جەكپە-جەكتىڭ ءبىرىنشى راۋندىنان باستاپ ف.ءشارىپوۆا قارسىلاسىن بۇرىشتان-بۇرىشقا تىقسىرىپ, بەلسەندىلىگىن بايقاتتى. ال قارسىلاسى م.كولەۆا قورعانىسقا كوپ كوڭىل ءبولىپ, ءساتى تۇسكەندە عانا قارسى شابۋىلداۋمەن بولدى. راۋند سايىن قارقىنىن ارتتىرعان وتانداسىمىز ءدوپ سوققىلارىمەن كوزگە ءتۇستى. بولگار قىزى دا بۇل كەشكە جاقسى دايىندىقپەن كەلگەنىن, تاجىريبەلى بوكسشى ەكەنىن بايقاتتى. جەرلەسىمىز 10 راۋند بويى سوققىنىڭ استىنا العانىمەن, قارسىلاسى جەكپە-جەكتىڭ سوڭىنا دەيىن نوكاۋتقا تۇسكەن جوق. تورەشىلەر جەڭىستى ءبىراۋىزدان وتانداسىمىزعا بەردى.
ءسويتىپ, فيرۋزا ءشارىپوۆا جەڭىل سالماقتا WIBA جانە WBU تۇجىرىمدارى بويىنشا چەمپيوندىق اتاققا قول جەتكىزدى. سونىمەن قاتار, ول ايەلدەر اراسىندا كاسىپقوي بوكستان قازاقستاننان شىققان تۇڭعىش الەم چەمپيونى اتاندى. جەكپە-جەكتەن كەيىن جەرلەسىمىز قولداۋعا كەلگەن جانكۇيەرلەرگە العىسىن ءبىلدىردى. «مەنى قولداۋعا كەلگەن بارشالارىڭىزعا العىسىم شەكسىز. جاتتىقتىرۋشىلارىم مەن اتا-اناما راحمەتىمدى ايتامىن. بۇل جەڭىسكە ۇلكەن ەڭبەكتىڭ ارقاسىندا قول جەتكىزدىك. كومانداما راحمەت. العا, قازاقستان», – دەدى بوكسشى قىز.
ءشارىپوۆا-كولەۆا بوكس كەشىنىڭ اندەركارتىندا بىرنەشە قازاق بوكسشىسى وزدەرىنىڭ كەزەكتى كەزدەسۋلەرىن وتكىزدى. ەكىنشى ورتا سالماقتاعى ايدىن ەلجانوۆ (4-0, 3 كو) دەبيۋتتىك كەزدەسۋىن وتكىزگەن وتانداسىمىز ابىلايحان ەسەنتاەۆتى (0-1) ەكىنشى راۋندتا تەحنيكالىق نوكاۋتپەن ۇتتى. ال ورتا سالماقتاعى بوكسشىمىز تاميرلان رايىمقۇلوۆ (1-0-1, 0 كو) وزبەكستاندىق قارسىلاسى ستەپان پارتنوۆتان (0-1) باسىم ءتۇستى. سونىمەن قاتار, جارتىلاي ورتا سالماقتاعى ءامىرحان تۇلەۋوۆ (2-2-0) رەسەيلىك قارسىلاسى اندرەي كرەمەنوسوۆتى ەش قيىندىقسىز جەڭدى. ا.كرەمەنوسوۆ ءبىرىنشى راۋندتان كەيىن جەكپە-جەكتى جالعاستىرۋدان باس تارتتى.
ءالي بيتورە,
«ەگەمەن قازاقستان»
