قاتىسۋشىلار 5 كۇن ىشىندە اسحات ابجانوۆ, اسقار اسكەروۆ, سۆەتلانا درۋز, اسلان ەسجان ۇلى سەكىلدى تابىستى كاسىپكەرلەردىڭ ترەنينگتەرىندە يننوۆاتسيالىق تەحنولوگيالار, كراۋدفاندينگ, وراتورلىق, كوپشىلىك الدىندا سويلەۋ ونەرى, ەلباسىنىڭ «رۋحاني جاڭعىرۋ» باعدارلاماسىنداعى ماڭىزدى ويلاردىڭ ءبىرى رەتىندە سانا جاڭعىرتۋىنا بايلانىستى تاقىرىپتارعا شولۋ جاساپ, بىلىمدەرىن كەڭەيتتى. تاعىلىمدامادان ءوتۋ باعدارلاماسى, سونىمەن قاتار, الدىڭعى قاتارلى شاعىن جانە ورتا بيزنەس كاسىپورىندارىنا بارىپ, تاجىريبە جيناقتاۋدى كوزدەيدى.
دەلەگاتتار مۇمكىندىگى شەكتەۋلى جاستارعا ارنالعان «اسار» فيتنەس كلۋبىندا, «تيۋرسكي دۆوريك» دەمالىس بازاسىندا, «قاينار-اكب» اككۋمۋلياتور زاۋىتىندا, «ارلەن» بالا-باقشاسىندا, «TANDOOR» كافەسىندە جانە ت.ب. كاسىپورىنداردا بولدى. وعان قوسا, قر الماتى وبلىسىنىڭ «اتامەكەن» ۇلتتىق كاسىپكەرلەر پالاتاسىندا بولىپ, شوب قولداۋ جونىندە مەملەكەتتىك شارالار تىزبەگىمەن تانىستى. تاعىلىمدامانىڭ جابىلۋ سالتاناتىندا بارلىق قاتىسۋشىلارعا جوباعا قاتىسقانى جونىندە سەرتيفيكاتتار تابىستالدى.
ن.ءا.نازارباەۆ «بولاشاققا باعدار: رۋحاني جاڭعىرۋ» ماقالاسىندا ايتقانداي, سانانىڭ اشىقتىعى – ول جاڭا تەحنولوگيانىڭ اعىنى الىپ كەلەتىن وزگەرىستەردىڭ بارىنە دايىن بولۋ دەگەن ءسوز. تاياۋداعى ون جىلدا ءبىزدىڭ ءومىر سالتىمىز: جۇمىس, تۇرمىس, دەمالىس, باسپانا, ادامي قاتىناس تاسىلدەرى, قىسقاسى, بارلىعى تۇبەگەيلى وزگەرەدى. ءبىز بۇعان دا دايىن بولۋىمىز كەرەك. جاستار كاسىپكەرلىگىنە قولداۋ كورسەتۋ ماقساتىندا قازاقستان جاستارىنىڭ كونگرەسى جانە قر ءدىن ىستەرى جانە ازاماتتىق قوعام مينيسترلىگى جىل سايىن جاستار بيزنەس-تاعىلىمدامالارىن وتكىزىپ كەلەدى. بۇل جوبا جاستاردىڭ ءوز ىستەرىن اشۋعا, بولۋى مۇمكىن تاۋەكەلدەردى ەسەپتەۋگە جانە باسقا دا كاسىپكەرلەرمەن تاجىريبە الماسۋعا مۇمكىندىك بەرەدى. 2016 جىلدان بەرى بۇگىندە 90 جاس قىز-جىگىتتەر تاعىلىمدامادان ءساتتى ءوتتى. جوبانى جۇزەگە اسىرۋداعى بارلىق سەرىكتەستەرىمىزگە العىس بىلدىرەمىن», - دەپ «قازاقستان جاستارىنىڭ كونگرەسى» زتب-ءنىڭ اتقارۋشى ديرەكتورى ءسابيتوۆ ايدىن مارات ۇلى شارا ماڭىزدىلىعىن اتاپ ءوتتى.
تاعىلىمدامانىڭ باستى ماقساتى – جاستاردىڭ يننوۆاتسيالىق جانە كاسىپكەرلىك الەۋەتىن ارتتىرۋعا جاردەمدەسۋ جانە اشۋ, بۇگىنگى كۇنى جۇمىس بارىسىنداعى شوب كاسىپورىندارىنىڭ ءىس-شارالارىمەن تانىستىرۋ ارقىلى جاس كاسىپكەرلەردىڭ قۇزىرەتتىلىگىن جوعارىلاتۋ.
جوبانىڭ ەڭ جاس قاتىسۋشىلارىنىڭ ءبىرى الماتىلىق مۇحيت اسقار ۇلى: «مەنىڭ جاسىم 19-دا. مەن «Qazaqstanwatches» ينتەرنەت-دۇكەنىنىڭ جەتەكشىسىمىن, الەۋمەتتىك جەلىلەر جانە ينتەرنەت ارقىلى قول ساعاتتارىن ساتۋمەن اينالىسامىن. جاستار بيزنەس-تاعىلىمدامالارى جوباسىنان بيزنەستەگى باستى ماقساتتارىما جەتۋگە جاقسى كەڭەستەر, كاسىبي كونسۋلتاتسيا جانە ءوز كاسىبىمدى دامىتۋعا ارنالعان اقپاراتقا كەڭىنەن قانىق بولدىم. ۇيىمداستىرۋشىلارعا وتە ريزامىن».
جاستار كاسىپكەرلىگىنىڭ دامۋى زاماناۋي كەزەڭدە حالىق اراسىنداعى ەڭبەكپەن قامتۋ كورسەتكىشتەرىنىڭ جوعارىلاۋىنا جانە بىلىكتى قىزمەتكەرلەر دايىنداۋعا عانا ەمەس, ەلىمىزدىڭ يننوۆاتسيالىق دامۋ جولىنا تەزىرەك وتۋىنە جاعداي جاساۋى قاجەت.
مەملەكەتتىڭ ەكونوميكالىق تۇراقتىلىعىنىڭ نەگىزگى تىرەگىن ءدال وسى بيزنەس قۇرايدى. جاستارعا وسى نارسە وقىتۋ بارىسىندا-اق ءتۇسىندىرىپ, قاجەتتى قۇزىرەتتىلىكتەرىنىڭ قالىپتاسۋىنا كومەك بەرۋ وتە ماڭىزدى.
