سەنات سپيكەرى ءوز سوزىندە پاگۋوش كونفەرەنتسياسى اشىلعان ساتىنەن باستاپ ءوزىنىڭ عىلىمي يدەيالارىمەن, يادرولىق قارۋدان ازات الەم قۇرۋ ماسەلەلەرى جونىندەگى اسا مازمۇندى جانە سىندارلى پىكىرسايىستارىمەن تانىمال ەكەنىن اتاپ ءوتتى. توراعا ءتۇرلى مەملەكەتتەردەگى ازاماتتاردىڭ, ونىڭ ىشىندە جاستاردىڭ اراسىندا قارۋسىزدانۋ يدەيالارىن كەڭىنەن تاراتۋدا پاگۋوش قوزعالىسىنىڭ ءرولىن جوعارى باعالادى.
«بۇل فورۋمدى ءبىزدىڭ ەلدە وتكىزۋگە سەنىم بىلدىرىلگەنى جايدان-جاي ەمەس, – دەدى ق.توقاەۆ. – بۇگىن حالىقارالىق قوعامداستىق يادرولىق سىناقتارعا قارسى ءىس-قيمىلدىڭ حالىقارالىق كۇنىن اتاپ وتۋدە. ءبىزدىڭ پاگۋوش قوزعالىسىمەن جەمىستى ۇنقاتىسۋىمىز جالعاسىن تاباتىنىنا سەنىمدىمىن».
توراعا, سونداي-اق, يادرولىق قارۋعا قارسى حالىقارالىق قوزعالىسقا قازاقستاننىڭ جاڭاشا سەرپىن بەرگەنىنە دە توقتالىپ ءوتتى. «26 جىل بۇرىن ءدال وسى كۇنى پرەزيدەنت نۇرسۇلتان نازارباەۆتىڭ تاريحي جارلىعىنا سايكەس سەمەي يادرولىق پوليگونى جابىلعان بولاتىن. ول قارۋدى تاراتپاۋ جانە قارۋسىزدانۋ سالاسىنداعى جاھاندىق كۇش-جىگەردە باستى ءرول اتقارادى», – دەدى ق.توقاەۆ.
ءسوزىن اياقتاي كەلىپ ق. توقاەۆ قازاقستان رەسپۋبليكاسى بەيبىتشىلىك پەن قاۋىپسىزدىكتى نىعايتۋ ءۇشىن پاگۋوش قوزعالىسىمەن ناتيجەلى بايلانىستاردى جالعاستىرا بەرەتىنىنە سەنىم ءبىلدىردى.
ءاليسۇلتان قۇلانباي,
«ەگەمەن قازاقستان»
