بۇگىن بوكستان گەرمانيانىڭ گامبۋرگ قالاسىندا ءوتىپ جاتقان بوكستان الەم چەمپيوناتىنىڭ جارتىلاي فينالدىق باسەكەسى باستالدى. قازاقستاندىق بوكسشىلاردان ءۇشىنشى بولىپ رينگ تورىنە 75 كيلوداعى وتانداسىمىز امانقۇل ءابىلحان شىقتى. ول 2016 جىلعى ريو وليمپياداسىنىڭ قولا, ەۋروپا چەمپيوناتىنىڭ كۇمىس جۇلدەگەرى ازەربايجاندىق بوكسشى كامران شاحسۋۆارلىمەن جۇدىرىقتاسىپ, ۇپاي سانى بويىنشا باسىم ءتۇستى.
قوس بوكسشى ءبىرىنشى راۋندتى ءبىر-ءبىرىن اڭدىسۋمەن باستادى. ەكەۋى دە اشىق بوكسقا كىرىسكەن جوق. دەگەنمەن, كامران امانقۇلدىڭ قورعانىسى اشىق قالعانىن بايقاپ, 2-3 انىق سوققىسىن دارىتا ءبىلدى. ال ءابىلحان ءبىرىنشى راۋندتا ايتارلىقتاي كوزگە تۇسە المادى.
ەكىنشى راۋندتى وتانداسىمىز ەسەسى كەتىپ جاتقانىن اڭعارىپ, شيراق قيمىلداپ, انىق سوققى جاساۋعا تىرىسىپ باقتى. جانە دە ءوز دەگەنىنە جەتە الدى. ازەربايجاندىق بوكسشىنىڭ بىرنەشە قاتەلىكتەرىن ءتيىمدى پايدالانىپ, ءبىرىنشى راۋندتا كەتكەن ەسەسىن قايتاردى.
ءۇشىنشى راۋندتا دا امانقۇل ەرىك-جىگەرىن كورسەتىپ, قارسىلاسىنان ءبىر باس جوعارى ەكەنىن دالدەدى. جەكپە-جەك قورىتىندىسى بويىنشا امانقۇل ءابىلحان قارسىلاسىن ايقىن باسىمدىقپەن ۇتىپ, الەم چەمپيوناتىنىڭ فينالىنا شىقتى.
ايتا كەتەيىك, امانقۇل ءابىلحان ازەربايجاندىق بوكسشىدان وتانداسىمىز جانىبەك ءالىمحان ۇلىنىڭ كەتكەن ەسەسىن قايتاردى. جانىبەك ريو وليمپياداسىنىڭ شيرەك فينالىندا ءدال وسى بوكسشىدان جەڭىلىپ قالعان بولاتىن.
