ارقالىق قالاسى مەن امانگەلدى اۋدانى وڭىرىندەگى كەيكى باتىرعا, 1916 جىلعى ۇلت-ازاتتىق كوتەرىلىسكە بايلانىستى تاريحي ورىنداردى ارالاۋدى, كەيكى باتىردىڭ جۇمباعى مول ومىرىمەن, ەرلىك ىستەرىمەن تانىسۋدى ءباسپاسوز تۋرىن وتكىزگەن «جاس ۇلان» بالالار مەن جاسوسپىرىمدەر ورتالىعى الدىنا ماقسات ەتىپ قويدى. تۋرعا قاتىسۋشىلار الدىمەن كەيكى باتىردىڭ قۇرىلىسى ءجۇرىپ جاتقان كەسەنەسىنە باردى, جۇمىستىڭ اياقتالۋعا جاقىن ەكەنىن كوردى. قازىر كەسەنەنىڭ اينالاسىن كوگالداندىرۋ, اباتتاندىرۋ جۇمىستارى ءجۇرىپ جاتىر. باتىردىڭ باس سۇيەگىن جەر قوينىنا تاپسىرۋدى راسىمدەۋ شاراسى وتەتىن 17 قىركۇيەككە دەيىن كەسەنە تولىق دايىن بولادى.
مۇنان تۋرعا قاتىسۋشىلار مىنگەن «گازەل» مەن تبرۋ گەولوگتارىنىڭ جۇردەك ماشيناسى قاراعاندى وبلىسىنىڭ ۇلىتاۋ اۋدانى وڭىرىندە ورنالاسقان دۋلىعالى مەشىتىنە بەت الدى. كەيكى باتىر جانە ونىڭ مەرگەندەرى, زامانداستارى كوتەرىلىسكە اتتانار الدىندا قۇلمۇحامبەت يشان سالدىرعان بەردىكەي يشان مەشىتىنە كەلىپ, اقسارباس ايتىپ, باتا الىپ, تاراعان ەكەن. قۇلمۇحامبەت يشان كەسەنىسىنىڭ ىشىندە كەيكى قاتىسقان جيىندا سويعان قوشقاردىڭ باس سۇيەگى 100 جىلدان بەرى ساقتالعان. ءباسپاسوز تۋرىنا قاتىسقاندار وسى جەرگە قونىپ, ەرتەڭىنە قۇلمۇحامبەت يشان مازارىنا بارىپ, قۇران باعىشتادى, ول سالدىرعان مەشىتتى كوردى. وتكەن عاسىردىڭ باسىندا سالىنعان مەشىتتىڭ قازىر قابىرعالارى عانا قالعان. حالىقتىڭ ىقىلاسىمەن ارنايى قۇرىلعان قور قارجىسىنا بۇحارادان كەلگەن قۇرىلىسشىلار مەن ساۋلەتشىلەر مەشىتتى قايتا قالپىنا كەلتىرۋ جۇمىستارىن قولعا الىپتى. قازىر سول جەردە كىرپىش دايىندالىپ جاتىر.
ءباسپاسوز تۋرىنا قاتىسۋشىلار جولدا امانكەلدى يمانوۆ بەلگىسىنە, ءبىرالى مەن احمەت كەسەنەلەرىنە, كەيكى باتىردىڭ قازا بولعان جەرىنە, راحمەت باي كەسەنەسىنە, كوشىمبەك كەسەنەسىنە, ۇرپەك اۋىلىنداعى امانكەلدىنىڭ شتاب-پاتەرىنە سوقتى. ارۋاقتارعا قۇران باعىشتادى, تاريحي ورىندار تۋرالى ولكەتانۋشىلار ايتقان قىزىقتى دەرەكتەردى, اڭگىمەلەردى تىڭدادى. سونىمەن قاتار ءباسپاسوز تۋرىنا قاتىسۋشىلار قايتار جولدا امانكەلدى اۋدانىنداعى تورعاي سۆاستيكاسىن–ۇشايىرىعىن تاماشالادى.
ءباسپاسوز تۋرىنىڭ ءۇشىنشى كۇنى ارقالىق قالاسىندا ساپار بارىسىن قورىتىندىلاعان «دوڭگەلەك ۇستەل» ءماجىلىسىن وتكىزدى.
ءنازيرا جارىمبەت,
«ەگەمەن قازاقستان»
قوستاناي-امانكەلدى-ارقالىق- ۇلىتاۋ-ارقالىق-قوستاناي
