كورمەگە مەملەكەتتىك مۋزەيدىڭ قورىندا ساقتاۋلى بەلگىلى عالىمداردىڭ جەكە كەشەندەرى قويىلعان. ونىڭ ىشىندە قازاقستان عىلىم اكادەمياسىنىڭ نەگىزىن قالاۋشى, ەلىمىزدە گەولوگيالىق ينستيتۋتتى قۇرۋعا بەلسەنە ارالاسقان اكادەميك قانىش ساتباەۆتىڭ, ەتنوارحەولوگ, شىعىستانۋشى, تاريحشى-عالىم الكەي مارعۇلاننىڭ جەكە بۇيىمدارى كەلۋشىلەر نازارىنا ۇسىنىلدى. بۇل كورمەنىڭ كەلەسى ەكسپوزيتسياسى كەزىندە ەسىك وباسىنان تابىلعان «التىن ادامدى» زەرتتەۋشى, مەملەكەتتىك سىيلىقتىڭ لاۋرەاتى, تاريح عىلىمدارىنىڭ دوكتورى كەمەل اقىشەۆتىڭ, ەتنوگراف, ارحەولوگ, تاريح عىلىمدارىنىڭ دوكتورى پروفەسسور, قازاقستان حالىقتارى شارۋاشىلىق مادەنيەتى مەن تۇرمىسىن تياناقتى تۇردە باياندايتىن كوپتەگەن عىلىمي-تانىمدىق مونوگرافيالاردىڭ اۆتورى حالەل ارعىنباەۆتىڭ جەكە كەشەندەرى قويىلماق.
سونداي-اق, كورمەدە العاشقى عالىم ايەل-پالەونتولوگ, پالەوزوولوگ, بيولوگيا عىلىمىنىڭ كانديداتى, رەسەي پالەونتولوگيا قوعامىنىڭ قۇرمەتتى مۇشەسى ب.قوجامقۇلوۆانىڭ فوتوقۇجاتتارى قويىلدى.
كورمەنىڭ «تاۋەلسىز قازاقستاننىڭ عالىمدارى – اكادەميكتەر» دەپ اتالاتىن ەكىنشى ءبولىمى اكادەميكتەر س.زيمانوۆ, م.اسىلبەكوۆ, ج.قاسىمباەۆ, م.قوزىباەۆ, ا.قوشانوۆ, ە.ەرعوجين جانە باسقا عالىمداردىڭ جەكە كەشەندەرىنە ارنالعان. بۇل ءبولىم قازاقستاننىڭ زاڭ عىلىمدارىنىڭ باستاۋىندا تۇرعان, زاڭگەرلىك ءبىلىمنىڭ دامۋىنا زور ۇلەس قوسقان, 200-دەن اسا عىلىمي ەڭبەكتىڭ, ونىڭ ىشىندە 12 مونوگرافيانىڭ اۆتورى, اكادەميك س.زيمانوۆقا ارنالعان ەكسپوزيتسيادان باستالادى.
كورمەدە قويىلعان ءاربىر زات جاستارعا ەرتەڭ قاجەتتىگىمەن قۇندى ەكەندىگىن تۇيسىنەسىز.
ساپارباي پارمانقۇل,
«ەگەمەن قازاقستان»
الماتى
