىڭ ورىنداۋىنداعى «شاعۋ» دۋەتى (كاتارينا كوزيلسكايانىڭ حورەوگرافياسى); كسەنيا رىجكوۆا مەن وسيەل گۋنەونىڭ ورىنداۋىنداعى «ەسمەرالدا» بالەتىنەن «ديانا مەن اكتەون» پا-دە-دەسى (اگريپپينا ۆاگانوۆا حورەوگرافياسى); اباي اتىنداعى مەملەكەتتىك اكادەميالىق وپەرا جانە بالەت تەاترىنىڭ جەتەكشى سوليستەرى اسەل اسقاروۆا مەن ازامات اسقاروۆتىڭ ورىنداۋىنداعى «رومەو مەن دجۋلەتتا» بالەتىنەن اداجيو (يۋري گريگورەۆيچ حورەوگرافياسى) جانە بالەتتى باعالاي بىلەتىن قاۋىمنىڭ وزگە دە سۇيىكتى پارتيالارى.
ايناش ەسالي,
«ەگەمەن قازاقستان»
الماتى
