قازاقستان پرەزيدەنتى ەلىمىزدىڭ ەكونوميكاسىندا قوردىڭ ماڭىزدى ءرول اتقاراتىنىن اتاپ ءوتىپ, ونى ءارى قاراي دامىتۋدىڭ جەكەلەگەن باعىتتارىنا توقتالدى.
– «سامۇرىق-قازىنا» قورىنىڭ ەل ەكونوميكاسى ءۇشىن ماڭىزى زور. ول مەملەكەتتىڭ نەگىزگى اكتيۆتەرىن باسقارىپ وتىر. قازىرگى ۋاقىتتا احۋالى جاقسى. مەتالدار باعاسىنىڭ كونيۋنكتۋراسى قولايلى بولىپ قالۋدا, – دەدى نۇرسۇلتان نازارباەۆ.
ءو.شوكەەۆ مەملەكەت باسشىسىنا بيىلعى 7 ايدا اتقارىلعان جۇمىستاردىڭ قورىتىندىسى, سونداي-اق قوردى جانە ونىڭ ەنشىلەس كاسىپورىندارىن ترانسفورماتسيالاۋ بارىسى تۋرالى باياندادى.
– قوردىڭ وندىرىستىك جانە باعا كورسەتكىشتەرى بىلتىرمەن سالىستىرعاندا الدەقايدا جوعارى. جالپى, قوردىڭ جاعدايى تۇراقتى. قازىر ەنشىلەس كومپانيالاردا ترانسفورماتسيالاۋدىڭ 130-عا جۋىق جوباسى ەنگىزىلۋدە. جەكەشەلەندىرۋگە قاتىستى ايتار بولساق, جوسپارلانعان 2015 نىساننىڭ 60%-ى جەكەشەلەندىرىلدى. بۇگىندە ءىرى كومپانيالاردى ساتۋعا كىرىستىك, – دەدى «سامۇرىق-قازىنا» اكتسيونەرلىك قوعامى باسقارماسىنىڭ توراعاسى.
سونداي-اق, ءو.شوكەەۆ حالىقارالىق IFSWF-2017 تاۋەلسىز ءال-اۋقات قورلارى فورۋمىن وتكىزۋگە دايىندىق بارىسى جونىندە ايتتى. وندا الەمدىك ەكونوميكا جاعدايىنداعى ينۆەستيتسيالىق ساياسات ماسەلەلەرىن تالقىلاۋ جوسپارلانۋدا.
سوڭىندا ەلباسى بىرقاتار ناقتى تاپسىرما بەردى.
