9 قىركۇيەككە دەيىن استانا وپەرا تەاترىندا دجۋزۋپپە ۆەرديدىڭ «فالستاف» وپەراسى مەن ليۋدۆيگ ۆان بەتحوۆەننىڭ رە مينور, ور 125 №9 سيمفونياسى كوپشىلىك نازارىنا ۇسىنىلادى. وسىعان وراي وتكەن ءباسپاسوز جيىنىنا لا سكالا تەاترىنىڭ ديرەكتورى الەكساندر پەرەيرا, سوليست امبرودجو ماەستري, تەاتردىڭ قويۋشى رەجيسسەرى دوميانو ميكەلەتتو مەن مادەنيەت جانە سپورت ءمينيسترى ارىستانبەك مۇحامەدي ۇلى قاتىستى.
ايگىلى كومپوزيتور دجۋزۋپپە ۆەرديدىڭ ءۇش كورىنىستەن تۇراتىن «فالستاف» وپەراسىنىڭ تۇساۋكەسەرى 1893 جىلى ميلانداعى وسى لا سكالا تەاترىندا وتكەن بولاتىن. وپەرا جەلىسى قارت مۋزىكانتتارعا ارنالعان «Casa Verdi» ۇيىندە ءوربيدى. قارتايىپ, شاۋ تارتقان ءانشى فالستافتىڭ جۇرەگىن ماحاببات قيالى تەربەيدى. ۆەرديدىڭ اتالعان كومپوزيتسياسى اڭىزعا اينالعان ميلاننىڭ جارقىن تىرشىلىگىنىڭ قالتارىستى تۇسىنان سىر شەرتەدى. كەزىندە ۆەرديدىڭ ءوزى «مەنىڭ ەڭ كوركەم وپەرام» دەپ اتاعان قويىلىمنىڭ قويۋشى رەجيسسەرى – داميانو ميكەلەتتو, سۋرەتشى-ستسەنوگرافى – پاولو فانتين, كوستيۋمدەر بويىنشا سۋرەتشىسى – كارلا تەتي.
اڭگىمە اراسىندا لا سكالا تەاترىنىڭ ديرەكتورى الەكساندر پەرەيرا تەاتردىڭ تابىستى بولۋىنىڭ نەگىزگى قۇپياسىنا توقتالدى. ونىڭ ايتۋىنشا, «ادامگەرشىلىك قاسيەت تۇرعاندا تەاتر ماڭگى جاساي بەرمەك».
– لا سكالانىڭ تابىستى بولۋىنىڭ ءبىر سىرى – شىعارمالاردىڭ بارلىعى ءتىرى داۋىستا ورىندالادى. ارينە سىزدەر پلاسيدو دامينگونىڭ ورىنداۋىنداعى شىعارمانى ديسكتەن دە تىڭداي الاسىزدار. دەگەنمەن ديسكتەگى مۋزىكا ۇنەمى ءبىر قالىپتان اۋىتقىمايدى. جاندى داۋىستا ورىنداپ تۇرعان ارتيست ءاردايىم ۇزدىك ورىنداپ شىعۋعا ۇمتىلاتىندىقتان, شىعارما ءوڭى قۇلپىرا تۇسەدى, تۇرلەنىپ, مىڭ سان قۇبىلادى, – دەيدى ديرەكتور. ال تەاتردىڭ رەپەرتۋارلىق باعدارلاماسى قوس تاراپتىڭ ارنايى كەلىسىمىمەن جۇزەگە اسىرىلعان. – «فالستاف» وپەراسى – ەڭ كۇردەلى شىعارمالاردىڭ ءبىرى. قازاقستانعا فالستاف پارتياسىنىڭ ۇزدىك ورىنداۋشىلارىن تاڭداپ اكەلدىك. كوڭىلدى, ءۇنى زور ءارتىستىڭ ءبىرى – امبرودجو ماەستريدى ايتۋعا بولادى. №9 سيمفونياسىن الەمدى ۇندەستىككە شاقىرۋعا ارنالعان جولداۋىمىز دەپ قابىلداۋعا بولادى. ال بىرلىك بۇگىندە ەڭ ماڭىزدى دۇنيە.
تانىمال تەاتر ۇجىمى استاناعا تولىق قۇراممەن كەلگەنىن ايتا كەتۋ كەرەك. حور, وركەستر, سوليستەر مەن تەحنيكالىق قىزمەتتى قوسقاندا, بارلىعى 260 ادام.
«تەاترمەن بىرگە ساحنا دەكوراتسياسى مەن جابدىقتار تيەلگەن 14 جۇك كولىگى كەلدى. دايىندىق جۇمىستارى سوڭعى ءبىر اپتادا قىزۋ ءجۇرىپ جاتىر. وسى ورايدا, تەاتردىڭ بارلىق شىعىنىن دەمەۋشىلەردىڭ قولعا العانىن, قازاقستاندىق تاراپتان قارجى بولىنبەگەنىن باسا ايتقان ءجون», – دەدى مادەنيەت جانە سپورت ءمينيسترى ارىستانبەك مۇحامەدي ۇلى ءباسپاسوز ءماسليحاتىندا.
EXPO-2017 باعدارلاماسى اياسىندا لا سكالا تەاترىنىڭ وپەرا ترۋپپاسى, حور مەن سيمفونيالىق وركەسترىنىڭ العاشقى گاسترولدىك ساپارىنا يتالياندىق «Eni» ەنەرگەتيكالىق كومپانياسى مەن «Samruk-Kazyna Trust» الەۋمەتتىك سەرىكتەستىگى قولداۋ كورسەتىپ وتىر.
ايا ءومىرتاي,
«ەگەمەن قازاقستان»
