شارانىڭ رەسمي بولىمىندە سەنەگال سەكتسياسىنىڭ كوميسسارى دجوپ ماليك ءسوز سويلەپ, كورمەگە قاتىسۋداعى باستى ماقساتتارىن اڭگىمەلەدى. ء«بىز دە الەم ەلدەرىمەن بىرگە جاڭارتىلاتىن ەنەرگيا كوزدەرىن تۇتىنۋعا جاردەمدەسۋگە نيەتتىمىز. جاڭعىرمالى ەنەرگيا كوزدەرى قورشاعان ورتانىڭ لاستانۋ دەڭگەيىن تومەندەتۋگە جانە سەنەگالدىڭ دامۋ جوسپارىنىڭ قۇرامداس بولىگى بولىپ كەلەتىن حالىقتىڭ ەلەكتروەنەرگيا شىعىندارىن قىسقارتۋعا مۇمكىندىك بەرەدى.
باتىس افريكادا ورنالاسقان مەملەكەتىمىز 2035 جىلعا قاراي دامۋشى ەلدەر قاتارىنا كىرۋدى جوسپارلاۋدا. سەنەگال رەسپۋبليكاسى دامۋىنىڭ باستى باعىتتارىنىڭ ءبىرى –ەنەرگەتيكالىق تاۋەلسىز ەل بولۋ», دەدى ول.
مامانداردىڭ مالىمەتىنشە, سەنەگال ۇكىمەتى بيىل قايتا جاڭعىرتىلاتىن ەنەرگيا كوزدەرىنە دەگەن قارجىنى 20 پايىزعا دەيىن ۇلعايتۋدى كوزدەگەن ەكەن. اسىرەسە كۇن جارىعى مەن جەلدەن وندىرىلەتىن ەنەرگيالارعا كوپ كوڭىل بولىنگەن. وندا قازىردىڭ وزىندە قۋاتى 72 مۆت قۇرايتىن ءۇش كۇن ەلەكتر ستانساسى بار. بولاشاقتا بۇل قۇرىلعىلاردى كوبەيتە تۇسپەك. جوسپار بويىنشا ولاردىڭ جالپى قۋات مولشەرى 350 مۆت-قا جەتۋ كەرەك. بۇل دۇنيەجۇزىلىك بانكتىڭ قولداۋىمەن جۇزەگە اسىرىلادى.
رەسپۋبليكادا جالپى قۋاتى 175 مۆت بولاتىن ەكى جەل پاركىنىڭ قۇرىلىسى جۇرۋدە. ونىڭ ءبىرى «تابا ندەي» دەپ اتالاتىن 150 مۆت-تىق جەل پاركى. ول باتىس افريكاداعى ەلەكتر قۋاتىن وندىرەتىن ەڭ ءىرى نىسان بولادى. سونداي-اق بيوتەحنولوگيا ءوندىرىسى جاقسى دامىپ, جولعا قويىلعان. ولاردىڭ كومەگىمەن ەلدە 10 مىڭ توننا ەتيل ءسپيرتى, بيووتىن بولىپ ەسەپتەلەتىن 35 مىڭ توننا ماتەريال شىعارىلادى. ول باناننىڭ قابىعىنان, ياعني ەكولوگيالىق تازا زاتتان ازىرلەنەدى. ال جاڭعاقتىڭ قابىعى مەن جۇننەن عيماراتتاردى جىلىتۋعا قولدانىلاتىن قۇرىلىس ماتەريالى جاسالادى.
سەنەگال – گيدروەنەرگەتيكاسىن دا جاقسى دامىتقان مەملەكەت. مۇندا ەنەرگەتيكالىق قۋاتى 200 مۆت بولاتىن «مانانتالي» اتتى گيدروەلەكتر ستانساسى جۇمىس ىستەيدى. ول وندىرگەن ەنەرگيانىڭ 33 پايىزى سەنەگالدىقتاردىڭ يگىلىگىنە جۇمسالادى ەكەن.
اسحات رايقۇل,
"ەگەمەن قازاقستان"
