شاراعا جوعارى وقۋ ورىندارىنىڭ وقىتۋشى-عالىمدارى, اۋدارماشىلار, رەداكتورلار, باسپاگەرلەر, ءتىلشى جانە ادەبيەتشى ماماندار مەن جاۋاپتى مەكەمەلەردىڭ وكىلدەرى قاتىستى. باسقوسۋدا جوبا اياسىنداعى عىلىمي تەرميندەر مەن ۇعىمداردى قازاق تىلىنە اۋدارۋ, وزگە تىلدەردەن ەنگەن سوزدەر قولدانىسى, تەرمينولوگيا, ستيل, اۋدارماشىلار ورتاسىنىڭ كاسىبي دەڭگەيىن كوتەرۋ ماسەلەسى ءسوز بولدى.
جيىندا پسيحولوگيا, الەۋمەتتانۋ, مادەنيەتتانۋ, ەكونوميكا, ءتىل, ءدىن سالالارى بويىنشا جەلتوقسان ايىندا جارىققا شىعۋى ءتيىس ون جەتى كىتاپ تالقىلاندى. كىتاپتار تىكەلەي تۇپنۇسقادان اۋدارىلىپ جاتقاندىقتان, جارىققا شىققانشا ءتورت دەڭگەيدەن وتەدى. اۋدارماشىلار مەن ادەبي رەداكتورلار, تىلشىلەر تىعىز جۇمىس ىستەپ جاتىر. اۋدارماشىلار – عىلىمي دارەجەسى بار, شەت ءتىلىن مەڭگەرگەن سالا ماماندارى. «ۇلتتىق اۋدارما بيۋروسى» قوعامدىق قورىنىڭ باسشىسى راۋان كەنجەحان ۇلى: «جالپى سانى 800-گە تارتا وقۋلىق ۇسىنىلدى. سونىڭ ىشىنەن ورىس تىلىنە اۋدارىلماعان ۇزدىك ون جەتى كىتاپ ىرىكتەلىنىپ الىندى. بۇل كىتاپتار – الەمدەگى جەتەكشى وقۋ ورىندارىنىڭ باسپالارىنان شىققان وقۋلىقتار. وسى كىتاپتاردى اۋدارۋ ءۇشىن توقسان ادامنان قۇرىلعان جۇمىس توبى ىرىكتەلدى. ءار وقۋلىققا جاۋاپتى ءوز ادامدارى بار. بۇل جۇمىس بىرنەشە كەزەڭنەن تۇرادى. وقۋلىقتار ستۋدەنتتەرگە ارنالعاننان كەيىن, ونىڭ اۋدارماسىنىڭ جاتىق, قازاقشا تولىق تۇسىنىكتى بولۋىن قاتاڭ قاداعالاپ وتىرمىز», دەدى.
تالقىلاۋ بارىسىندا ءتىلشى-عالىمدار شەرۋباي قۇرمانباي ۇلى مەن انار فازىلجانوۆا احمەت بايتۇرسىنوۆ اتىنداعى ءتىل ءبىلىمى ينستيتۋتىنىڭ شىعارعان تەرمينولوگيالىق سوزدىكتەرى مەن تۇسىندىرمە سوزدىكتەرىن كەڭىنەن پايدالانۋ مەن اۋدارماداعى قاتە ۇعىمداردى جىپكە تىزگەندەي ايقىنداپ بەردى. اسىرەسە, فيلوسوفيا وقۋلىقتارىنىڭ تىلىنە كوپ سىن ايتىلعانىمەن, وسى جولى ماماندار اۋدارما ساپاسىنىڭ جوعارى بولاتىنىن ايتتى.
باعاشار تۇرسىنباي ۇلى,
«ەگەمەن قازاقستان»
الماتى
