ەكسپو قاتىسۋشىلارىن ماراپاتتاۋ ءراسىمى 1851 جىلى لوندون قالاسىندا وتكىزىلگەن ءبىرىنشى دۇنيەجۇزىلىك كورمەدەن باستاپ داستۇرگە اينالدى. بيىلعى ماراپات ارقىلى ەكسپو-2017 حالىقارالىق مامانداندىرىلعان كورمەسىنىڭ قاتىسۋشىلارىن «بولاشاق ەنەرگياسى» تاقىرىبىنداعى جوبالاردى جۇزەگە اسىرۋدى جالعاستىرۋعا جانە وسى باعىتتاعى بىرەگەي يدەيالاردى دامىتۋعا ىنتالاندىرۋ كوزدەلگەن.
ۇيىمداستىرۋشىلاردىڭ حابارلاۋىنشا, حالىقارالىق پاۆيلوندار «كورمە ديزاينى» جانە «كورمە تاقىرىبىنىڭ اشىلۋى» اتتى ەكى سانات بويىنشا باعالاندى. قازىلار القاسى قۇرامىنا كورمە, ساۋلەت جانە حالىقارالىق كورمەلەر سالاسىنداعى 9 حالىقارالىق ساراپشى ەندى.
بىرلەسكەن پاۆيلوندار اراسىندا «كورمە ديزاينى» ساناتى بويىنشا قولا جۇلدە - لاتىن امەريكاسى پلازاسىنا, كۇمىس جۇلدە - تىنىق مۇحيتى پلازاسىنا, التىن جۇلدە - كاريب قوعامداستىعى پلازاسىنا بەرىلدى. «كورمە تاقىرىبىنىڭ اشىلۋى» ساناتىندا قولا - ۋكرايناعا, كۇمىس- گانا رەسپۋبليكاسىنا جانە التىن - تاجىكستانعا تابىستالدى.
اۋماعى 400 شارشى مەتردەن كەم پاۆيلوندار اراسىندا «كورمە ديزاينى» بويىنشا قولا جۇلدەنى - لاتۆيا, كۇمىس جۇلدەنى - سلوۆاكيا, التىن جۇلدەنى- پولشا رەسپۋبليكاسى جەڭىپ الدى. «كورمە تاقىرىبىنىڭ اشىلۋى» بويىنشا فينليانديالىق دەپ تانىلدى. كۇمىس جۇلدە سينگاپۋرعا, قولا جۇلدە - چەحيا رەسپۋبليكاسىنا بۇيىردى. 400 جانە 700 شارشى مەتر اۋماعى بار پاۆيلوندار ىشىندە «كورمە ديزاينى» ساناتىندا قولا جۇلدەگە -موناكو كنيازدىگى, كۇمىس جۇلدەگە - ازەربايجان, التىن جۇلدەگە - كاتار لايىق دەپ تانىلدى.
«كورمە تاقىرىبىنىڭ اشىلۋى» ساناتىندا شۆەيتساريا ۇزدىك دەپ تانىلدى. قالعان جۇلدەلى ەكى ورىن ماجارستان مەن ۇندىستانعا تابىس ەتىلدى. 700 شارشى مەتر جانە ودان كوپ اۋماعى بار پاۆيلوندار اراسىندا باسەكە قىزا ءتۇستى. «كورمە ديزاينى» بويىنشا قولا جۇلدە - كورەيا رەسپۋبليكاسىنا, كۇمىس جۇلدە - ۇلىبريتانياعا جانە التىن جۇلدە - رەسەي فەدەراتسياسىنا بەرىلدى. «كورمە تاقىرىبىنىڭ اشىلۋى» ساناتىندا قولا جۇلدەمەن - فرانتسيا, كۇمىس جۇلدەمەن - قىتاي حالىق رەسپۋبليكاسى جانە التىن جۇلدەمەن - گەرمانيا فەدەراتيۆتى رەسپۋبليكاسى ماراپاتتالدى.
ەسكە سالا كەتسەك, قازاقستان رەسپۋبليكاسىنىڭ پرەزيدەنتى نۇرسۇلتان نازارباەۆ ەكسپو-2017 كورمەسىن جوعارى دەڭگەيدە وتكىزۋگە تىكەلەي اتسالىسقانى ءۇشىن حالىقارالىق كورمەلەر بيۋروسىنىڭ التىن مەدالىمەن ماراپاتتالدى.
سونداي-اق, ەكسپو-2017 كورمەسىن تابىستى وتكىزۋدە ايانباي ەڭبەك ەتكەن «استانا ەكسپو-2017» ۇك» اق ۇجىمى, استانا قالاسىنىڭ اكىمدىگى جانە ەرىكتىلەر ءتۇرلى ماراپاتقا يە بولدى.
