جيىن بارىسىندا وتكەن وقۋ جىلى قورىتىندىلانىپ, جاس ۇرپاقتى تاربيەلەۋ مەن وقىتۋداعى ۇستازداردى تولعاندىرىپ جۇرگەن وزەكتى ماسەلەلەر مەن ايماقتاعى ءبىلىم بەرۋ جۇيەسىن جەتىلدىرۋدەگى نەگىزگى ماقساتتار مەن مىندەتتەر ايقىندالىپ, جالپى رەسپۋبليكادا ءبىلىم سالاسىنا ەنگىزىلىپ جاتقان جاڭالىقتار تانىستىرىلدى.
ءداستۇرلى تامىز كونفەرەنتسياسىنا قىزىلوردا وبلىسىنىڭ اكىمى قىرىمبەك كوشەرباەۆ, قر ءبىلىم جانە عىلىم مينيسترلىگىنىڭ مەكتەپكە دەيىنگى جانە ورتا ءبىلىم دەپارتامەنتىنىڭ ديرەكتورى شولپان كارينوۆا, ىبىراي التىنسارين اتىنداعى ۇلتتىق ءبىلىم اكادەمياسىنىڭ ۆيتسە-پرەزيدەنتى ماريامكۇل مۇقاتاەۆا, «نازارباەۆ زياتكەرلىك مەكتەپتەرى» دەربەس ءبىلىم بەرۋ ۇيىمى ءبىلىم بەرۋ باعدارلامالارى ورتالىعىنىڭ ديرەكتورى جانار ابديلدينا, قر پارلامەنتى سەناتىنىڭ دەپۋتاتى مۇرات باقتيار ۇلى, ارداگەر ۇستازدار ت.ب قاتىستى.
ايتا كەتەيىك, تامىز كەڭەسىنە وبلىس اۋداندارى دا ونلاين رەجيمدە قاتىستى.
ايماق باسشىسى رۋحاني جاڭعىرۋدىڭ باستى تىرەگى -ۇستازدار, ال, ونىڭ ىسكە اسىرىلاتىن نەگىزگى الاڭى – ءبىزدىڭ وقۋ ورىندارى ەكەندىگىن اتاپ ءوتتى.
- مەن بۇگىن سىزدەردىڭ الدارىڭىزعا وبلىستىڭ اكىمى عانا ەمەس, وزدەرىڭىز جاقسى بىلەتىن “رۋحاني جاڭعىرۋ” باعدارلاماسىن ىسكە اسىرۋ جونىندەگى ۇلتتىق كوميسسيانىڭ مۇشەسى جانە وسى باعدارلامانىڭ ءار تاراۋى مەن ءار قادامىن شىن جۇرەكتەن جاقتاۋشى, جاناشىر ازامات رەتىندە كەلىپ تۇرمىن. رۋحاني جاڭعىرۋدىڭ مەكتەپ جانە ۇستازدار ءۇشىن اسا ماڭىزدى بولۋىنىڭ بىرنەشە سەبەبى بار. رۋحاني جاڭعىرۋ – مەملەكەت پەن قوعامدى ىشىنەن جاڭارتۋدىڭ, ادامنىڭ ساناسىن وزگەرتۋ ارقىلى ەلگە جاڭا ساپا بەرۋدىڭ الەمدە بالاماسى جوق, ەرەكشە باعدارلاما. بۇل باعدارلاما ۇلتتىق سيپاتتا, بىراق, جەكە تۇلعالىق دەڭگەيدە ىسكە اسادى. ياعني, قوعامدىق سانا, جەكە تۇلعالىق سانانىڭ وزگەرۋى نەگىزىندە ىسكە اسادى. سوندىقتان دا, بۇل باعدارلامانىڭ ءار قادامى ۇرپاق, ياعني تۇلعا تاربيەلەۋ, ازامات ءوسىرۋ, مامان دايىنداۋ جۇمىسىمەن قاتار جۇرەدى,- دەدى وبلىس اكىمى قىرىمبەك كوشەرباەۆ.
ايتا كەتەيىك, وبلىستا ءبىلىم بەرۋ سالاسىن قارجىلاندىرۋ جىل سايىن ءوسىپ كەلەدى. سالا بيۋدجەتى 2015 جىلى 63,9 ملرد. تەڭگەنى قۇراعان بولسا, 2016 جىلى ول 70,0 ملرد.-قا جەتىپ, 2017 جىلى ءبىلىم بەرۋ سالاسىنىڭ قارجىسى 2013 جىلمەن سالىستىرعاندا 2 ەسەگە ءوسىپ, 89,3 ملرد. تەڭگەنى قۇرادى. وبلىستاعى ءبىلىم بەرۋ قىزمەتى جالپى سانى 293 بولاتىن 9 باستاۋىش, 24 نەگىزگى ورتا, 260 جالپى ءبىلىم بەرەتىن ورتا مەكتەپتەردە جۇرگىزىلەتىن بولادى. ونىڭ ىشىندە شاعىن جيناقتالعان مەكتەپتەر سانى – 22.
وبلىستىق ءبىلىم باسقارماسىنىڭ باسشىسى باقىتجان سايلىباەۆتىڭ ايتۋىنشا سوڭعى ءۇش جىلدا وبلىس تۇلەكتەرى ۇبت قورىتىندىسى بويىنشا جوعارى بالل جيناپ, رەسپۋبليكاداعى ۇزدىك بەستىكتىڭ قۇرامىنا ەنىپ وتىر. ماسەلەن, بىلتىرعى وقۋ جىلىندا مەكتەپ بىتىرگەن 6564 تۇلەكتىڭ 95% كولەدجدەر مەن ۋنيۆەرسيتەتتەردە مەملەكەتتىك ءبىلىم گرانتى جانە اقىلى نەگىزدە بىلىمدەرىن جالعاستىرۋعا قول جەتكىزدى. 2017 جىلى 6196 تۇلەكتىڭ 4123-ءى جاڭا فورماتتاعى ۇبت سىناعىنان ءوتىپ, ورتاشا 82,4 بالمەن رەسپۋبليكا بويىنشا ءوز ءبىلىم دەڭگەيلەرىنىڭ جوعارى ەكەندىگىن تاعى دا دالەلدەدى.
كونفەرەنتسيا بارىسىندا قر ءبىلىم جانە عىلىم مينيسترىلىگىنىڭ مەكتەپكە دەيىنگى جانە ورتا ءبىلىم دەپارتامەنتىنىڭ ديرەكتورى ش. كارينوۆا, ا. التىنسارين اتىنداعى ۇلتتىق ءبىلىم اكادەمياسىنىڭ ۆيتسە-پرەزيدەنتى م. ە. مۇقاتاەۆا, وبلىستىق ءبىلىم باسقارماسىنىڭ باسشىسى ب.سايلىباەۆ بايانداما جاساپ, اۋداندارداعى ۇستازدار ونلاين-رەجيمدە وزدەرىنىڭ كوكەيتەستى ساۋالدارىن جولدادى.
ەستەرىڭىزگە سالا كەتەيىك, قىزىلوردا وبلىسىندا ءۇش اۋىسىمدى مەكتەپتەر ماسەلەسى مەن 3 پەن 6 جاس ارالىعىنداعى بالالاردى مەكتەپكە دەيىنگى ءبىلىم بەرۋمەن قامتۋ تولىعىمەن شەشىلدى. ەندى جىل سوڭىنا دەيىن اپاتتى جاعدايداعى مەكتەپتەر ماسەلەسى تۇبەگەيلى شەشىلەدى دەپ جوسپارلانۋدا.
