رەسپۋبليكادا دامۋدىڭ بەس ۇستەم باعىتى بار. سونىڭ اياسىندا ۇلكەن كولەمدە جاسامپازدىق جانە اباتتاندىرۋ جۇمىسى اتقارىلدى. جاستاردى جوعارى بىلىمگە تارتۋعا, ايماقتا ەڭبەك ەتىپ جۇرگەن مامانداردى قولداۋعا, تۇرعىنداردىڭ كاسىپكەرلىكپەن شۇعىلدانۋىنا ۇلكەن جەڭىلدىكتەر جاسالدى. سونداي-اق, ەل تاۋەلسىزدىگىنىڭ 26 جىلدىعى قارساڭىندا ناۋاي وبلىسىندا «وزبەكستان, cاعان جانكۇيەرمىز!» اتتى تاقىرىپپەن مەرەكەلىك شارالار مەن كەزدەسۋلەر ۇيىمداستىرىلىپ, رەفورمانىڭ ناتيجەلەرى انىق بايقالدى.
ايتۋلى مەرەكەگە قازاقستان رەسپۋبليكاسىنىڭ وزبەكستانداعى توتەنشە جانە وكىلەتتى ەلشىسى ەرىك وتەمباەۆ تا قاتىسىپ, ەل قۋانىشىنا ورتاقتاسقانى تۇرعىندارعا ەرەكشە رۋح سىيلادى. وسى ساپارىنان كەيىن ەرىك وتەمباەۆ وبلىستاعى جاعدايعا بايلانىستى پىكىرىمەن ءبولىستى:
«وسىندا قازاق تىلىندە ءبىلىم بەرىلۋى, قازاق تىلىندەگى وقۋلىقتارمەن قامتاماسىز ەتىلۋى, ۇستازداردىڭ قازاق ەكەنى قۋانتارلىق جايت. مۇندا بىلىمگە دەن قويعانى ناقتى كورىنىپ تۇر. ىلىمگە قۇمارلىق بۇكىل وزبەكستان مەكتەپتەرىنە ءتان. وزبەكستان مەن قازاقستان پرەزيدەنتتەرى ەكەۋارا كەزدەسۋىندە قازاق پەن وزبەكتىڭ تۋىس حالىق ەكەنىن تىلگە تيەك ەتەدى. بۇل ‒ ەكى حالىقتى جاقىنداستىرا تۇسەتىن قادام», ‒ دەپ ەلشى اعىنان جارىلدى.
وزبەكستان باسشىسىنىڭ قاۋلىسىنا وراي, ۇشقۇدىق اۋدانىنداعى جەلقۇدىق اۋىلى كوركەيە ءتۇستى. ەلدى مەكەندەگى 36 عيمارات جوندەۋدەن ءوتىپ, وعان 200 ميلليون سۋم ءبولىندى. اۋىلداعى 65 شاقىرىمدىق جول قايتا جاڭارتىلىپ, اسفالت توسەلدى. سونداي-اق, قازاق تىلىندە ساباق بەرەتىن №2 مەكتەپتىڭ جاڭا عيماراتى قولدانۋعا بەرىلدى. ايتا كەتۋ كەرەك, 40 ورىندىق ءبىلىم ورداسىن سالۋعا 522 ميلليون سۋم قاراجات جۇمسالدى. الىستان ات تەرلەتىپ كەلگەن مەيماندار زاماناۋي مەكتەپپەن تانىسىپ, زور اسەر الدى. ءوز كەزەگىندە قوناقتار وقۋ ورداسىنا ءتۇرلى سىيلىقتار مەن ادەبي كىتاپتار تارتۋ ەتتى.
اۋىلدىق جەردەگى پەداگوگتاردى قولداۋ ماقساتىندا مەملەكەتتەن تەگىن تۇرعىن ءۇي بەرىلەدى. وسىعان سايكەس, تامدى اۋدانى تولىقتاي, كەنيمەح جانە ۇشقۇدىق اۋداندارىنىڭ كەي ەلدى مەكەندەرىندە ءبىلىمدى مامانداردى تارتۋ ماقساتىندا جەڭىلدىكتەر قاراستىرىلعان. ماسەلەن, ءۇي بەرۋ نە جاتاقحانامەن قامتاماسىز ەتۋ جولعا قويىلدى. مۇنىڭ ءبارى اتالعان اۋدانداردا كادر جەتىسپەۋشىلىگىنە بايلانىستى پروبلەمالاردى شەشۋگە زور ۇلەس قوسادى.
قوناقتار اۋىلداعى دارىگەرلىك پۋنكت جاعدايىمەن تانىستى. مۇندا جوعارعى ءبىلىمدى 7 مەديتسينا مامانى قىزمەت اتقارادى. كەرەكتى ءدارى-دارمەكتىڭ ءبارى تابىلادى. زەرتحانادا جالپى جانە بيوحيميالىق قان تالداۋلارىن وتكىزۋگە مۇمكىندىك بار. مەرەكە قارساڭىندا دارىگەرلىك پۋنكتكە «داماس» اۆتوكولىگى تاپسىرىلدى.
قازاقستانمەن شەكارالاس تامدى اۋدانىندا 7 اۋىل بار. مۇنداعى جاعداي كەيىنگى كەزدە تۇبەگەيلى وزگەردى. ماسەلەن, №12 مۋزىكا جانە ونەر مەكتەبىندە ۇلتتىق ساز اسپاپتارى مەن دومبىرادا ويناۋدى ۇيرەنىپ, حورەوگرافيا مەن ەسترادا باعىتىنا ماماندانادى. سونىمەن قاتار, ءبىلىم سالاسىنداعى دەڭگەي دە تەز كوتەرىلىپ كەلەدى. مىسالى, شالعاي اۋدانداعى تالاپكەرلەر تەست سىناعىنان 68 نە ودان جوعارى بالل جيناسا, قوسىمشا گرانت نەگىزىندە وقۋعا قابىلدانادى. وسى جەڭىلدىكتىڭ ارقاسىندا جوعارىدا اتالعان ءۇش اۋداننان 94 تالاپكەر ۋنيۆەرسيتەتكە ءتۇستى. توتەنشە جانە وكىلەتتى ەلشى ەرىك وتەمباەۆ سول جاستارمەن جولىعىپ, اعالىق اقىل-كەڭەسىن ايتتى.
وسى ساپار بارىسىندا قوناقتار اۋدان ورتالىعىنداعى تولىق جوندەۋدەن وتكەن ەكى قاباتتى ءۇيدىڭ كىلتىن تابىستاۋ ءساتىنىڭ كۋاسى بولدى. قونىس تويىن تويلاعاندار قاتارىندا وزبەكستان قاھارمانى, ايگىلى شوپان سەرىكباي ساعاتوۆ تا بار. سونداي-اق, مۇمكىندىگى شەكتەۋلى ءۇش وتباسى پاتەر يەسى اتاندى. ولارعا جەڭىلدىك رەتىندە باستاپقى قارجىنى مەملەكەت تولەدى. پاتەر قۇنىنىڭ قالعان بولىگىن ءۇي يەلەرى 15 جىلدىق مەرزىم ىشىندە جەڭىلدىك بويىنشا تولەيدى.
تامدى اۋدانىنداعى وتەمۇرات اۋىلى دا جوندەۋ, اباتتاندىرۋ ناتيجەسىندە تۇبەگەيلى وزگەردى. مۇندا 514 تۇرعىن ءۇي قايتا جوندەۋدەن ءوتىپ, 30 الەۋمەتتىك نىسانعا اباتتاندىرۋ جۇرگىزىلدى. قۇرمەتتى مەيماندار اۋىلداعى №8 مەكتەپكە ات باسىن تىرەگەن. وقۋ ورداسى قازىرگى زامان تالابىنا ساي بەيىمدەلگەن. مۇندا كومپيۋتەر سىنىبى, سپورتزال, وقۋ-زەرتحانا بولمەلەرى بار. اۋىلداعى دارىگەرلىك پۋنكت تە زاماناۋي عيماراتتا قىزمەت كورسەتەدى.
ساپار سوڭىنا تامان مەيماندار وزبەكستان قاھارمانى 70 جاستاعى سەرىكباي ساعاتوۆتىڭ وتباسىنا قوناققا باردى. تامدىلىق شوپانداردىڭ ۇستازى اتانعان سەرىكباي اعا 45 جىل شوپان تاياعىن قولىنان تاستاعان جوق. بۇگىندە 7 پەرزەنتى مەن 17 نەمەرەسىنىڭ ىقىلاسىنا بولەنىپ, ۇزاق جىلدارداعى ەڭبەگىنىڭ زەينەتىن كورىپ وتىر.
«شالعاي اۋدانداردا بولىپ, سونداعى جاستارمەن كەزدەستىم. جەڭىلدىك ارقاسىندا وقۋعا تۇسكەن جاستار وزبەكستاننىڭ مەملەكەت باسشىسىنا دەگەن ىرزالىعىن ءبىلدىرىپ جاتىر. ءاربىر جاستىڭ جانارىنداعى قۋانىشتى, جۇرەگىندەگى ەرەكشە كۇش-قايراتتى كوردىك. ولار بار كۇش-جىگەرىن وزبەكستاننىڭ بولاشاعى ءۇشىن جۇمساۋعا, وزگەلەرگە ۇلگى بولىپ, مەملەكەتتىڭ وركەندەۋىنە سۇبەلى ۇلەستەرىن قوسۋعا دايىن ەكەنىن ايتتى. ساپار كەزىندە مۋزىكا جانە ونەر مەكتەبىنە دە بارىپ, شالعايدا جاسالعان مۇمكىندىكتەرگە ىرزا بولدىم.
سىنىپ بولمەلەرىنىڭ كوپتىگى, فورتەپيانودا جاستاردىڭ مۋزىكا شىعارمالارىن ورىنداۋى, وزبەكستان جانە شەتەل كومپوزيتورلارىنىڭ تۋىندىلارىنان ۇزىندىلەردى ويداعىداي ورىنداۋى ەرەكشە سەزىمگە بولەدى. ويتكەنى, قىزىلقۇم ءوڭىرى اقىندارعا, سازگەرلەرگە باي, ادامدارى ونەر سۇيگىش ولكە», ‒ دەدى قازاقستاننىڭ وزبەكستانداعى توتەنشە جانە وكىلەتتى ەلشى ەرىك وتەمباەۆ.
اتقارىلىپ جاتقان شارۋالارعا قاراپ, كەلەشەكتە قىزىلقۇمدا ءومىر قاينايتىنىنا سەنىم مول. بۇل جەردەگى قۇس ۇشسا قاناتى, ادام جۇرسە اياعى كۇيەتىن ميداي ءشول دالا گۇلدەپ, جاينايدى, باۋ-باققا اينالادى. سوعان سەنىم مول.
انار نالىباەۆا,
ارنايى «ەگەمەن قازاقستان» ءۇشىن
وزبەكستان
