اسكەري كافەدرانىڭ العاشقى تۇلەكتەرى 2006 جىلى بىتىرگەن بولاتىن-دى. وسىدان ەكى جىل بۇرىن ەلىمىزدىڭ ءبىلىم جانە عىلىم مينيسترلىگىنىڭ, قورعانىس مينيسترلىگىنىڭ كومەگىمەن ۋنيۆەرسيتەتتە اسكەري كافەدرانىڭ جۇمىسى قايتا باستالدى. سالتاناتتى ءسات تە باستالىپ, ءار ستۋدەنت قولىنا قارۋ الىپ, وتانىنا ادال بولۋعا, وتان ءۇشىن قىزمەت ەتۋگە انت بەردى. وسى ءسات انت بەرۋشىلەر ءۇشىن عانا ەمەس, انت قابىلداۋ ءساتىن كورۋگە كەلگەن ستۋدەنتتەردىڭ اتا-انالارى, تۋىستارى ءۇشىن دە ماڭىزدى, تولقىنىسقا تولى بولدى. ستۋدەنتتەر اسكەري انت قابىلداعان سوڭ, نەگىزگى جەكە قۇراممەن ساپ تۇزەپ, سالتاناتتى مارشپەن ءجۇرىپ ءوتتى. بارلىق جينالعان قوناقتار ءۇشىن ولار اسكەري كافەدرانىڭ ءانۇرانىن ورىنداپ, وزدەرىنىڭ سوڭعى ۆالستەرىن بيلەپ بەردى.
اسكەري ءىس-شارا كەزىندە ستۋدەنت امانگەلدى ايتەنوۆ انت قابىلداۋ راسىمىنەن سوڭ سۇيىكتى قىزىنا ۇسىنىس جاسادى. ستۋدەنتتەر الاڭنىڭ ورتاسىنا شىعىپ, جۇرەك سۋرەتىن بەينەلەدى.
اسكەري كافەدرادا ءبىلىم الاتىنداردىڭ قاتارىنا قوسىلۋ وڭاي ەمەس. ەكى جىل بويى ستۋدەنتتەر اسكەري ءتارتىپتى, ەلىمىزدىڭ قارۋلى كۇشتەرىنىڭ جارعىلارىن وقىپ تانىسادى. وقۋ ورنىنىڭ اسكەري ساباق جۇرگىزۋ كافەدراسىنىڭ باسشىسى, پودپولكوۆنيك ءسابيت شىنتەمىروۆتىڭ ايتۋىنشا, ستۋدەنتتەر سوڭعى ايدى شىعىس قازاقستان وبلىسىندا ورنالاسقان №2878 اسكەري بولىمىندە اسكەري دايارلىقپەن وتكىزدى. اتالمىش بولىمدە ولار تەوريالىق بىلىمدەرىن تاجىريبەدە قولدانۋدى, اتىس تەحنيكاسىن, تاكتيكالىق جانە ينجەنەرلىك دايارلىقتى ۇيرەنىپ, باسقا دا اسكەري-وقۋ تاپسىرمالارىن ورىنداپتى.
فاريدا بىقاي,
«ەگەمەن قازاقستان»
پاۆلودار
