جاڭا عيمارات ءوڭىردىڭ اۋدان, قالالارىنان كەلىپ جۇمىس ىستەيتىن جاستار ارنالعان. بۇل ءۇي ايماقتىق «جاڭا سەرپىن» باعدارلاماسى اياسىندا جۇمىسپەن قامتىلعان ازاماتتار ءۇشىن قاراستىرىلعان. بۇدان بولەك, دارىگەر, مۇعالىم سياقتى وبلىس ورتالىعىندا تاپشى مامان يەلەرىنىڭ وسى جەرگە ورنالاسۋىنا مۇمكىندىگى بار دەپ حابارلادى ماڭعىستاۋ وبلىسى اكىمدىگىنىڭ ءباسپاسوز قىزمەتى «egemen.kz» تىلشىسىنە.
جاتاقحانانىڭ اشىلۋىنا ماڭعىستاۋ وبلىسىنىڭ اكىمى ەرالى توعجانوۆ, وبلىستىڭ مەملەكەتتىك ورگاندارىنىڭ جانە «نكوك» كومپانياسىنىڭ وكىلدەرى قاتىستى.
- ەلباسى نۇرسۇلتان ءابىش ۇلى جاستارعا جاعداي جاساۋ تۋرالى ماسەلەسىن كۇن تارتىبىنە قويدى. سەبەبى, جاس ازاماتتارعا ءبىز قولداۋ كورسەتۋىمىز كەرەك. جىل سايىن ءتۇرلى سالاعا, سونىڭ ىشىندە الەۋمەتتىك سالاعا بىلىكتى ماماندار اسا قاجەت. ماسەلەن, ءبىر عانا دەنساۋلىق سالاسىنىڭ وزىنە 245 جاس مامان قاجەت. بۇگىن «نكوك» كومپانياسىنىڭ دەمەۋشىلىگىمەن جاستارعا ارناپ وسىنداي 500 ورىندىق جاتاقحانا سالىندى. بارشاڭىزدى وسى قۋانىشتى كۇنمەن قۇتتىقتايمىن! ەلىمىزدىڭ ەرتەڭى – جاستار. سوندىقتان, سىزدەرگە ۇلكەن سەنىم ارتامىز. بارلىق باستامالارىڭىزعا ساتتىلىك تىلەيمىن, - دەدى قۇتتىقتاۋ سوزىندە ايماق باسشىسى.
جاتاقحانا عيماراتى ءۇش بلوكتان تۇرادى, بلوكتىڭ ءار قاتارىندا ەكى جانە ءۇش ادامنىڭ تۇرۋىنا ارنالعان تۇرعىن بولمەلەر, سانيتارلىق توراپتار مەن كيىم-كەشەك ساقتايتىن ورىندار بار. جاڭا قونىستانۋشىلار ءۇشىن تۇرعىن بولمەلەردەن باسقا بۋفەت, جۇمىس كابينەتتەرى, جۇك ساقتاۋ كامەرالارى, زات قوياتىن بولمە, جينالىس بولمەلەرى مەن قىسقى باق قاراستىرىلعان. بولمەلەر بالكوندارمەن قامتىلعان جانە تۇرۋعا جايلى. نىسان بيۋدجەتتىك سالادا جۇمىس ىستەيتىن قىزمەتكەرلەردى باسپانامەن قامتۋ ماسەلەسىنىڭ وزەكتىلىگىن ازايتۋعا سەپتىگىن تيگىزەدى.
گۇلايىم شىنتەمىرقىزى,
«ەگەمەن قازاقستان»
