الەمدىك كلاسسيكا شەدەۆرىمەن تولىققان كونتسەرت باعدارلاماسىندا ا.ۆيۆالدي, ي.س.باح, ك.سەن-سانس, ت.ۆيتالي, دج.بوتتەزيني, ە.ماگاليف سىندى ەجەلگى باروككو داۋىرىنەن باستاپ قازىرگى زامانعى اتاقتى كومپوزيتورلاردىڭ مۋزىكالىق تۋىندىلارى ورىندالدى.
جاراتۋشى مەن جاراتىلىس كۇيى تۋرالى تامسانا جىرلايتىن باح شىعارماسىن سارا اساباەۆا فورتەپيانودا ورىنداسا, رومانتيزم داۋىرىنەن سىر شەرتكەن الماس بايعوجين, اسقار مۇقانوۆ, باتىرجان سماقوۆ, باحىتجان جانتۇرعانوۆتار تىڭدارماندى بىردە مولدىرلىك پەن جىلىلىق تۇنعان كوكتەمنىڭ شۋاعىنا ەلىتسە, ەندى بىردە كۇزگى ەلەگيا سارىنى باسىم ايماققا جەتەلەدى. ال تانىمال امەريكالىق كومپوزيتور ەۆگەني ماگاليفتىڭ فلەيتا مەن ىشەكتى اسپاپتار وركەسترىنە ارناپ جازعان «كوليبري» اتتى تۋىندىسىن ناقىشىنا كەلتىرىپ ورىنداعان جىبەك ساپارعاليەۆا كوپتىڭ كوزايىمىنا اينالدى. پابلو ساراساتەنىڭ «سىعان اندەرىن» ورىنداعان اسقار دۇيسەنباەۆ كوڭىلدى كەشتىڭ شىمىلدىعىن جاپتى.
قازاقستاننىڭ ۇزدىك ورىنداۋشىلارى, حالىقارالىق بايقاۋلاردىڭ لاۋرەاتتارى, «قازاقكونتسەرت» مەملەكەتتىك كونتسەرتتىك ۇيىمىنىڭ ارتىستەرى – «سوليستەر اكادەمياسى» 1991 جىلى الەمگە ايگىلى سكريپكاشى, قازاقستاننىڭ ەڭبەك ەرى ايمان مۇساقوجاەۆانىڭ باستاماسىمەن قۇرىلعان بولاتىن. بۇگىندە «سوليستەر اكادەمياسى» قازاقستاننان تىس, ەۋروپا پەن ازيانىڭ, اقش-تىڭ ماڭدايالدى كونتسەرت زالدارىندا ونەر كورسەتىپ كەلەدى.
ايا ءومىرتاي,
«ەگەمەن قازاقستان»
