جەرلەستەرىمىزدىڭ دە مۇمكىندىگى از ەمەس ەدى. الايدا, ىڭعايى كەلگەنمەن, گول سوعۋدىڭ ءساتى تۇسپەي قويدى. ويىننىڭ 17-مينۋتىندا گەورگي جۋكوۆ جاراقاتىنا بايلانىستى الاڭداعى ورنىن ماقسات بايجانوۆقا بوساتۋىنا تۋرا كەلدى.
جەرلەستەرىمىزدىڭ تاجىريبەسىنىڭ ازدىعى ما, ايتەۋىر ءتاپ-ءتاۋىر باستالعان شابۋىلداردى ناتيجەلى اياقتاي الماي جاتتى. العاشقى تايمدا عافۋرجان سۇيىمباەۆ پەن رومان مۇرتازاەۆتىڭ ويىنعا تولىق ەنە الماعانى كورىنىپ تۇردى. بىرنەشە تۇستا بەرگەن پاسى ءدال جەتپەي, كەلگەن دوپتى ءجوندى يگەرە الماي جاتتى. ال سەرىكجان مۇجىقوۆ ورتالىق شابۋىلشىنىڭ ارتىندا ويناسا دا, الاڭنىڭ كەز كەلگەن تۇسىنان تابىلىپ, قورعانىسقا دا ءجيى كومەكتەسىپ ءجۇردى.
كەزدەسۋدىڭ 31-مينۋتىندا ماركو ۆەشوۆيچ قاقپاشى داۆيد لوريامەن جەكە شىعىپ, العاشقى گولدى سالدى.
اراعا التى مينۋت سالىپ, 37-مينۋتىندا يسلامبەك قۋاتتىڭ سوققىسى ەسەپتى تەڭەستىرەتىندەي ءۇمىت سىيلاعان ەدى, الايدا دوپ قاقپانىڭ ماڭدايشاسىنا ءتيىپ, كەرى سەرپىلدى.
ەكىنشى تايمدى وتانداستارىمىز جاڭا قارقىندا باستادى. 51-مينۋتتا ەكى بىردەي گول سوعاتىن مۇمكىندىك بولىپ ەدى. الدىمەن ايىپ دوبىنان اۋەلەگەن دوپقا قاقپاشى تويتارىس بەرسە, اراعا 20 سەكۋند سالىپ, يسلامبەك قۋاتتىڭ باسىمەن ءدال سوققى باعىتتاي المادى.
فۋتبولداعى "سەن سوقپاساڭ, ساعان سوعادىنىڭ" كەرى كەلىپ, چەرنوگوريا كەلەسى شابۋىلىندا-اق ەسەپتى ۇلعايتىپ ۇلگەردى. اۋەلەي كەلگەن ايىپ دوبىنا فاتوس بەچيراي ءبىرىنشى جەتىپ, قاقپانىڭ تورىن تۋلاتتى.
كوپ ۇزاماي ءۇشىنشى گول دا سوعىلدى. بۇل دا ايىپ دوبىنان. تاعى دا باسپەن سوعىلعان دوپ... اۆتورى - ماركو سيميچ. باس باپكەر الەكساندر بوروديۋك دايىندىق كەزىندە وسى ماسەلەنى نەگىزگە الۋى كەرەك. سەبەبى, سوعىلعان ءۇش گولدىڭ ەكەۋى ەكىنشى قاباتتان كىردى.
ارى قاراي ويىن ءبىر قارقىندا ءوربىپ جاتتى. ال نەگىزگى ۋاقىتتىڭ اياقتالۋىنا ءبىر جارىم مينۋت قالعاندا يسلامبەك قۋاتتىڭ كەزەكتى رەت ەسەپ ايىرماسىن قىسقارتاتىن مۇمكىندىگى بولىپ ەدى, بۇل جولى دا ءتيىمدى پايدالانا المادى. قاقپاشىمەن جەكە قالعاننىڭ وزىندە سوققىسى تىم بيىك كەتتى.
ايان ءابدۋالي,
"ەگەمەن قازاقستان"
