سۋرەت: vechastana.kz
بيىلعى جازدا شىمكەنت قالاسىنداعى قازاقستان حالقى اسسامبلەياسىنىڭ عيماراتىنان باستاۋ العان مادەني كەرۋەن ساپارىنىڭ ءبىر قاناتىندا اعايىن, دوستارمەن قاۋىشۋ, ولاردىڭ تىرشىلىگىمەن تانىسۋ بولسا, ەكىنشى قاناتىندا كورشى رەسپۋبليكانىڭ تاريحىندا بۇگىنگى تاۋەلسىزدىككە سوناۋ ورتا عاسىرلاردا قاھارماندىقپەن قىزمەت جاساعان حاندار مەن بيلەردىڭ, باتىرلاردىڭ زيراتتارىنا زيارات جاساۋ بولدى.
باعدارلاماعا ساي تاشكەنتتەگى «قارلىعاش بي» اتانعان تولە ءبيدىڭ, «نۇراتاداعى» ايتەكە ءبيدىڭ, اۋليە اتانعان باسقا دا ۇلى تۇلعالاردىڭ ارۋاقتارىنا ارنالىپ بىرنەشە جەردە اس ۇيىمداستىرىلىپ, قۇران باعىشتالدى. تاشكەنت, سامارقاند, بۇحارا وبلىستارىنداعى اتاۋلاردىڭ (جەر, سۋ اتتارى) بۇرىنعى قالپىنان وزگەرمەي تۇرۋى وزبەك, قازاق حالىقتارىنىڭ ەجەلدەن تۋىسقان, باۋىر ەكەندىگىن پاش ەتكەندەي.
وزبەكستاننىڭ ەڭ سۇلۋ ولكەلەرىن ارالاپ, تاماشالاعان مەيماندار باۋىرلاستارىنىڭ زور ىقىلاسى مەن قۇرمەتىنە ريزا بولدى.
ساپار داۋلەتىنە ازاماتتىعى ساي شىمكەنتتىك كاسىپكەر ءبادىريتدين نىشانقۇلوۆتىڭ (وسى ساپاردىڭ باس دەمەۋشىسى) باستاۋىمەن شەبەر ۇيىمداستىرىلىپ, رۋحاني-مادەني دەمەۋشىلىك جاساعان باسقا دا ازاماتتارعا جۇرت ءدان ريزا بولدى. اسىرەسە, شىمكەنتتىك حامراقۇل داۆرانبەكوۆ, سايرامدىق تۇرسىنقوجا حانقوجاەۆ, تۇركىستاندىق اقىن زەينوللا ەركەبالاەۆ, باباجان ياكۋبوۆ كوڭىلدى ءان, بي, ولەڭ, كوركەمسوز وقۋ ونەرلەرىمەن كوپشىلىككە شاتتىق, قۋانىش سىيلادى. بۇل ازاماتتارعا قارسى الۋشىلار مەن ساپاردى ۇيىمداستىرۋشىلار تاراپىنان ماراپات جاسالدى.
وزبەكستان قالالارىنداعى دوستىق شەرۋىندە كوپشىلىكپەن بىرگە بولىپ, تانىستىق, تانىمدىق قىزمەت جاساعان تاشكەنتتەگى قازاق مادەني ورتالىعى باسقارما باستىعىنىڭ ورىنباسارى حامزا حامراقۇلوۆ, تاشكەنت وبلىستىق اكىمدىگىنىڭ جاۋاپتى قىزمەتكەرى باقىتجان پولاتوۆ كوپتىڭ كوڭىلىنەن شىقتى.
نۇرماحان نازاروۆ,
قازاقستاننىڭ مادەنيەت قايراتكەرى
وڭتۇستىك قازاقستان وبلىسى
