ەندى ساناۋلى كۇندەردەن كەيىن جاڭا وقۋ جىلى باستالادى. قىركۇيەك كەلىپ, كۇز تۇسكەندە وقۋشىلار اسقاق ارمانمەن, ۇكىلى ۇمىتپەن ءبىلىم الۋ ماقساتىندا التىن ۇياعا بەتتەيدى. بۇل كۇندە اتا-انالار جاڭا وقۋ جىلىنا جاپپاي قام جاساپ, بالالارىنىڭ كەرەك-جاراقتارىن تۇگەندەۋ ۇستىندە ەكەنى بەلگىلى. راسىندا دا الەمدىك ءبىلىم باسەكەسىندەگى قابىلەتتىلىك بۇگىنگى بۇلدىرشىندەردەن باستاۋ الادى. ال بالعىندار دەر كەزىندە لايىقتى ءبىلىم الىپ, باعىتىن ايقىنداپ السا, باعىندىرار بيىك تە الىس ەمەس.
جاڭا وقۋ جىلى جاقىنداعان سايىن اتا-انالاردىڭ دا, ۇستازداردىڭ دا جاۋاپكەرشىلىگى كۇشەيە تۇسەتىنى انىق. بۇل جەرگىلىكتى بيلىكتىڭ دە نازارىنان تىس قالمايتىن ماسەلە. دەگەنمەن, جامبىلدىقتار جاڭا وقۋ جىلىنا دايىن با دەگەن ماسەلە توڭىرەگىندە وڭىردەگى ءبىلىم وشاقتارىنىڭ بۇگىنگى جاي-كۇيىن شولىپ شىقتىق. اسىرەسە, اپاتتى جانە ءۇش اۋىسىمدى مەكتەپتەردىڭ جايى تولعاندىرارلىق.
بۇل كۇندە وبلىستا ءبىلىم بەرۋ جۇيەسىن دامىتۋعا كوپ كوڭىل ءبولىنىپ وتىرعانى ءجيى ايتىلىپ كەلەدى. بيىل وبلىستاعى ءبىلىم مەكەمەلەرىن قارجىلاندىرۋعا 97,9 ميلليارد تەڭگە بولىنگەن. سونداي-اق, وقۋشىلاردى وقۋلىقپەن قامتاماسىز ەتۋ ماقساتىندا 1 ميلليارد 870 ميلليون 23 مىڭ تەڭگە قاراستىرىلعان. مۇنىڭ ءبارى دە مەملەكەتتىڭ بالالار بولاشاعىنا جاساپ وتىرعان قامقورلىعى ەكەنى داۋسىز. سوندىقتان دا ءبىلىم باسەكەسىندە باعىتىمىز ايقىن ەكەنىنە كوز جەتكىزۋگە بولادى.
اپاتتى مەكتەپتەر ءۇشىن الاڭداۋعا نەگىز بار
ەلباسى اۋەلى اپاتتى مەكتەپتەردى قالپىنا كەلتىرۋدى جانە ءۇش اۋىسىمدا وقىتۋدى جويۋدى تاپسىرعانى بەلگىلى. ءارى بۇل جاعداي بۇگىندە اتا-انالاردىڭ دا الاڭداۋشىلىعىن تۋدىرىپ وتىر. سوندىقتان دا وڭىرلەردە اپاتتى مەكتەپتەردەن ارىلۋدىڭ جان-جاقتى جولى قاراستىرىلىپ, كوپتەگەن اپاتتى مەكتەپتەر قالپىنا كەلتىرىلۋدە. جالپى, جامبىل وبلىسىندا جىل باسىندا 9 مەكتەپ اپاتتى جاعدايدا دەپ تىركەلگەن. وبلىستىق ءبىلىم باسقارماسىنىڭ مالىمەتىنشە, 4 مەكتەپ اعىمداعى جىلى جاڭا قۇرىلىس ەسەبىنەن پايدالانۋعا بەرىلسە, 3 مەكتەپتىڭ ماسەلەسى كەلەسى جىلى شەشىلەدى. ال قالعان 2 مەكتەپتىڭ ماسەلەسى 2018-2019 جىلدارى كەزەڭ-كەزەڭىمەن شەشىلەدى دەپ جوسپارلانۋدا. ياعني, جامبىل وبلىسىندا اپاتتى جاعدايداعى مەكتەپتەردىڭ ماسەلەسىن 2019 جىلى شەشۋگە تولىق مۇمكىندىك بار. سونىمەن قاتار, ءۇش اۋىسىمدى مەكتەپتەردىڭ دە جايى تولعانتارلىق. ء«ۇش اۋىسىمدى مەكتەپتەردىڭ ماسەلەسى دە باستى نازاردا. جاڭا وقۋ جىلىندا ءۇش اۋىسىمدى 1 مەكتەپ «نۇرلى جول» باعدارلاماسى اياسىندا ۇلتتىق قور ەسەبىنەن پايدالانۋعا بەرىلەدى. ال 3 مەكتەپتىڭ قۇرىلىسى اعىمداعى جىلى ۇلتتىق قور ەسەبىنەن باستالىپ, 2018 جىلى اياقتالادى. قالعان 1 مەكتەپتىڭ جوبالاۋ-سمەتالىق قۇجاتتارى دايىندالىپ, مەملەكەتتىك ساراپتاماعا وتكىزىلدى. سونداي-اق, مەكتەپكە دەيىنگى تاربيەمەن قامتىلعان بالالار ۇلەسىن ارتتىرۋ ماقساتىندا ناقتى جۇمىستار اتقارىلۋدا», دەيدى وبلىستىق ءبىلىم باسقارماسىنىڭ باسشىسى راحيا تۇرماحانبەتوۆا.
قۇرىلىس قانات جايىپ كەلەدى
اۋليەاتا وڭىرىندە مەكتەپتەردىڭ قۇرىلىسى قارقىندى قانات جايىپ كەلەدى. ال ءۇش اۋىسىمدى مەكتەپتىڭ ازابى اتا-انالارعا دا وڭاي ەمەس ەكەنى بەلگىلى.
جالپى, وبلىستا ءۇش اۋىسىممەن وقىتاتىن 5 مەكتەپ بار. مەركى اۋدانى ق.سارىمولداەۆ اۋىلىنداعى 600 ورىندىق جاڭا مەكتەپتىڭ قۇرىلىسى مەرزىمىنەن بۇرىن اياقتالىپ وتىر. ايتا كەتەيىك, 600 ورىندىق مەكتەپتىڭ قۇرىلىسىنا رەسپۋبليكالىق بيۋدجەتتەن 1 ميلليارد 179 ميلليون تەڭگە بولىنگەن بولاتىن. ناتيجەسىندە جاڭا وقۋ جىلىنان باستاپ مەركىلىك جەتكىنشەكتەر زامان تالابىنا ساي ءبىلىم وشاعىندا وقيتىن بولادى. سونىمەن قاتار, تاراز قالاسى №24 ورتا مەكتەپتىڭ 300 ورىندىق قوسالقى عيماراتى, تاراز قالاسى ءشولدالا يىنىندەگى 900 ورىندىق جانە بايزاق اۋدانى بايزاق اۋىلىندا 300 ورىندىق ءبىلىم وشاقتارىندا قۇرىلىس جۇمىستارى قارقىن الىپ تۇر. اتالعان مەكتەپتەر كەلەسى جىلى پايدالانۋعا بەرىلمەك.
«نۇرلى جول» باعدارلاماسى شەڭبەرىندە سالىنىپ جاتقان تاراز قالاسىنداعى 1000 ورىندىق ورتا مەكتەپ جانە جەرگىلىكتى بيۋدجەت ەسەبىنەن بوي كوتەرگەن سارىسۋ اۋدانى, دوسبول اۋىلىنداعى 50 ورىندىق, سونداي-اق, تالاس اۋدانى قاراوي اۋىلىنداعى 50 ورىندىق ورتا ءبىلىم مەكەمەلەرى دە جاڭا وقۋ جىلىنا دايىن. مۇندا دا تالاي جەتكىنشەكتەر ءبىلىم الىپ, ەگەمەن ەلدىڭ ەرتەڭى بولىپ قالىپتاساتىنىنا سەنىم مول.
ءتۇيىن
اعىمداعى جىلى جامبىل وبلىسىندا 22 ءبىلىم نىسانىنا كۇردەلى جوندەۋ جۇمىستارى جۇرگىزىلسە, وسى ماقساتتا وبلىستىق بيۋدجەتتەن 3158,214 مىڭ تەڭگە قاراجات بولىنگەن. سونىمەن قاتار, 135 ءبىلىم نىسانىنىڭ دا اعىمداعى جوندەۋدەن وتكىزىلگەنىن ايتا كەتۋ كەرەك. وعان 125 ميلليون 527 مىڭ تەڭگە كولەمىندە قارجى قاراستىرىلعان ەكەن.
ەلباسى ۇنەمى ءبىلىم باسەكەسىندەگى قابىلەتتىلىك تۋرالى ايتىپ كەلەدى. ءبىلىمدى ۇرپاقتىڭ عانا باقىتى مول, ىرىسى شالقار بولماق. ال زامان تالابىنا ساي مەكتەپتەن ءبىلىم الىپ شىققان ورەن ەرتەڭ-اق ەلگە تۇتقا بولاتىن ازاماتقا اينالادى.
حاميت ەسامان,
«ەگەمەن قازاقستان»
جامبىل وبلىسى
