مەملەكەتتىك حاتشى حالىقارالىق قارجى ينستيتۋتتارىمەن اراداعى ىنتىماقتاستىققا قازاقستان پرەزيدەنتىنىڭ ايرىقشا نازار اۋداراتىنىن اتاپ ءوتتى. وسىعان بايلانىستى, مەملەكەت باسشىسى ءىرى ينفراقۇرىلىمدىق جوبالاردىڭ ىسكە اسىرىلۋىنا باسا كوڭىل بولە وتىرىپ, حالىقارالىق قارجى ينستيتۋتتارىمەن ءوزارا ءىس-قيمىل اياسىن كەڭەيتۋ جونىندە مىندەت قويعان بولاتىن.
گۇلشارا ابدىقالىقوۆا بۇگىندە ەلىمىزدىڭ مەملەكەتتىك ورگاندارى ەلباسىنىڭ حالىققا ارناعان «قازاقستاننىڭ ءۇشىنشى جاڭعىرۋى: جاھاندىق باسەكەگە قابىلەتتىلىك» اتتى جولداۋىن ىسكە اسىرۋ باعىتىندا جۇمىستار جۇرگىزىپ جاتقانىن اتاپ ءوتتى. مەملەكەتتىك حاتشى ەۋروپا قايتا قۇرۋ جانە دامۋ بانكى «اقىلدى» ەكونوميكا قالىپتاستىرۋعا سەپتىگىن تيگىزەتىنىنە سەنىم ءبىلدىردى.
كەزدەسۋدە قازاقستان مەن ەۋروپا قايتا قۇرۋ جانە دامۋ بانكى اراسىنداعى ىنتىماقتاستىقتىڭ بىرقاتار وزەكتى ماسەلەلەرى تالقىلاندى. تاراپتار قارىم-قاتىناستىڭ قازىرگى دامۋ قارقىنىنا كوڭىل تولاتىنىن ايتىپ, بانكتىڭ ەنەرگەتيكا جانە تاۋ-كەن ءوندىرىسى سەكتورىنداعى جوبالارىن ىسكە اسىرۋ ماسەلەلەرى جونىندە پىكىر الماستى.
سونداي-اق, گەندەرلىك تەڭدىك پەن ايەلدەردىڭ ءرولىن ارتتىرۋ ماسەلەلەرى قارالدى. اڭگىمە بارىسىندا ۇكىمەت پەن ەۋروپا قايتا قۇرۋ جانە دامۋ بانكى اراسىنداعى كەلىسىم اياسىندا «بيزنەستەگى ايەلدەر» باعدارلاماسىنىڭ ىسكە اسىرىلىپ جاتقانى اتاپ ءوتىلدى. بۇگىندە 7 مىڭنان استام شاعىن جانە ورتا بيزنەس سۋبەكتىلەرىنە 5,8 ملرد تەڭگە قارىز بەرىلدى. قارجىلاندىرۋمەن قاتار, ەۋروپا قايتا قۇرۋ جانە دامۋ بانكى ايەلدەر باسشىلىق ەتەتىن شاعىن جانە ورتا بيزنەس كاسىپورىندارىنا باسقارۋ تاجىريبەلەرى مەن تەحنولوگيالاردى ەنگىزۋگە كومەكتەسەدى.
كەزدەسۋ سوڭىندا 31 تامىز – 1 قىركۇيەك ارالىعىندا استانادا وتەتىن «ايەلدەر بولاشاقتىڭ ەنەرگياسىن قولدايدى» اتتى حالىقارالىق فورۋمدا قاراستىرىلاتىن بالامالى ەنەرگەتيكا جانە «جاسىل» ەكونوميكا, ورنىقتى جانە ينكليۋزيۆتى ءوسىمدى قامتاماسىز ەتۋ ماسەلەلەرى تالقىلاندى.
ايتا كەتەيىك, قازاقستان 1992 جىلعى 27 شىلدەدەن باستاپ ەۋروپا قايتا قۇرۋ جانە دامۋ بانكىنىڭ مۇشەسى بولىپ سانالادى. بۇل بانك 1993 جىلدان بەرى قازاقستاندا جالپى قۇنى 7,3 ملرد ەۆرو بولاتىن (قازىرگى جيىنتىق كولەمى – 2,6 ملرد ەۆرو) 222 جوبانى قارجىلاندىردى.
