ءباسپاسوز ءماسليحاتىنا ەلىمىزدىڭ ينۆەستيتسيالار جانە دامۋ مينيسترلىگىنىڭ ينۆەستيتسيالار جونىندەگى كوميتەتى توراعاسىنىڭ ورىنباسارى لاريسا جۇماعاليەۆا, پولشا رەسپۋبليكاسىنىڭ كاسىپكەرلىكتى دامىتۋ اگەنتتىگى توراعاسىنىڭ ورىنباسارى نينا دوبجىنسكايا, ەكسپو-2017 كورمەسىندەگى پولشا سەكتسياسىنىڭ باس كوميسسارى اندجەي ستەفانسكي مەن پولشانىڭ قازاقستانداعى ەلشىلىگىنىڭ وكىلى توماش زاپالسكي قاتىستى.
قىركۇيەكتىڭ 6-7 كۇندەرى «استانا ەكسپو-2017» حالىقارالىق كورمەسىندە پولشانىڭ ۇلتتىق كۇنى وتەدى دەپ بەلگىلەنگەن. سوعان وراي قازاقستان-پولشا بيزنەس-فورۋمىن وتكىزۋ دە جوسپارلانعان. بۇل جالپى قازاقستان-پولشا كاسىپكەرلەرىنىڭ ەكىنشى فورۋمى. ءبىرىنشىسى بىلتىر ۆارشاۆادا قازاقستان پرەزيدەنتىنىڭ پولشاعا مەملەكەتتىك ساپارىنىڭ اياسىندا وتكەن بولاتىن. ول فورۋمنىڭ ناتيجەسى ەكىجاقتى ساۋدا-ەكونوميكالىق جانە ينۆەستيتسيالىق ىنتىماقتاستىقتى ايتارلىقتاي جانداندىرۋعا مول مۇمكىندىك اشتى.
پولشا دامۋ مينيسترلىگىنىڭ مالىمەتىنشە, 2017 جىلدىڭ العاشقى جارتىجىلدىعىندا ەكىجاقتى تاۋار اينالىمى 601,9 ملن ەۋرونى قۇراپ, 2016 جىلدىڭ سايكەس كەزەڭىمەن سالىستىرعاندا, 75 پايىزعا ۇلعايعان. قازاقستاندىق ەكسپورت 90 پايىزعا ارتىپ, 389,1 ملن ەۋرونى, ال پولشا يمپورتى 54,5 پايىزعا ءوسىپ, 212,8 ملن ەۋرونى قۇراعان.
بريفينگكە قاتىسۋشىلار فورۋمدى ۇيىمداستىرۋ جاڭا ەكونوميكالىق ىنتىماقتاستىقتىڭ باعىتتارىن تالقىلاۋعا, سونىڭ ىشىندە بىرلەسكەن جوبالاردى دامىتۋ جاعدايى, سونداي-اق, ىسكەرلىك بايلانىستاردى ودان ءارى كەڭەيتۋ, ەكونوميكالىق ءوزارا ارەكەتتەستىكتىڭ دەڭگەيىن كەڭەيتىپ, قازاقستانعا پولياك ينۆەستيتسيالارىن كوپتەپ تارتۋعا مۇمكىندىك بەرەتىنىن باسا ايتتى.
پولشا استاناداعى ەكسپو-2017 كورمەسىنە دە بەلسەنە قاتىسۋدا. «بولاشاق ەنەرگياسى» اتتى پولياك پاۆيلونى زاماناۋي كومىر تەحنولوگيالارى, ءوندىرۋدىڭ جاسىل تەحنولوگيالارى, ەلەكتر ەنەرگياسى مەن بيوماسسانى ءوندىرۋ, سونداي-اق, ەنەرگەتيكالىق نارىقتى تسيفرلاندىرۋ تۇرىندە ۇسىنىلعان. ايتقانداي, الداعى ەكسپو-2022-ءنى وتكىزۋ قۇقىعىنا پولياكتىڭ لودز قالاسى ۇمىتكەر. استانانىڭ ءساتتى تاجىريبەسىن ەسكەرە وتىرىپ, باس كوميسسار ا.ستەفانسكي بولاشاقتا قازاقستاندىق جانە پولشالىق تاراپتار اراسىندا ەكسپو كورمەسىن وتكىزۋ بويىنشا كەڭەستەر ۇيىمداستىرۋدى جوسپارلاپ وتىرعانىن اتاپ ءوتتى. سونداي-اق, 7 قىركۇيەكتە ەكسپو-2017 كورمەسى بارىسىندا پولشا پرەزيدەنتىنىڭ قاتىسۋىمەن پولشا ۇلتتىق كۇنىنە ارنالعان سالتاناتتى شارالار وتكىزۋ كوزدەلگەن. «استانا بالەت» تەاترىندا گالا-كونتسەرت, پولشا ۇلكەن تەاترىنىڭ قويىلىمى مەن باسقا دا شارالار وتكىزۋ جوسپارلانۋدا.
دينارا بىتىك,
«ەگەمەن قازاقستان»
