لوندون قالاسىنان ساپارىن باستاعان كريس رامسي استاناعا «Nissan Leaf» ەلەكتروموبيلىمەن 36 كۇندە جەتكەن. لوندون-موڭعوليا ءرالليى ەۋروپا ەلدەرى, ورتالىق ازيا, موڭعوليا ارقىلى ءوتىپ, رەسەيلىك ۋلان-ۋدە قالاسىندا اياقتالادى. 21 تامىزدا رامسي ءوزىنىڭ ەلەكتروموبيلىمەن قازاقستان ەلورداسىنا جەتىپ, 25 تامىزدا سەمەي ارقىلى جولىن جالعاستىرماق.
«اتالعان جارىسقا بيىل 2500 كولىك قاتىسۋدا. نەگىزى لوندون-موڭعوليا جارىسى بيىل 14-رەت وتكىزىلىپ جاتىر. قازاقستانداعى ساياحاتىمىزدى اقتاۋدان باستاپ, اقتوبەگە باردىق. ەندى مىنە استاناعا دا جەتتىك. كولىگىمىز ءبىر قۋاتتانعاننان كەيىن ورتا ەسەپپەن 160-260 شاقىرىمداي جولدى ەڭسەرەدى. قازاقستاننىڭ «قازپوشتا» جانە «قازمۇنايگاز» سەكىلدى كومپانيالارى كومەك كورسەتىپ, وڭىرلەردەگى مەكەمەلەرىندە كولىگىمىزدى قۋاتتاندىرۋعا رۇقسات بەردى. سول ءۇشىن ايتار العىسىمىز شەكسىز. سونىمەن قاتار, مەن 2019 جىلى وتەتىن «80 DAY RACE» دۇنيەجۇزىلىك جارىسىنا قاتىسامىن», دەدى كريس رامسي.
جيىن بارىسىندا «80 Day Race» جارىسىنىڭ نەگىزىن سالۋشى فرانك ماندەرس جانە «استانا كونۆەنشن بيۋرو» جشس ديرەكتورى سانيار ايتەكەنوۆ «80 Day Race» دۇنيەجۇزىلىك جارىسىنىڭ شاباندوزدارى ايالدايتىن توعىز قالانىڭ ءبىرى رەتىندە استانانىڭ دوداعا قاتىساتىنى جونىندە مەموراندۋمعا قول قويدى. پاريجدەگى ەيفەل مۇناراسىنان باستاۋ الاتىن جارىسقا قاتىسۋشىلار 9 ءىرى قالا ارقىلى جەر شارىن اينالىپ, ساياحات جاسايدى. سونىڭ ءبىرى – استانا قالاسى.
ء «بىز 21 تامىزدا استانا قالاسىنىڭ اكىمى اسەت يسەكەشەۆپەن كەزدەستىك. قازاقستان – بولاشاقتى جاساپ, قارقىندى دامىپ كەلە جاتقان يننوۆاتسيالىق, بيىك ماقساتتاردى كوزدەگەن ەل. سوعان قوسا, قازاقستاننىڭ جاڭا دۇنيەلەرگە دەگەن اشىقتىعى جانە بولاشاق تەحنولوگيالارعا قىزىعۋشىلىعى ەكسپو-2017 «بولاشاق ەنەرگياسى» كورمەسى ارقىلى كورىنىس تاۋىپ جاتىر. «80 Day Race» جارىسى دا بولاشاق تەحنولوگيالاردى كەڭىنەن تاراتۋدى كوزدەيدى. سول سەبەپتى استانا قالاسىنىڭ جارىستى قابىلداۋعا كەلىسكەنىنە ءبىز اسا قۋانىشتىمىز», دەدى «80 Day Race» جارىسىنىڭ نەگىزىن سالۋشى فرانك ماندەرس.
دۇنيەجۇزىلىك جارىس اياسىندا 40-قا جۋىق توپ 40 000 شاقىرىمعا سوزىلعان جولدى ءجۇرىپ ءوتىپ, 80 كۇن ىشىندە پاريجگە كەرى قايتادى. ولار كۇنىنە 500 شاقىرىمنان اسا جولدى ەڭسەرۋگە ءتيىس. ءبىر ەرەكشەلىگى, شاباندوزدار تەك جاڭعىرمالى قورلاردى تۇتىناتىن كولىكپەن عانا جارىسقا تۇسە الادى.
سپيكەرلەردىڭ ايتۋىنشا, «80 Day Race» سىندى اۋقىمدى دودانى وتكىزۋ يدەياسى نيدەرلاندتا تۋىنداعان. ال ونىڭ باستى ماقساتى - ەكولوگيالىق تازا كولىك تۋرالى جانە جاسىل تەحنولوگيالاردى كەڭىنەن قولدانۋعا بولاتىندىعى جايلى بۇكىل الەم جۇرتشىلىعىن حاباردار ەتۋ.
ايگۇل شەرنياز,
«ەگەمەن قازاقستان»
