ءوڭىر باسشىسى اتاپ وتكەنىندەي, ەلباسى تاپسىرماسىنا سايكەس حالىقتىڭ ءال-اۋحاتىن, سونىڭ ىشىندە شالعايداعى ەلدى مەكەندەر تۇرعىندارىنىڭ جاعدايىن جاقسارتۋعا ۇدايى كوڭىل بولىنۋدە. مىسالى, جاڭاقالادا اۋدان ورتالىعىن قوسقاندا, سەگىز اۋىل ساپالى اۋىز سۋمەن قامتىلاتىن بولادى. جاڭاقالا مەن بوكەي ورداسى اۋداندارى ارالىعىندا جاتقان قۇلشىقتان ۇزىندىعى 146 كم سۋ قۇبىرىن تارتۋ ءۇشىن 2 ملرد تەڭگە قاراستىرىلسا, قازىردىڭ وزىندە سونىڭ 400 ملن تەڭگەسى تۇسكەلى وتىر. بۇل جۇمىستى قارقىندى جۇرگىزۋگە مۇمكىندىك بەرەدى. گەرمانيالىق سورعىلار ورناتىلاتىندىقتان, مەردىگەرلەر اۋىز سۋ ساپاسى جوعارى بولادى دەپ وتىر.
تازا سۋ بيىل پياتيمار, بىرلىك, الداعى جىلدىڭ كوكتەمىنە دەيىن ماستەكساي اۋىلدىق وكرۋگىنە جەتپەكشى. وعان قوسا ءتورت اۋىلدىق وكرۋگ گازداندىرىلىپ, 7 اۋىلىشىلىك جولدار جوندەلمەك. بوكەي ورداسى مەن جانىبەك اۋداندارى وبلىس ورتالىعىنان شالعاي جاتقاندىقتان, جول جوندەۋگە بيۋدجەتتەن قارجى بولىنگەنىمەن, ازىرگە بۇعان ەشكىم قۇلشىنىس تانىتا قويماعان. سوندىقتان جول قۇرىلىسى كاسىپورىندارى ءۇشىن مەملەكەتتىك ساتىپ الۋ بايقاۋلارىنىڭ كەيبىر تالاپتارىن وزگەرتۋ كەرەك شىعار, سەبەبى قالا مەن الىس ەلدى مەكەندەگى جاعدايدىڭ ەكى ءتۇرلى ەكەندىگى بەلگىلى. قالاي بولعاندا دا, اتالعان اۋدانداردا جول جوندەلەتىن بولادى. وبلىس اكىمى بيىلعى جوبالار جۇزەگە اسقان كەزدە وڭىردەگى ەلدى مەكەندەردى گازداندىرۋ 97, تازا اۋىز سۋمەن قامتۋ 70 پايىزعا جەتەتىندىگىن ءمالىم ەتتى.
