سەمەي قالاسىندا كوپتەگەن تىلدەردى وقىتۋ ورتالىقتارى اشىلىپ, مەملەكەتتىك ءتىلدى جانە باسقا دا تىلدەردى وقىتۋ جۇمىستارى جۇرگىزىلۋدە. سونىڭ ىشىندە قالالىق ورتالىقتاندىرىلعان كىتاپحانا جۇيەسىندە بيىل ناۋرىز ايىندا اعىلشىن ءتىلىن وقىتۋ ۇيىرمەسى اشىلعان بولاتىن. ءبىر ەرەكشەلىگى ۇيىرمەگە كەلۋشىلىر 58-80 جاس ارالىعىنداعى زەينەتكەرلەر. اشىلعان كۇنى 5 وقۋشىسى بولعان ۇيىرمەنىڭ بۇگىندە 15 قاتىسۋشىسى اعىلشىن ءتىلىن بەلسەندى وقىپ كەلەدى.
كىتاپحانا ديرەكتورى گۇلنيسا مولجيگيتوۆانىڭ ايتۋىنشا, وسىدان ءبىر جىل بۇرىن زەينەتكەرلەرگە كومپيۋتەر ساۋاتتىلىعىن وقىتۋ ۇيىرمەسى جۇمىس ىستەگەن. ۇجىممەن كەلىسە كەلە جانە زەينەتكەر وقىرمانداردىڭ ۇسىنىسى بويىنشا اعىلشىن ءتىلىن وقىتۋ ۇيىرمەسى اشىلىپتى.
ۇيىرمەگە قاتىسۋشى ايگىلى تەمىرجولشى مويىنباەۆتار ديناستياسىنىڭ وكىلى, ۇزاق جىل سەمەي ۆوكزالىنىڭ باسشىسى بولعان قازىرگى زەينەتكەر, انالار كەڭەسىنىڭ ءتورايىمى ناعيما ابدۋايتقىزى: «ەلباسىنىڭ «بولاشاققا باعدار: رۋحاني جاڭعىرۋ» اتتى ماقالاسىندا مىنا جاھاندانۋ زامانىندا ۇلتىمىز باسەكەگە قابىلەتتى بولۋ ءۇشىن, «تسيفرلى قازاقستان», ء«ۇش تىلدە ءبىلىم بەرۋ», «مادەني جانە كونفەسسياارالىق كەلىسىم» سياقتى باعدارلامالاردى جۇزە اسىرۋ قاجەتتىگى ايتىلعان. ءبىزدىڭ اعىلشىن ءتىلىن وقىپ, ۇيرەنگەنىمىز مىنا ءوسىپ كەلە جاتقان وسكەلەڭ ۇرپاققا ۇلگى بولسىن, قاي جاستا بولماسىن ءبىلىم الۋعا كەش ەمەس دەگەن ويمەن وقىپ جۇرگەن جايىمىز بار. سونداي-اق, ولار ەلىمىزدىڭ يگىلىگى ءۇشىن تالاپتانسىن, كوپتىڭ ىشىندە بىرەۋى ەمەس, بىرەگەيى بولۋىنا ۇمتىلسىن»,-دەيدى.
ال, قىرىق جىل ءان-كۇي پانىنەن ساباق بەرگەن رىسكۇل قۇدىسوۆا: «قازىرگى زاماندا قايدا بارساڭ دا, اعىلشىنشا ءبىلۋ قاجەت. قازىر نە كوپ, كومپانيا كوپ. بارىنە كىرگىڭ كەلەدى, ءبىز دە قارتايدىق دەمەي, تابىس تاپقىمىز كەلەدى. ءبىز سياقتى ولار دا تالاپتانىپ, نيەتتەنسىن دەيمىز. ارينە, ءبىزدىڭ جاسىمىزعا كەلگەندە شەت ءتىلىن ۇيرەنۋ قيىن عوي, الايدا تالاپتانىپ وقىپ ءجۇرمىز. قازىرگى تاڭدا, ومىرگە ەڭ قاجەتتى وسى ينتەرنەت پەن اعىلشىن ءتىلى بولىپ تۇر»,-دەيدى قارت اجەي.
تىلگە تيەك ەتسەك, دارىستەر تەگىن جۇرگىزىلەدى, اپتاسىنا ەكى رەت وتكىزىلەدى. وقىتۋ كۋرسى اياقتالعان سوڭ تۇلەكتەرگە ارنايى كۋالىك سالتاناتتى تۇردە تابىستالادى. ال زەينەتكەرلەردىڭ ۋاقىتىندا كەلۋ ءتارتىبى مەن ىزدەنىمپازدىقتارى, قىزىعۋشىلدىقتارى كىمدى بولسىن قايران قالدىرادى.
انار قۋانعاليەۆا,
سەمەي قالاسىنىڭ
مادەنيەت جانە تىلدەردى دامىتۋ ءبولىمىنىڭ باس مامانى
