ەسكە سالساق, بەلگىلەنگەن ءۇش اي مەرزىمىندە ەكسپو-2017 كورمەسىنە شامامەن 2 ميلليون ادام كەلەدى دەپ جوسپارلانعان بولاتىن. دەگەنمەن, بۇل بولجام ەكى ايعا جۋىق ۋاقىتتا-اق جۇزەگە استى. ناقتىسىندا, 4 تامىز كۇنى حالىقارالىق مامانداندىرىلعان كورمە ەكى ميلليونىنشى كەلۋشىنى قارسى الىپ ۇلگەردى. ال 25 تامىزدا ەكسپو-2017 كورمەسىنە ءۇش ميلليونىنشى كەلۋشى تىركەلدى. كورمەنى تاماشالاۋشىلاردىڭ باسىم بولىگى قازاقستاننىڭ ۇلتتىق پاۆيلونى – «نۇر الەمگە» ايرىقشا قىزىعۋشىلىق تانىتقان. ناتيجەسىندە, تامىزدا ەكسپو-2017 كورمەسىنىڭ باستى نىسانىنا كەلۋشىلەر سانى ميلليوننان اسىپ ءتۇستى.
رەسمي دەرەككە سۇيەنسەك, ەكسپو-2017 كورمەسىنە كەلۋشىلەردىڭ 15 پايىزىن شەتەلدىك قوناقتار قۇرايدى, ونىڭ باسىم بولىگى رەسەيلىك كەلۋشىلەر. بۇل جونىندە «استانا ەكسپو-2017» ۇك» اق توراعاسى احمەتجان ەسىموۆ مالىمدەدى.
– جوسپارلانعان مەجەگە جەتتىك, ەكسپو-2017 كورمەسىنىڭ باستى ماقساتتارىنىڭ ءبىرى تۋريستىك سالانىڭ قارقىندى دامۋىنا ىقپال ەتۋ بولاتىن. بولجام ورىندالدى. جۇمىس ورىندارى كوبەيىپ, تابىس كولەمى ارتتى. اسىرەسە, شاعىن جانە ورتا بيزنەس سالاسىندا مۋلتيپلەكاتيۆتىك اسەر جاقسى بايقالدى. ەلوردالىق قوناقۇيلەردەگى مەيماندار سانى ەكى ەسە كوبەيدى. ءدال وسىنداي كورسەتكىش مەيرامحانالار مەن قوعامدىق تاماقتانۋ ورىندارىندا دا بايقالادى, – دەيدى ۇلتتىق كومپانيا باسشىسى.
سونداي-اق, احمەتجان ەسىموۆ جاقىندا ەكسپو-2017 كورمەسى نىساندارىن پايدالانۋ جوسپارى بەكىتىلگەنىن جەتكىزدى. كورمە جۇمىسى اياقتالعاننان كەيىن, ەكسپو اۋماعىندا پروفيلاكتيكالىق جۇمىستار جۇرگىزىلىپ, نەگىزگى نىسانداردىڭ جۇمىسى باستالادى.
جاھاندىق ەنەرگەتيكالىق توڭكەرىستىڭ وزىق تەحنولوگيالارى پاش ەتىلگەن تاريحي الاڭ – «استانا ەكسپو-2017» كورمەسى ءۇش اي بويىنا تالاي جاقسىلىقتىڭ جارشىسى بولدى. ءتىپتى ادامزات ءۇشىن ءارى مول, ءارى ارزان ەنەرگەتيكا كوزىن اشاتىن توڭكەرىس ەكسپو-2017 كورمەسىنىڭ پاۆيلوندارىنداعى وزىق جوبالار مەن جاڭا تەحنولوگيالار تۇرىندە استانادان باستاۋ الدى دەۋگە بولادى. قانشاما ەلدىڭ ۇلتتىق كۇندەرى وزكىزىلىپ, قالا قوناقتارى مەن تۇرعىندارى ەرەكشە ەلدەردىڭ رۋحاني-مادەني شارالارىنان سۋسىندادى.
ۇلتتىق كۇندەردىڭ وتكىزىلۋى الداعى التى كۇندە دە جالعاسىن تاپپاق. ماسەلەن, 5 قىركۇيەك – وزبەكستاننىڭ, 6 قىركۇيەك – بىرىككەن اراب امىرلىكتەرىنىڭ,
7 قىركۇيەك – پولشانىڭ, 8 قىركۇيەك رەسەي فەدەراتسياسىنىڭ ۇلتتىق كۇندەرى شەرۋ تارتادى. ال 9 قىركۇيەك كۇنى ۇلتتىق كۇن ساحناسىندا سوڭعى كونتسەرتتىك باعدارلامالاردىڭ ءبىرىن حالىقارالىق كورمەلەر بيۋروسى ۇيىمداستىرادى. 10 قىركۇيەك كۇنى كونگرەسس-ورتالىقتا كورمەنىڭ رەسمي جابىلۋ سالتاناتى وتكىزىلىپ, كونتسەرتتىك ءبولىمى امفيتەاتردا جالعاسادى.
دينارا بىتىك,
«ەگەمەن قازاقستان»
