– برەندان, گلازگودا وتكەن العاشقى ويىن جايلى قانداي پىكىردەسىز؟ «استانانىڭ» ءدال وسىنداي ەسەپپەن ۇتىلۋىنا نە سەبەپ بولدى دەپ ويلايسىز؟
– «استانا» ءۇشىن جاۋاپ بەرە المايمىن. الايدا, العاشقى وتىز مينۋتتا وتە جاقسى ويناعانىن بىلەمىن.ء بىرىنشى گولدى ۇزاققا بارماي سوعىپ العانىمىز جاقسى بولدى. ارى قاراي جۇمىسىمىز جەڭىلدەي بەردى. ال ەرتەڭ مۇلدەم باسقاشا ويىن بولايىن دەپ تۇر. العاشقى ماتچ وتكەننىڭ ەنشىسىندە قالدى. جاقسى ناتيجەگە قول جەتكىزگەنىمىز جاسىرىن ەمەس. ەرتەڭ باستاعان ءىسىمىزدى اياقتاۋىمىز كەرەك. توپ كوماندالاردىڭ دەڭگەيىندە ونەر كورسەتۋ ءۇشىن بىزگە دامۋ كەرەك. «استانا» وتە جيناقى وينايتىن ۇجىمداردىڭ ءبىرى. اسىرەسە, قورعانىستا بارىن سالادى. سونداي-اق, شابۋىل شەبىندە دە بىزگە قيىندىق تۋدىراتىن ويىنشىلاردىڭ بار ەكەنىن ەستەن شىعارماعانىمىز ءجون.
– «سەلتيك» العاشقى ويىنمەن سالىستىرعاندا وزگەشە ويناۋى مۇمكىن بە؟
– ءبىز ءاربىر ماتچتى جوعارى دەڭگەيدە ويناۋىمىز قاجەت.
– گلازگوداعى ناتيجەدەن كەيىن نەگىزگى قۇرامداعى ويىنشىلارعا دەمالىس بەرەسىز بە؟
– نەگىز قۇرام جايلى ماتچ الدىنداعى جاتتىعۋدان كەيىن تالقىلايتىن بولامىز. ءبىزدىڭ الدىمىزداعى باستى مىندەت – ارى قاراي ءوتۋ. وسى ماقساتىمىزعا جەتۋ ءۇشىن بارلىعىنا دايىن بولۋىمىز كەرەك.
– «سەلتيك» وسىمەن قازاقستانعا ءۇشىنشى رەت كەلەيىن دەپ تۇر. بىراق وسىعان دەيىن استانادا وتكەن ءبىر دە ءبىر ويىندا جەڭىسكە جەتپەگەن. ءسىز ءۇشىن جەڭىسكە جەتۋ قانشالىقتى ماڭىزدى؟
– مەن «سەلتيك» قانا ەمەس «اتلەتيكو», «بەنفيكا» سەكىلدى ۇلكەن كوماندالاردىڭ وسىندا كەلىپ, جەڭە الماي كەتكەنىن بىلەمىن. استانادا جەڭىسكە جەتۋ وڭاي ەمەستىگىن جاقسى بىلەمىز. ەرتەڭ ءبىز بۇرىنعىدان دا جاقسى ويناۋ ءۇشىن بارىمىزدى سالامىز. ارينە, شوتلانديا مەن قازاقستان اراسىنداعى ۋاقىت ايىرماشىلىعى, ستاديونداعى سينتەتيكالىق الاڭنىڭ كەرى اسەر ەتەرى انىق.
– ەگەر ەرتەڭگى ويىندا 0:4 ەسەبىمەن ۇتىلىپ قالساڭىزدار نە بولماق؟
– شىنىن ايتسام, ماعان ەرتەڭگى ويىننىڭ ناتيجەسى ماڭىزدى ەمەس. قانداي ەسەپپەن ۇتىلساق تا, چەمپيوندار ليگاسىنىڭ توپتىق كەزەڭىنە جولداما الساق بولعانى. «استانا» ءوز جانكۇيەرلەرىنىڭ الدىندا قانشالىقتى جاقسى ويناسا دا, بەس گول ايىرماشىلىعى ولار ءۇشىن تىم اۋىر بولارى ءسوزسىز.
– «استانا» وتكەن جىلعا قاراعاندا دەڭگەيى تومەندەدى دەپ ويلايسىز با؟
– ءبىز «استاناعا» اسقان قۇرمەتپەن قارايمىز. كوماندا ەۋروارەنادا ۇلكەن جەتىستىكتەرگە جەتتى. استانالىقتار دامىپ كەلەدى, وتكەن جىلعا قاراعاندا ءبىر قادام العا جىلجىعانى بايقالادى. بىراق «سەلتيك» تە ءبىر ورىندا تۇرىپ قالعان ەمەس.
ايتا كەتەيىك, چەمپيوندار ليگاسىنىڭ ىرىكتەۋ كەزەڭى اياسىندا وتكەن ماتچتا «سەلتيك» ءوز الاڭىندا «استانانى» 5:0 ەسەبىمەن جەڭگەن بولاتىن.
ايان ءابدۋالي,
«ەگەمەن قازاقستان»
