ورتالىق كوممۋنيكاتسيالار قىزمەتى الاڭىندا بريفينگ وتكىزىپ, جۋرناليستەردىڭ ساۋالىنا جاۋاپ بەرگەن وڭتۇستىك قازاقستان وبلىسى اكىمىنىڭ ورىنباسارى ۇلاسبەك سادىبەكوۆ ەلوردادا ۇيىمداستىرىلاتىن شارالاردىڭ لەگى ەلباسى نۇرسۇلتان نازارباەۆتىڭ «بولاشاققا باعدار: رۋحاني جاڭعىرۋ» اتتى باعدارلامالىق ماقالاسىنداعى باسىمدىقتارمەن ۇشتاستىرىلا وتىرىپ ازىرلەنگەنىن اتاپ ءوتتى. باستى ماقسات – وبلىستىڭ مادەنيەتىن, رۋحانياتىن, الەۋمەتتىك-ەكونوميكالىق مۇمكىندىكتەرى مەن تاۋارلارىن, تاريحي-مادەني ورىندارىن جانە تۋريستىك الەۋەتىن جۇرتشىلىققا كەڭىنەن تانىستىرۋ.
وبلىستىڭ استاناداعى كۇندەرى كەشە ەكسپو حالىقارالىق كورمەسىندە وتكەن بيزنەس-فورۋممەن اشىلدى. وعان شەتەلدەردىڭ قازاقستاندا جۇمىس ىستەپ جاتقان 30-دان استام ەلشىسى قاتىسىپ, ەلىمىزدەگى كاسىپكەرلىكتىڭ جاي-كۇيىن, بيزنەس پەن وسى سالاداعى جوبالارعا قولداۋ كورسەتۋ ماسەلەلەرىن تالقىلادى.
وبلىس اكىمىنىڭ ورىنباسارى بەس كۇنگە سوزىلاتىن وڭتۇستىك ءوڭىردىڭ كۇندەرى اياسىندا وتكىزىلەتىن 43 شارانىڭ ىشىندە جەتى شارانى ەرەكشە اتاپ كورسەتتى. بۇل شارالار توپتاماسىن وزدەرى «وڭتۇستىكتىڭ 7 كەرەمەتى» دەپ اتاپتى.
ونىڭ ءبىرىنشىسى – ەلباسىنىڭ «بولاشاققا باعدار: رۋحاني جاڭعىرۋ» باعدارلامالىق ماقالاسى شەڭبەرىندە وبلىس اكىمى جانسەيىت تۇيمەباەۆتىڭ يدەياسىمەن شىعارىلعان «تۇلعا. تاۋەلسىزدىك. تاريح», «جاھان تانىعان جەتى تۇلعا» كىتاپتارىنىڭ تانىستىرىلىمى جانە بۇگىن ساعات 11.00-دە وقۋشىلار سارايىندا وتەتىن «كۇش اتاسى – قاجىمۇقان» انيماتسيالىق ءفيلمىنىڭ تۇساۋكەسەرى.
ەكىنشىسى – «قازمۇنايگاز» كومپانياسىنىڭ عيماراتىنان باستاپ, «نۇرجول» گۇلزارى بويىمەن «بايتەرەك» الاڭىنا دەيىن ءجۇرىپ وتەتىن تۇيەلەر مەن اتتار كەرۋەنى. «تۇركى ەلىنىڭ ءتۇپ تامىرى – وڭتۇستىكتەن مەرەيلى استاناعا سالەم!» اتتى بۇل شارا ەجەلگى تاريحىمىزدان سىر شەرتەتىن جادىگەرلەردى جۇرتشىلىققا دارىپتەيدى.
ءۇشىنشى كەرەمەت شارا – 600 جاس دومبىراشىنىڭ ءبىر مەزگىلدە ورىندايتىن كۇمبىر كۇيلەر شەرۋى بولسا, ءتورتىنشىسى – 31 تامىز كۇنى «قۇربان ايت» مەرەكەسىنە ورايلاستىرىلعان قوعامدىق كولىكتەردە, باسقا دا كوپشىلىك ورىندارىندا وتكىزىلەتىن قايىرىمدىلىق اكتسياسى.
سونداي-اق, «ەتنواۋىلدا» ۇيىمداستىرىلاتىن شارالار دا جەتى كەرەمەتتىڭ بىرىنەن سانالادى.
ال 1-2 قىركۇيەك كۇندەرى ەكى قاباتتى اعىلشىن ستيلىندەگى قىزىل اۆتوبۋس ەلوردانى ارالايدى. بۇل كولىك استانانىڭ كورنەكتى ورىندارىنا بارىپ, ماڭگىلىك ەل, سارىارقا جانە باسقا دا باستى كوشەلەرىمەن ءجۇرىپ وتەدى. بۇل دا – جەتى كەرەمەتتىڭ قاتارىنداعى شارا.
وڭتۇستىك قازاقستان وبلىسىنىڭ كۇندەرى قاسيەتتى قۇربان ايتپەن تۇسپا-تۇس كەلىپ وتىر. وسىعان بايلانىستى وڭتۇستىكقازاقستاندىقتار قايىرىمدىلىق شارالارىنا كوبىرەك كوڭىل ءبولىپتى. 31 تامىز كۇنى وسى ءوڭىردىڭ جاستارى استانانىڭ قوعامدىق كولىكتەرىندە جانە حالىق كوپ شوعىرلانعان قوعامدىق ورىنداردا باۋىرساق پەن ءتاتتى توقاشتار تاراتادى.
وڭتۇستىك قازاقستان وبلىسى كۇندەرىندە جۇرتشىلىقتىڭ اسىعا كۇتەتىنى – اۋىلشارۋاشىلىق ونىمدەرىنىڭ جارمەڭكەسى ەكەنى بەلگىلى. وسى جولى دا ولار جالپى قۇنى 265 ملن تەڭگەنى قۇرايتىن 550 تونناعا جۋىق ازىق-ت ۇلىك اكەلىپتى. «اسىرەسە, ارزان جەمىس-جيدەك كوپ اكەلدىك. ويتكەنى, الدىڭعى جارمەڭكەلەر وسى ونىمدەرگە سۇرانىس ۇلكەن ەكەنىن اڭعارتتى», دەيدى ۇلاسبەك سادىبەكوۆ.
وڭتۇستىك قازاقستان وبلىسىنىڭ اۋىلشارۋاشىلىق ونىمدەرىنىڭ جارمەڭكەسى 30, 31 تامىز كۇندەرى ساعات 9.00-دەن باستاپ, بەيبىتشىلىك جانە كەلىسىم سارايىنىڭ الدىندا وتسە, 2,3 قىركۇيەك كۇندەرى ءدال وسى ۋاقىتتان باستاپ, «قازاقستان» سپورت كەشەنى الاڭىندا ۇيىمداستىرىلادى.
قوناقجاي وڭتۇستىك جۇرتى استانالىقتاردى اتالعان ءىس-شارالارعا بەلسەنە قاتىسۋعا شاقىرادى.
قىمبات توقتامۇرات,
«ەگەمەن قازاقستان»
