بۇل سىندا التىن مەدال پورتۋگاليالىق اتلەت ديوگو فەررەيراعا بۇيىردى. ونىڭ كورسەتكىشى – 5,55 مەتر. ال ۇزدىك ۇشتىكتى 5,40 مەتر ناتيجەمەن يتاليالىق سپورتشى كلاۋديو ستەكي تۇيىندەدى.
سونىمەن, بۇگىنگى كۇنگە دەيىن قازاقستان قۇراماسىنىڭ قورجىنىنا 3 التىن, 5 كۇمىس جانە 6 قولا جۇلدە ءتۇستى. جالپىكوماندالىق ەسەپتە ءبىزدىڭ سپورتشى ستۋدەنتتەر 14 مەدالمەن 17-ءشى ورىندا كەلەدى.
بۇل سىندا جاپونيا قۇراماسى كوش تىزگىنىن بەرەر ەمەس. قازىرگى ۋاقىتتا كۇنشىعىس ەلى ستۋدەنتتەرىنىڭ ەنشىسىندە 78 مەدال بار (30 التىن, 20 كۇمىس جانە 28 قولا). وڭتۇستىك كورەيا سپورتشىلارى 71 جۇلدەمەن (27, 18, 26) ەكىنشى ورىندا تۇر. ال ءۇشىنشى ساتىعا تابان تىرەگەن تايۆان قۇراماسىنىڭ قورجىنىندا 67 مەدال بار (18, 28, 26).
كەشە تايپەيدەگى ستۋدەنتتەر سايىسىندا ونەر كورسەتكەن ءبىر توپ قازاقستاندىق سپورتشى ەلگە ورالدى. ولاردىڭ اراسىندا جازعى ۋنيۆەرسيادانىڭ چەمپيوندارى زىلتەمىرشى دەنيس ۋلانوۆ, ايدار قازوۆ جانە البەرت ليندەر بولدى. سپورتشىلاردى الماتى اۋەجايىندا قارسى العان جانكۇيەر قاۋىم ەل نامىسىن لايىقتى قورعاعان جەڭىمپازدار مەن جۇلدەگەرلەرگە لايىقتى قوشەمەت كورسەتتى.
ء«وزىمنىڭ كورسەتكەن ونەرىمە كوڭىلىم تولدى. جارىسقا جۇلدە الامىن دەپ نىق سەنىممەن بارىپ ەدىم», دەدى باق وكىلدەرىنە بەرگەن سۇحباتىندا البەرت ليندەر.
سونىمەن قاتار, ۋنيۆەرسيادادان العان اسەرىمەن سايىستىڭ كۇمىس جۇلدەگەرى, تاەكۆوندوشى قىزىمىز جانسەل دەنيز دە ءبولىستى. «مەنىڭ فينالداعى قارسىلاسىم وتە مىقتى سپورتشى بولدى, ءوزى ازيا چەمپيونى. شەشۋشى جەكپە-جەكتە تاجىريبە تارازى باسىن تارتىپ كەتتى. دەگەنمەن, مەن ءوزىم ءۇشىن كوپتەگەن جاڭالىق اشتىم. بۇل ۋنيۆەرسيادا سىنىندا العان تاجىريبەم بولاشاقتاعى جەڭىستەرىمە باسپالداق بولادى دەگەن سەنىمدەمىن», دەدى تۇركيادا تۋىپ, ءوزىنىڭ تاريحي وتانىنا ورالعان ەرجۇرەك قىز.
ەرتەڭ ءححىح جازعى ۋنيۆەرسيادا ءوزىنىڭ مارەسىنە جەتەدى.
قايرات ءابىلدا,
«ەگەمەن قازاقستان»
