19 قازان، 2011

«ەكى قولعا – ءبىر كۇرەك»

591 رەت كورسەتىلدى
قازاقستاندا حالىقتى جۇمىسپەن قامتۋ ءىسى قالاي شەشىلۋدە؟ «ەكى قولعا – ءبىر كۇرەك...». الدە­قاشان-اق ماتەلگە اينالىپ كەتكەن وسى ءتىر­كەستىڭ قاشان جانە قاي جەردە پايدا بولعانى بەلگىسىز، ايتەۋىر، بۇل ءسوزدى جۇمىس­تى قاجەت دەپ بىلەتىن نەمەسە جۇمىس تابۋدا كەجەگەڭدى كەيىن كەتىرەتىن كەدەرگىلەرگە كەزىگىپ، ابدەن تاۋالى شاعىلعان ادامنىڭ ايت­قانى انىق. بۇگىندە بارشامىز جارىسا جامان­دايتىن كەشەگى كەڭەستىك كەزەڭدە جۇمىسقا ورنالاسۋ جونىنەن ەشقانداي پروبلەمانىڭ بولماعا­نى دا بەلگىلى شىندىق. كەرىسىنشە، ول زاماندا­ جۇمىس ىستەمەگەن ادامدى «زا تۋنەيادستۆو» («جالقاۋلىق ءۇشىن») دەپ جاۋاپقا دا تارتاتىن. قازىر جاعداي وزگەردى. قوعامىمىزعا دەندەپ ەنگەن نارىقتىق قاتى­ناستار اركىم ءوز كۇنىن ءوزى كورەدى دەگەن قاعيدانى كولدەنەڭ تارتتى. بۇدان شىعاتىن قورىتىندى سول – ەگەر كۇنكورىس ءۇشىن تالپىنعىڭ كەلمەسە، ۇيىڭدە (ارينە، باس سۇعاتىنداي باسپاناڭ بار بولسا) شالقاڭنان ءتۇسىپ جاتا بەرۋىڭە بولادى. ەشكىم كەلىپ ساعان ءاي، شانجيىپ نەعىپ جاتىر­سىڭ، جۇمىسقا نەگە شىقپايسىڭ دەپ رەنىش بىلدىرمەيدى، تالاپ قويمايدى. ءبىزدىڭ كەيبىر اعايىن­دارىمىزدىڭ وسىنداي «مۇمكىندىكتى» مو­­لىنان پايدالانىپ جاتقاندارى دا ەش جا­سىرىن سىر ەمەس. ولاردىڭ كەيبىرەۋلەرى قو­لىنداعى ازىن-اۋلاق مالىنا سەنسە، ەندى بىرەۋلەرى مەملەكەت بەرەتىن اتاۋلى الەۋمەتتىك كومەكتى شۇكىرشىلىك ەتەدى. بىراق، ادامداردىڭ ءبارى بىردەي ەمەس. وزگەلەر سياقتى ەڭبەك ەتىپ، «تاماعى – توق، كيىمى – كوك» دەگەندەي، قاتا­رىنان قالماي ءومىر سۇرگىسى كەلەتىن باۋىر­لارىمىز دا بارشىلىق. جاقسى ءومىر ءسۇرۋ ءۇشىن جاقسى جۇمىس تابۋ قاجەت. نەبىر كەدەرگى­لەردىڭ جولىڭدى كەس-كەستەيتىنى دە وسىنداي ءسات. ويتكەنى بۇگىندە «ەكى قولعا ءبىر كۇرەك» تابۋ قيىننىڭ قيىنى. بۇل دا نارىقتىڭ وزىنە ءتان زاڭدىلىعى. كەرەك دەسەڭىز، ەكونوميستەردىڭ پا­يىم­­داۋىنشا، نارىق جاعدايىندا ەڭبەك ءونىم­دىلىگى ارتىپ، قولعا العان ءىسىڭنىڭ ويلاعان­داي ءجۇرۋى ءۇشىن ەلدە بەلگىلى ءبىر مولشەردە جۇمىس­سىزدىق تا بولۋى ءتيىس ەكەن. ونىڭ ءوزى تۇپتەپ كەلگەندە، جۇمىس ىستەپ جۇرگەن ادامدار­دى ءوز كاسىبىنە جاۋاپكەرشىلىكپەن قاراۋعا يتەرمەلەيدى. سەبەبى، زاۋىت قاقپاسىنىڭ سىرتىندا كىم قاشان جۇمىستان قۋىلار ەكەن، ورىن قاشان بوسار ەكەن دەپ كەزەك كۇتكەن حالىق تۇر. راس، جۇمىسسىزدىق شامادان تىس شارىقتاپ كەتپەۋى كەرەك. ويتكەن كۇندە «ءىستىڭ ناسىرعا شابۋى» دا عاجاپ ەمەس. دەي تۇرساق تا، جوعارىدا ءوزىمىز ايتىپ كەتكەندەي، ەڭبەك ەتىپ تابىس كىرگىزۋگە ىنتاسى بار ادامدار وزدەرىنە جۇمىس تابۋ ءۇشىن نە ىستەۋلەرى كەرەك دەگەن ساۋالدىڭ باس كوتەرۋى دە زاڭدىلىق. بۇل ورايدا دا ءوزىمىز ءومىر ءسۇرىپ جاتقان قازىرگى قوعامنىڭ وزىنە ءتان وزگەشەلىكتەرى بار. بۇگىندە جۇمىس كۇشىن ىزدەگەن بىرقاتار ۇيىمدار مەن كاسىپورىندار نەمەسە قازىرگى زاماننىڭ تىلىمەن ايتقاندا، جۇمىس بەرۋشىلەر بۇقارالىق اقپارات قۇرالدارى ارقىلى حابارلاندىرۋ بەرەدى. بۇل، ءسوز جوق، جۇمىس ىزدەگەندەر ءۇشىن جاپ-جاقسى «كو­مەك». ەڭ بولماعاندا ولار قاي جەردە قانداي جۇمىس بار ەكەنىن بىلەدى. بىراق بۇل سياقتى حابار­لاندىرۋ بەرەتىندەر قاتارى ونشا كوپ تە ەمەس. ويتكەنى ونىڭ ءوزى كاسىپورىن ءۇشىن قو­سىمشا شىعىن. ونىڭ سىرتىندا بۇگىندە جۇمىس ىزدەپ جۇرگەن ادامدى تاۋىپ الۋ ونشا قيىنعا دا تۇسپەيدى. اسىرەسە، قالالىق جەرلەردە ولار­دىڭ وزدەرى شاقىرۋسىز-اق كەلىپ تۇرادى. وسىندايدان دا رەسپۋبليكانىڭ الىس تۇكپىر­لەرىندەگى جۇمىس­سىزدار «ەكى قولعا ءبىر كۇرەك» تابۋدا ۇلكەن قيىنشىلىقتارعا ۇشىراسادى. ولار قانداي قيىنشىلىقتار؟ قازاقستاندا جۇمىس ىزدەگەندەرگە وزدەرىنىڭ سايتتارى ارقىلى كومەك كورسەتەتىن اگەنتتىكتەر دە بار. ولاردىڭ بازاسىنا ەنىپ، بوس ورىندار ىزدەۋ مۇمكىندىگىنە يە بولۋ ءۇشىن تاعى دا اقشا تولەۋ كەرەك. راس، ول ونشا كوپ تە قارجى ەمەس. ەڭ تومەنگى تولەماقى مولشەرى 400 تەڭگە بولسا، رەسپۋبليكا بويىنشا ورتا ەسەپپەن ول 1000-نان 3000 تەڭگەگە دەيىنگى ارالىقتى قۇرايدى ەكەن. شىنداپ كەلگەندە، جۇمىسى، الىپ وتىرعان تۇراقتى ەڭبەك­اقىسى جوق ادام ءۇشىن مۇنىڭ ءوزى دە ەداۋىر سالماق. مىنە، ءدال وسىنداي جاعدايدا «جۇمىسپەن قامتۋ-2020» مەملەكەتتىك باعدارلاماسى ىزدەگەنگە سۇراعان بولىپ وتىر. وسى باعدارلامانى قابىل­داي وتىرىپ ۇكىمەت قازىرگى بار جانە بولجامدى بوس جۇمىس ورىندارىنىڭ جالپىۇلتتىق مالىمەت­تەر بازاسىن قۇرۋ جونىندە شەشىم قابىلدادى. سونىمەن بىرگە، ەڭبەكپەن قامتۋ ورگاندارىنىڭ قىزمەتىن جەتىلدىرۋگە جانە اقپاراتتىق قولداۋ كورسەتۋگە 2011 جىلدىڭ وزىندە عانا بيۋدجەتتەن 2،1 ميلليارد تەڭگەنىڭ بولىنگەنىن اتاپ كورسەتۋ قاجەت. ەڭ باستى ەرەكشەلىك سول، جۇمىس ىزدەۋشىلەر اتالعان بازاعا ءبىر تيىن دا تولەمەستەن، تەگىن تىركەلە الادى. ونىڭ سىرتىندا، ەگەر ۇمىتكەر ءۇشىن لايىقتى جۇمىس تابىلماسا، ول جاڭا مامان­دىققا وقۋعا نەمەسە بۇرىنعى بار مامان­دىعى بويىنشا بىلىكتىلىگىن ارتتىرۋ كۋرسىنا جىبەرىلەدى. بۇل رەتتە دە وقۋ اقىسىن تولىقتاي مەملەكەت تولەيدى. سول سەبەپتى دە ۇكىمەت ءوزىن ءوزى جۇمىسپەن قامتىعان، جۇمىسسىز جانە از قامتاماسىز ەتىلگەن ادامداردى وقىتۋعا جانە ولاردىڭ جۇمىسقا ورنالاسۋىنا ىق­پال جاساۋعا 2011 جىلعا رەسپۋبليكالىق بيۋدجەتتەن 14،6 ميلليارد تەڭگە قارجى ءبولىپ وتىر. سونىمەن بىرگە ۇكىمەت اۋىلدىق جەردە كاسىپ­كەرلىكپەن اينالىسۋعا نيەت بىلدىرگەندەرگە شاعىن نەسيە بەرۋگە دە دايىن. بۇل رەتتە ەگەر كوم­مۋ­نالدىق يگىلىكتەرگە جۇمسالاتىن شىعىندار جوبا­نىڭ ءوزىنىڭ قۇنىنان اسىپ كەتپەگەن جاعدايدا كاسىپكەر ءۇشىن قاجەتتى ينفراقۇرىلىمدار دا (سۋ، ەلەكتر قۋاتى، گاز، جول، بايلانىس جانە باسقالار) تەگىن تارتىلىپ بەرىلمەك. سودان كەيىنگى ءبىر جاقسىلىق، ەگەر جۇمىس ىزدەۋ­شى ءۇشىن، ءتىپتى ول وقىپ شىققاننان كەيىن دە لايىقتى ورىن تابىلماسا، ال كاسىپكەرلىكپەن اينا­لىسۋدى قولايلى كورمەسە، ونداي جاعدايدا ەڭبەكپەن قامتۋ ورگاندارى وعان تۇرعىلىقتى جەردى وزگەرتۋدى ۇسىنادى. بۇل جولى دا ۇكىمەت كوشىپ-قونۋعا سۋبسيديا ءبولىپ، بولماسا سوڭىنان ساتىپ الاتىنداي مۇمكىندىكپەن جاڭا ۇلگىدەگى ارەندالىق تۇرعىن ءۇي ۇسىنىپ، سول سياقتى، كاسىبي ءبىلىم الۋ كۋرسىنان وتۋگە جانە ەڭبەككە ورنا­لاسۋعا ىقپال جاساي وتىرىپ، قولۇشىن سوزادى. ءسوز ورايىندا ءبىر اۋدان شەگىندە كوشىپ-قونعان جاعدايدا كورسە­تىلەتىن كومەكتىڭ وتباسى باسىنا، ياعني وتاعاسىنا 10 تومەنگى ەسەپتىك كورسەتكىشتى، ال وتباسى مۇشە­لە­رىنە 5 تومەنگى ەسەپتىك كورسەتكىشتى قۇرايتىنىن، كوشۋ وبلىس كولەمىندە جۇزەگە اساتىن بولسا تيىسىنشە 25 جانە 15 تومەنگى ەسەپتىك كورسەتكىشتى قۇرايتىنىن ايتا كەتۋ كەرەك. سونىمەن، جاڭا باعدارلامانىڭ مىندەتى قا­راپايىم دا تۇسىنىكتى. ول – تۇراقتى جانە ونىكتى ەڭبەكپەن قامتي وتىرىپ، حالىقتىڭ تابىس دەڭ­گەيىن ارتتىرۋعا بارىنشا جاعدايلار جاساۋ. الەم­دىك تاجىريبە كورسەتكەندەي، ۇكىمەت تە، ءىرى بيزنەس تە بىردە-ءبىر ەلدە جەتكىلىكتى دارەجەدە جۇمىس ورىن­دارىن قۇرا المايدى. سوندىقتان بۇل ماسەلەنى مۇمكىندىگىنشە وڭتايلى شەشۋدىڭ جال­عىز جولى – ول ءوزىن ءوزى جۇمىسپەن قامتۋعا نەگىز­دەل­گەن شاعىن جانە ورتا كاسىپكەرلىكتى دا­مىتۋ. مامانداردىڭ پايىمداۋىنشا، ءدال وسى ءوزىن ءوزى جۇمىسپەن قامتۋشىلىق جالدامالى ەڭبەكتەن كاسىپكەرلىككە كوشۋدىڭ وتپەلى فورماسى بولىپ تابىلادى ەكەن. ەل ەكونوميكاسىنداعى وراسان زور كادرلىق الەۋەت تە وسىندا جاتىر. قازاقستاندا ءوزىن ءوزى جۇمىسپەن قامتۋشىلار ەڭبەك ەتەتىن ادامداردىڭ 33 پايىزدان استامىن قۇرايدى. سويتە تۇرا ولار رەسپۋبليكاداعى جال­پى قوسىلعان قۇننىڭ بار بولعانى 10 پايىزىن عانا وندىرەدى. وسى كەلتىرىلگەن ءوزىن ءوزى جۇمىسپەن قام­تۋشىلاردىڭ 71،2 پايىزى اۋىلدىق جەرلەردە تۇر­سا، 28،8 پايىزى قالالاردا ەڭبەك ەتەدى. ولاردىڭ ءبىلىم دارەجەلەرى دە ءارتۇرلى. ەگەر قالاداعى ءوزىن ءوزى جۇمىسپەن قامتىعانداردىڭ 27 پايىزىنىڭ جوعا­رى، 32 پايىزىنىڭ ورتا ارناۋلى، 41 پايىزىنىڭ ورتا بىلىمدەرى بار بولسا، اۋىلدا تۇراتىنداردىڭ 8،5 پايىزىنىڭ عانا جوعارى ءبىلىمى، 15 پايىزىنىڭ ورتا ارناۋلى جانە 76 پايىزدان استامىنىڭ تەك ورتا بىلىمدەرى عانا بار. اۋىل تۇرعىندارىنا باسىم­دىق بەرىلۋىنىڭ باستى سەبەپتەرىنىڭ ءبىرى دە وسى ءوزىن ءوزى جۇمىسپەن قامتۋشىلاردى جاريا ەڭبەك رىنوگىنا شىعارۋ ماڭىزدى مەملەكەتتىك مىندەتتەردىڭ قاتارىنا جاتادى. ويتكەنى ول ادامدار دا ەرتەڭ جاستارى ۇلعايعان شاقتا وزگەلەر سياقتى زەينەتاقىمەن قامتاماسىز ەتىلۋى ءتيىس. ال ءومىر بويى جۇمىس ىستەمەگەن ادام ءۇشىن كىم جيناقتاۋشى زەينەتاقى قورىنا قارجى اۋدارادى؟ ونىڭ سىرتىندا ءوزىن ءوزى جۇ­مىسپەن قامتۋشىلار الەۋمەتتىك ساقتان­دىرۋ شارا­لارىنان دا تىس قالا بەرمەك. وسىن­داي ءجايت­تەردى ەسكەرگەندىكتەن دە «جۇمىسپەن قام­تۋ-2020» باعدارلاماسىن ازىرلەۋشىلەر وقى­تۋ، قاراپايىمداتىلعان نەسيەلەر بەرۋ، كونسۋلتا­تسيالىق كەڭەستەر بەرۋ جانە جاڭا جۇمىس ورىندارىن ىزدەۋ ارقىلى ەڭبەككە ورنالاسۋ مەن تۇراقتى جۇمىسپەن قامتۋ ءىسىن ىنتالاندىرۋ باعىتىندا شارالار كەشەنىن قاراستىرىپ وتىر. سوندىقتان دا باعدارلاما سوڭىنان جۇمىسقا ورنالاستىرۋ ماقساتىمەن كاسىبي وقىتۋ، ءوز ءىسىن، اسىرەسە اۋىلدىق جەردە، ۇيىمداستىرۋعا ىقپال جاساۋ جانە مەشەۋ قالعان وڭىرلەردەن نەعۇر­لىم دامىعان ءوڭىر­لەرگە قاراي قونىس اۋدارۋعا كومەك كورسەتۋ سياقتى نەگىزگى ءۇش باعىتتى قامتيدى. ءسوز رەتىندە مىناداي ءبىر ەرەكشەلىكتى دە ايتا كەتۋ ورىندى. كوبىنە-كوپ جۇمىس بەرۋشىلەر وزدەرى ءۇشىن جۇمىس كۇشىن ىزدەگەندە ولاردىڭ مىندەتتى تۇردە ەڭبەك ءوتىلى بولۋىن تالاپ ەتەدى. ادەتتە بۇل مەرزىم 5 جىلدان كەم بولماۋى ءتيىس. ال بۇل ونسىز دا جۇمىس تابا الماي جۇرگەن ادامدارعا قوسىمشا قيىندىق­تار تۋىنداتادى. وسىنداي كەدەرگىلەردى ەسكەرە وتىرىپ، جۇمىس بەرۋشىلەردى ادامداردى ەش­قان­داي ەڭبەك ءوتى­لىنسىز-اق قابىلداي بەرۋگە ىنتالاندىرۋ ءۇشىن الەۋمەتتىك جۇمىس ورىن­دارى دا قاراس­تىرىلعان. بۇل ورايدا جۇمىسقا ورنالاسقان­داردىڭ ەڭبەك­اقىلارى باستاپقى ءبىر جىل بويىنا ءىشىنارا سۋبسيديالانىپ وتىراتىن بولادى. العاشقى جارتى جىلدا ول 50 پايىزدى (26 مىڭ تەڭگەدەن اسپايتىن كولەمدە) قۇراسا، ودان كەيىنگى ءۇش ايدا – 30، ال سوڭعى ءۇش ايدا 15 پايىزدى قۇرايتىن بولادى. سونىمەن بىرگە، وزدەرى ءۇشىن مامان­داردى وزدەرى دايىنداعىسى كەلەتىن جۇمىس بەرۋشىلەر ءۇشىن دە وقۋعا بايلانىستى كەتەتىن شىعىن­داردىڭ 70 پايى­زىنا مەملەكەتتىك قولداۋ كورسەتىلەدى. وسى­لايشا، تەك بيىلعى جىلدىڭ وزىندە عانا سۋبسيديالارعا، ستيپەن­ديا­لارعا، وقۋعا كەتەتىن شىعىنداردىڭ ورنىن تولتىرۋعا 14،6 ميلليارد تەڭگە قاراستىرىلىپ وتىر. جوعارىدا ايتقانىمىزداي، ءوزىن ءوزى جۇمىس­پەن قامتيتىنداردىڭ باسىم كوپشىلىگى اۋىل­دىق جەرلەردە تۇراتىندىقتان جانە وندا تۇ­راقتى جالدامالى جۇمىس ورنىن قۇرۋ وڭايعا تۇسپەيتىندىكتەن باعدارلامادا اۋىلدا­عى كاسىپ­كەرلىككە ىقپال جاساۋ جاقتارى دا جاقسى ويلاستىرىلعان. بۇل باعىت ءوز ءىسىن ۇيىمداس­تىرۋعا نەمەسە ودان ءارى كەڭەيتۋگە ىنتاسى بار اۋىلدىقتاردىڭ بەلسەندى توبىنا ارنالادى. وسىنداي تىلەك بىلدىرۋشىلەر جۇ­مىس­پەن قامتۋ ورگاندارىنا ءوتىنىش بەرىپ، قاجەتتى قۇجاتتاردى ۇسىنسا جەتىپ جاتىر. بەلگىلى ءبىر كاسىپتە وزدەرىنىڭ العاشقى قادام­دارىن جاساۋعا نيەت بىلدىرگەن ادامدارعا ءتىپتى تىڭ يدەيالارعا بارىپ، رىنوكتان ورىن تابۋ­لارىنا دا كومەك كورسە­تىلەدى، قاجەتتى اقىل-كەڭەستەر بەرىلىپ، كاسىپكەر­لىك نەگىزدەرىنە ۇيرەتەتىن ءبىر ايلىق وقۋ كۋرستارىنا جىبەرىلەدى. ەڭ باستىسى، وسىلار­دىڭ ءبارى تەگىن جۇزەگە اسىرىلادى. سونىمەن بىرگە، بيزنەس-جوبا جاساۋعا جاردەم بەرىلىپ، ءوز ءىسىن باستاۋ ءۇشىن قارجىلارى بولماۋى سەبەپتى شاعىن نەسيەلەر بولىنەتىنىن دە ايتا كەتۋ قاجەت. بۇل رەتتە دە جەڭىلدىكتەر بار. ماسەلەن، 3 ميلليون تەڭگەگە دەيىن جەتەتىن نەسيە ەڭ تومەنگى پايىزدىق وسىممەن، 5 جىل مەرزىمگە دەيىنگە بەرىلەتىن بولسا، نەسيەنىڭ پايىزدىق ءوسىمىن 18 ايعا دەيىن كەيىن شەگەرە تۇرۋ ءمۇم­كىندىكتەرى دە قاراستىرىلعان. اۋىلداعى كاسىپ­كەرلىكتى دامى­تۋ ءۇشىن 2011 جىلعا عانا 5،3 ميلليارد تەڭگەنىڭ ءبولىنۋىنىڭ ءوزى كوپ جايتتەن حابار بەرسە كەرەك. مەشەۋلەپ قالعان ەلدى مەكەندەردەن نەعۇر­لىم دامىعان وڭىرلەرگە قاراي قونىس اۋدارۋعا جاعداي جاساۋ تۇرعىسىنداعى قولعا­بىس تا تارتىمدىلىعىمەن جانە ىنتالان­دىرۋشى شارا­لارىمەن ەرەكشەلەنەدى. ءسوزىمىز دالەلدى بولۋ ءۇشىن، وسىعان دەيىن دە ەسكە سالىپ ءوت­كەنىمىزدەي، قونىس اۋدارۋشىلارعا سوڭىنان جەكە مەنشىگىنە ساتىپ الۋ مۇمكىن­دىگىمەن جاڭا ورىندا ارەندالىق تۇرعىن ءۇي بەرىلەتىنىن ايتساق تا جەتىپ جاتىر. «ۇكىمەت 2016 جىلعا قاراي ءبىر جارىم ميلليون ادامدى ەڭبەكپەن قامتۋدى جوسپارلاپ وتىر. وسىلايشا ەلدەگى كەدەيشىلىك دەڭگەيىن 6 پايىزعا دەيىن تومەندەتىپ، جۇمىسسىزدىق دەڭ­گەيىن 5،5 پايىزدان اسىرماۋ مەجەلەنگەن. مۇن­داي كورسەتكىشتەرگە قول جەتكىزۋ ازاماتتا­رىمىزدىڭ ءال-اۋقاتىن جاقسارتۋ ىسىنە ءوز ۇلە­سىن قوسىپ، الدا تۇرعان ستراتەگيالىق مىندەت­تەردىڭ ءتيىمدى جۇزەگە اسىرىلۋىن قامتاماسىز ەتەدى»، دەپ اتاپ كورسەتكەن بولاتىن ەڭبەك جانە حالىقتى الەۋمەتتىك قورعاۋ ءمينيسترى گۇلشارا ابدىقالىقوۆا ۇستىمىزدەگى جىلدىڭ 16 مامى­رىندا ماجىلىستە وتكەن ۇكىمەت ساعا­تىندا سويلەگەن سوزىندە. ايتتى-ايتپادى، ءوز تۇرعىن­دارىنىڭ تۇرمىس جاعدايلارىنىڭ جاقسا­رۋىنا مۇمكىندىكتەر تۋعىزۋ كەز كەلگەن مەملەكەتتىڭ باستى ماقساتى بولىپ تابىلۋى ءتيىس ەكەنىن ەسكەرسەك، العا قويىلعان مىندەت اۋقىمدى عانا ەمەس، سونىمەن بىرگە وتە ماڭىزدى دا. بۇگىندە «بالەن مەكەمەگە بارىپ، جۇمىس جاعدايىندا سويلەسكەنىمدە، رەزيۋمە قالدىرىپ كەت، ءوزىمىز حابارلاسامىز دەگەن، سودان بەرى جارتى جىلداي ۋاقىت ءوتتى، ءالى ەش حابار جوق» دەگەن سياقتى رەنىشتەردى ءجيى ەستيمىز. بۇل ماسەلە نەگىزىنەن بەلگىلى ءبىر شەنەۋنىكتىك اپپاراتتان وزىنە قىزمەت ىزدەگەن ادامدار­عا قاتىستى بولعانىمەن، توقەتەرى بىرەۋ – ول ايتەۋىر ءبىر جۇمىس تابۋدىڭ امالى جانە ونىڭ قيىندىعى. ءمۇيىزى قاراعايداي ديپلومى بار ادامدار جۇمىس تابا الماي قينالعاندا، اۋىز تولتىرىپ ايتارلىقتاي ماماندىعى دا، بىرەۋلەردى قىزىقتىراتىنداي بىلىكتىلىگى دە جوق قا­راپايىم جۇرت قالاي جۇمىس تاپپاق. مىنە، ءدال وسىنداي كەزدە مەملەكەتتىڭ كومەككە كەلۋى، ءسوز جوق، وتە قۇپتارلىق قادام. تەك، كوپشىلىك كوڭىلىنەن شىققان وسىناۋ يگى ءىس، سوڭى سيىر­قۇيىم­شاقتانىپ كەتەتىن كەيبىر باستا­مالاردىڭ جولىن قۇ­شىپ، اياقسىز قالماسىن دەپ تىلەيىك.
سوڭعى جاڭالىقتار

ءالتىنساريننىڭ ادامي بولمىسى

رۋحانيات • بۇگىن، 00:01

ۋاقىت جاراتقان ۇلى جىر

ادەبيەت • كەشە

ۇقساس جاڭالىقتار