وتىرىستى اشقان مەملەكەتتىك حاتشى قازاقستان پرەزيدەنتى «بولاشاققا باعدار: رۋحاني جاڭعىرۋ» اتتى باعدارلامالىق ماقالاسىندا «سانانىڭ اشىقتىعىن» باستى باسىمدىقتاردىڭ ءبىرى رەتىندە ايقىنداپ بەرگەنىن اتاپ ءوتتى. گۇلشارا ابدىقالىقوۆا «بولاشاق» باعدارلاماسى سانانىڭ اشىقتىعىن ارتتىرۋعا سەپتىگىن تيگىزەتىنىن ايتتى.
– وسكەلەڭ ۇرپاق الەمنىڭ ۇزدىك جەتىستىكتەرىنە اشىق ءارى بەيىم بولۋعا ءتيىس. پرەزيدەنتتىك ستيپەنديا قازاقستاننىڭ قازىرگى جاستارى ءۇشىن ءبىلىم ءورىسىن كەڭەيتۋگە, الەمنىڭ جەتەكشى جوعارى وقۋ ورىندارىندا وقۋعا, ۇزدىك تاجىريبەلىك ماشىقتاردى يگەرۋگە مۇمكىندىك بەرەدى, – دەدى گۇلشارا ابدىقالىقوۆا.
وتىرىس بارىسىندا ءبىلىم جانە عىلىم ءمينيسترى ە.ساعاديەۆتىڭ «بولاشاق» حالىقارالىق ستيپەندياسىن ىسكە اسىرۋ جونىندەگى نورماتيۆتىك قۇقىقتىق اكتىلەردى جەتىلدىرۋ تۋرالى ەسەبى تىڭدالدى, سونداي-اق «بولاشاق» باعدارلاماسىن ىسكە اسىرۋعا قاتىستى بىرقاتار ماسەلە قارالدى.
كوميسسيا شەشىمىمەن ستيپەنديا ماگيستراتۋرادا جانە دوكتورانتۋرادا وقۋعا, سونىمەن قاتار الەمنىڭ جەتەكشى عىلىمي ورتالىقتارىندا تاعىلىمدامادان وتۋگە جىبەرىلەتىن 80 ۇمىتكەرگە تاعايىندالدى.
مەملەكەتتىك حاتشى وتىرىستى قورىتىندىلاپ, «بولاشاق» حالىقارالىق ستيپەندياسىن ىسكە اسىرۋ تەتىكتەرىن ودان ءارى جەتىلدىرۋ جانە تيىمدىلىگىن ارتتىرۋ جونىندە بىرقاتار تاپسىرما بەردى.
