«پينگ-پونگ حانشايىمى» دەپ اتالاتىن الەۋمەتتىك جوبا – قازاقستاندا بالالار ءۇيىنىڭ تاربيەلەنۋشى قىزدارى اراسىندا ۇستەل تەننيسىنىڭ ءتۋرنيرى. جارىس قورىتىندىسى بويىنشا جەڭىمپاز دەپ تانىلعاندار بەيجىڭ قالاسىنا جولداما الىپ, ونداعى سپورت اكادەمياسىنىڭ جاتتىقتىرۋشىلارىنان ارنايى شەبەرلىك دارىستەرىن الۋ مۇمكىندىگىنە يە بولادى. «باۋىرجان» قايىرىمدىلىق قورى, الماتىداعى قىتاي حالىق رەسپۋبليكاسىنىڭ باس كونسۋلدىعى, «نۇر وتان» پارتياسى, قازاقستان رەسپۋبليكاسىنىڭ ۇستەل تەننيسى فەدەراتسياسى جانە Huawei Kazakhstan كومپانياسىنىڭ ۇيىمداستىرۋىمەن قولعا الىنعان يگى باستاما – جەتىم بالالار اراسىنداعى ۇستەل تەننيسى دارىندارىن تاۋىپ, قازاقستاندىق تەننيس سپورتىنىڭ كەڭگە قانات جايۋىن كوزدەيدى.
جارىسقا ەكى اي بويى ەلىمىزدىڭ 10 ايماعىندا وتكەن ىرىكتەۋ تۋرنيرلەرىندە دارا شىققان 40 بالالار ۇيىنەن 60 تاربيەلەنۋشى قىز قاتىستى. ولار ەكى جاس ەرەكشەلىكتەرى بويىنشا جەكەلەي سىنعا ءتۇستى. ناتيجەسىندە 7-10 جاس ارالىعىنداعى قىزدار ىشىندە جۇزدەن جۇيرىك شىققان قوستاناي وبلىستىق بالالار ءۇيىنىڭ تاربيەلەنۋشىسى ماريا زاموتويلو I ورىنعا يە بولدى. وسى جاس ەرەكشەلىگى بويىنشا II ورىندى ورال وبلىستىق بالالار ءۇيىنىڭ تاربيەلەنۋشىسى ۆەرا مولوتكوۆا ەنشىلەسە, تالعار قالاسىنداعى «نۇر» بالالار ءۇيىنىڭ شاكىرتى ناتاليا گۋرينا ۇزدىك ۇشتىكتى تۇيىندەدى. ال 11 مەن 14 جاس ارالىعىنداعى سايىسقا تۇسكەن قىزدار ىشىندە پاۆلودار وبلىسىنداعى كاچيرسكي بالالار ءۇيىنىڭ وقۋشىسى لاۋرا مۇحامەتجانوۆا جەڭىمپاز دەپ تانىلىپ, كورەرمەندەردى ءتانتى ەتتى. II ورىن اقمولا وبلىسىنداعى اقكول بالالار ۇيىنەن كەلگەن نازي دجالاگونياعا, قولا مەدال قاراعاندى وبلىسىنداعى «تاڭشولپان» بالالار ءۇيىنىڭ وقۋشىسى نازيرا ابىلقاسوۆاعا بۇيىردى. وسىلايشا, ەكى جاس ەرەكشەلىگى بويىنشا جەڭىمپاز اتانعان ماريا زاموتويلو مەن لاۋرا مۇحامەتجانوۆا الداعى قىركۇيەك ايىندا بەيجىڭگە بارىپ, ءبىر اپتا بويى تاجىريبەلى مامانداردان ساباق الىپ, ۇلكەن سپورتتىڭ قىر-سىرىنا قانىعاتىن بولادى. جارىستىڭ سالتاناتتى جابىلۋ ءراسىمى كەزىندە تۋرنيرگە قاتىسۋشى بارلىق بالاعا ماقتاۋ قاعازدارى مەن سىي-سياپاتتار تابىستالدى.
تۋرنير ۇيىمداستىرۋشىلارى بۇعان دەيىن قازاقستاندىق جاستاردىڭ سپورتقا دەگەن قىزىعۋشىلىعىن وياتۋ ماقساتىندا ەلىمىزدىڭ تۇكپىر-تۇكپىرىندەگى 100 جەتىمدەر ۇيىنە 100 تەننيس وينايتىن ۇستەل مەن سپورتتىق جابدىقتار سىيعا تارتقان بولاتىن. ەندى بالالار ءۇيىنىڭ تاربيەلەنۋشىلەرى وليمپيالىق سپورت تۇرىنە ەنەتىن ۇستەل تەننيسىن ويناپ, ەركىن جاتتىعۋ جاساپ شەبەرلىكتەرىن شىڭداي الادى.
ارمان وكتيابر,
«ەگەمەن قازاقستان»
الماتى
