27 تامىزدا قوستاناي تەمىرجول اۋرۋحاناسى باسشىلارى مەن ماماندارى پويىزدى اقمولا وبلىسىنىڭ ەسىل ستانساسىنان كۇتىپ الدى. ەندى ول ارنايى جاسالعان كەستەگە سايكەس قوستاناي وبلىسىنىڭ 11 ستانساسىنا باراتىن بولادى.
«پويىز ەلىمىزدىڭ كونستيتۋتسيا كۇنى قارساڭىندا كەلىپ وتىر. مۇنىڭ وزىندىك ءمانى بار دەۋگە بولادى. ەلىمىزدىڭ ءاربىر ازاماتىنىڭ قولجەتىمدى ساپالى مەديتسينالىق كومەك الۋعا كونستيتۋتسيالىق قۇقى بار. ورتالىقتاردان تىم شالعايدا جاتقان اۋىلدار مەن باسقا دا ەلدى مەكەندەردە تۇرعىنداردىڭ ۋاقىتىلى مەديتسينالىق كومەك الۋى كەيبىر دارىگەر-مامانداردىڭ جەتىمسىزدىگىنە وراي قيىنداپ كەتەدى. «سالاماتتى قازاقستان», «دەنساۋلىق» پويىزدارىنىڭ ۇيىمداستىرىلۋى حالىققا مەديتسينالىق كومەكتىڭ ساپاسىن كوتەرۋدە وتە ءتيىمدى شەشىم بولىپ وتىر. وعان ءبىزدىڭ اۋرۋحانا بەلسەندى قاتىسىپ كەلەدى» دەدى «جگمك» اكتسيونەرلىك قوعامىنىڭ فيليالى–قوستاناي تەمىرجول اۋرۋحاناسىنىڭ باس دارىگەرى قاراتاي جايساڭباەۆ.
پويىز ءار ستانسادا توقتاپ, شالعاي ەلدى مەكەندەر تۇرعىندارىنا مەديتسينالىق قىزمەت كورسەتەتىن بولادى. پويىزدا گينەكولوگ, نەۆروپاتولوگ, كارديولوگ, حيرۋرگ, وفتالمولوگ, پەدياتر, وتولارينگولوگ, ستوماتولوگ, رەنتگەنولوگ, ەندوسكوپيست, ۆراچ ۋزي سەكىلدى ون بەس مامان بار.
ء«بىزدىڭ اۋرۋحانا ماماندارى «سالاماتتى قازاقستان», «دەنساۋلىق» مامانداندىرىلعان پويىزدارىندا جىل سايىن قىزمەت كورسەتىپ ءجۇر. تاجىريبەسى مول, بىلىكتى ماماندار قىزمەتىنە تۇرعىندار ريزا. دارىگەرلەر دەمالىسسىز جۇمىس ىستەيتىن بولادى, ولار تەمىرجولشىلار مەن شالعاي اۋىلداردىڭ تۇرعىندارىن كوبىرەك قامتۋدى باستى ماقساتى ەتىپ ۇستانىپ وتىر. مەديتسينالىق كومەكتىڭ بارلىعى اقىسىز كورسەتىلەدى. ءوزىنىڭ دەنساۋلىعى ءۇشىن الاڭدايتىن, بىراق وبلىس ورتالىعىنداعى ەمحانالارعا بارۋعا مۇمكىندىگى جوق ازاماتتار تەكسەرىلۋىنە, دارىگەرلەرگە ءوزىن تولعاندىرعان سۇراقتارىن قويۋىنا بولادى» دەيدى قوستاناي تەمىرجول اۋرۋحاناسى باس دارىگەرىنىڭ ورىنباسارى ءمارزيا ەسقازينا.
«سالاماتتى قازاقستان» پويىزى 16 قىركۇيەك كۇنى توعىزاق ستانساسىندا قوستاناي وبلىسىنداعى جۇمىسىن اياقتايدى.
ءنازيرا جارىمبەت,
«ەگەمەن قازاقستان»
