قازاقستان رەسپۋبليكاسى ۇلتتىق ۇلانى «وڭتۇستىك» وڭىرلىك قولباسشىلىعى قولباسشىسىنىڭ ۋاقىتشا مىندەتىن اتقارۋشى, گەنەرال-مايور اندرەي قاسكەلەڭوۆ ەلىمىزدىڭ بارلىق ازاماتتارى مەن اسكەري قىزمەت سالاسىنىڭ ماماندارىن ادام ءومىرى مەن بوستاندىعىن باستى قۇندىلىق ەتكەن, دەموكراتيالىق زايىرلى, قۇقىقتىق جانە الەۋمەتتىك مەملەكەت كەپىلدىگى بولىپ تابىلاتىن كونستيتۋتسيا كۇنىمەن قۇتتىقتاي كەلە: «اتا زاڭ – ءبىزدىڭ ازاتتىق العالى اتقارعان بارلىق ىستەرىمىزدىڭ التىن تارازىسى بولىپ تابىلادى. باس قۇجات مەملەكەتتىڭ وركەنيەتتى دامۋىنا نەگىز قالادى, ادام قۇقىعى مەن بوستاندىعىن قورعاۋ ىسىنە كەپىل بولدى. رەسپۋبليكاداعى قوعامدىق كەلىسىم مەن ساياسي تۇراقتىلىق قاعيداسى مەملەكەت جۇمىسىندا ءتۇرلى ينستيتۋتتار مەن ساياسي پارتيالار, قوعامدىق بىرلەستىكتەر مەن ەل بولاشاعىنا الاڭدايتىن ءاربىر ازامات ءۇشىن ايرىقشا ماڭىزدى ءرول اتقارادى. ايماقتىق قولباسشىلىقتار اسكەري بولىمشەلەرىنىڭ كۇندەلىكتى قىزمەتى ازاماتتارىمىزدىڭ ءوز كونستيۋتتسيالىق قۇقىقتارىنا دەگەن سەنىمدىلىگىن, قاۋىپسىزدىگىن قامتاماسىز ەتىپ وتىرادى. پاتريوتيزم مەن زياتكەرلىكتى, سالاۋاتتى ءومىر سالتىن باستى قاعيدا ەتىپ ۇستاناتىن 21-ءشى عاسىر جاۋىنگەرى سونداي-اق, اتا زاڭنىڭ ءار ءسوزىن جەتە ءتۇسىنىپ, سونىڭ نەگىزىندە تاربيەلەنە ءتيىس. بۇگىندە ءبىز بارىنشا سول ۇدەدەن شىعۋعا ۇمىتىلىپ وتىرمىز», – دەدى.
ال «وڭتۇستىك» وڭىرلىك قولباسشىلىعىنىڭ شتابى باستىعىنىڭ ۋاقىتشا مىندەتىن ۋاقىتشا اتقارۋشى, پولكوۆنيك ساعيتجان تازابەكوۆ: «ۇلتتىق ۇلان جاۋىنگەرلەرىنىڭ ايبىندى قىزمەتى – حالقىمىزدىڭ بوستاندىعىنىڭ, ەلىمىزدەگى قۇقىقتىق ءتارتىپ پەن تىنىشتىقتىڭ جانە ءار قازاقستاندىق سەنىمدىلىگىنىڭ مىزعىماس كەپىلى. اتا زاڭعا ادال جاۋىنگەرلەر ەل يگىلىگى مەن قوعام تىنىشتىعى جولىندا قالتقىسىز قىزمەت ەتە بەرمەك. ەگەمەندى ەلدىڭ ازاتتىق العان ۋاقىتتان بەرى اتقارعان ىستەرىنىڭ التىن تارازىسى بولىپ تابىلاتىن اتا زاڭىمىزدى ۇلىقتاپ, ارداق تۇتۋ بارشامىزدىڭ باستى مىندەتىمىز», – دەي كەلە, جاۋىنگەرلىك قىزمەتتە ەرىك, جىگەرىمەن, تاباندىلىعى جانە ەڭبەكسۇيگىشتىگىمەن دارالانعان اسكەري قىزمەتكەرلەرگە ءىىم-ءنىڭ ماقتاۋ قاعازدارى مەن ارنايى سىيلىقتارىن تابىس ەتتى.
«ەلىمىزدىڭ بۇگىندە كەرەگەسى كەڭ, ىرگەتاسى مىقتى ەلگە اينالۋىنىڭ نەگىزى بولىپ سانالاتىن اتا زاڭىمىزدى ۇلىقتاۋ شاراسىن ءبىزدىڭ «وڭتۇستىك» وڭىرلىك قولباسشىلىعى جىلدا سالتاناتتى تۇردە اتاپ وتەدى. اتا زاڭعا كورسەتىلەتىن قۇرمەتتى الدىمەن ءىز وزىمىزدەن باستاۋعا ءتيىسپىز. مۇنىڭ ءبارى تەك مەرەكەلىك شارا عانا ەمەس, اسكەري بورىشىن وتەپ جاتقان جاس ساربازدىڭ بويىنا اتا زاڭعا لايىقتى قۇرمەت كورسەتۋدى, ونىڭ ءار سويلەمى مەن ءار ءسوزىن قالاي ەستە تۇتىپ, قۇرمەتتەپ ءجۇرۋدى سىڭىرە بىلەر ءمانى زور تاربيە دە. مۇنىڭ ءبارى ءوز كەزەگىندە پاتريوتتىق رۋحتى قالىپتاستىرۋعا, ارميامىزدىڭ ايبىنىن اسقاقتاتۋعا, سەپتىگىن تيگىزەتىنى انىق», – دەگەن «وڭتۇستىك» وڭىرلىك قولباسشىلىعىنىڭ ءباسپاسوز قىزمەتىنىڭ باستىعى, مايور ارمان اۋباكىروۆ تاۋەلسىزدىك جىلدارى قىزمەتتىك-جاۋىنگەرلىك مىندەتتەردى ورىنداۋ كەزىندە تانىتقان ەرلىگى مەن باتىلدىعى, اسكەري قىزمەتتەگى جەتىستىكتەرى ءۇشىن ۇلتتىق ۇلانى «وڭتۇستىك» وڭىرلىك قولباسشىلىعىنىڭ 100-دەن اسا جاۋىنگەرى وردەن جانە مەدالدارمەن ماراپاتتالعانىن جەتكىزدى. سوڭعى ەكى جىلدىڭ ىشىندە عانا اسكەري قىزمەتتى ابىرويلى اتقارىپ, قوعامدىق ءتارتىپتى قامتاماسىز ەتۋ كەزىندە قىزمەتتى ۇيىمداستىرا ءبىلۋى مەن قىلمىستاردى اشۋعا بەلسەندى اتسالىسقانى ءۇشىن 22 اسكەري قىزمەتكەرگە ۇكىمەتتىك جانە ۆەدومستۆولىق ناگرادالار تابىس ەتىلگەن ەكەن.
تاۋەلسىزدىكتىڭ تەڭدەسسىز تارتۋى – اتا زاڭ مەرەكەسىنە ارنالعان سالتاناتتى شارالار الماتىدا عانا ەمەس, «وڭتۇستىك» وڭىرلىك وڭىرلىك قولباسشىلىعىنا قاراستى قىزىلوردا, شىمكەنت, تاراز, تالدىقورعان قالالارىنداعى بارلىق اسكەري بولىمدەردە ءوتىپ, جەكە قۇرامعا ارنالعان جۇرەكجاردى قۇتتىقتاۋلار جولداندى. «مەگا» ويىن-ساۋىق كەشەنىندەگى ۇلىق مەرەكە كۇنىنە وراي جالپى قالا تۇرعىندارىنا ارنالعان قر ۇلتتىق ۇلانى «وڭتۇستىك» وڭىرلىك قولباسشىلىعى «گەنەرال» ءان-بي ءانسامبلىنىڭ مەرەكەلىك كونتسەرتتىك باعدارلاماسىنا ۇلاستى.
ميرا بايبەك,
«ەگەمەن قازاقستان»
الماتى
